ଫୁଲବାଣୀ ଅଫିସ, ୮ା୧୧-ରାଜ୍ୟ ଅନୁସୂଚିତ ଜାତି ଓ ଜନଜାତି ମନ୍ତ୍ରୀ ଜଗନ୍ନାଥ ସାରକା ଗୁୁରୁବାର ଦିନିକିଆ କନ୍ଧମାଳ ଜିଲା ଗସ୍ତରେ ଆସି ବିଭାଗ ପକ୍ଷରୁ ଚାଲିଥିବା ବିଭିନ୍ନ ଉନ୍ନୟନ କାର୍ଯ୍ୟ ବୁଲି ଦେଖିବା ସହ ସମୀକ୍ଷା କରିଛନ୍ତି। ମନ୍ତ୍ରୀ କେତେକ କାର୍ଯ୍ୟରେ ଅସନ୍ତୋଷ ବ୍ୟକ୍ତ କରିଛନ୍ତି। ଫୁଲବାଣୀ ବ୍ଲକ ମିଣିଆସ୍ଥିତ କୁଡିପୁଞ୍ଜା ସେବାଶ୍ରମରେ ଅନିୟମିତତା ଦେଖି ପ୍ରଧାନ ଶିକ୍ଷୟିତ୍ରୀଙ୍କୁ ତୁରନ୍ତ ନିଲମ୍ବନ କରିବାକୁ ନିର୍ଦ୍ଦେଶ ଦେଇଛନ୍ତି।
ମନ୍ତ୍ରୀ ପ୍ରଥମେ ଫୁଲବାଣୀସ୍ଥିତ ଇ-ଲାଇବ୍ରେରିକୁ ଯାଇଥିଲେ। ସେଠାରେ ବିଭିନ୍ନ ପୁସ୍ତକ ଓ ମାଗାଜିନ ଦେଖିଥିଲେ। କେଉଁମାନେ ଏଠାକୁ ପଢ଼ିବାକୁ ଆସୁଛନ୍ତି ତାହା ଉପରେ ଫୁଲବାଣୀ ସମନ୍ବିତ ଆଦିବାସୀ ଉନ୍ନୟନ ସଂସ୍ଥା ପ୍ରକଳ୍ପ ପ୍ରଶାସକ(ପିଏ ଆଇଟିଡିଏ)ଙ୍କୁ ପଚାରି ବୁଝିଥିଲେ। ପରେ ପକନାଗାଁ ଉଚ୍ଚ ବିଦ୍ୟାଳୟକୁ ଯାଇ ୧୦ମ ଶ୍ରେଣୀ ଛାତ୍ରୀମାନଙ୍କ ସହ କଥା ହୋଇଥିଲେ। ସେଠାରୁ ମିଣିଆ ପଞ୍ଚାୟତକୁ ଯାଇ କଙ୍ଗେଇ ଡ୍ୟାମ ପରିଦର୍ଶନ କରିଥିଲେ। ମାଛ ଚାଷ କରୁଥିବା ଏସ୍ଏଚ୍ଜି ଗ୍ରୁପର ସଦସ୍ୟାମାନଙ୍କ ସହ ଆଲୋଚନା କରିଥିଲେ। ମହିଳାମାନେ ମନ୍ତ୍ରୀଙ୍କୁ ୪ଟି ସୋଲାର ଲାଇଟ ଓ ମାଛ ରଖିବା ଗୃହ ନିର୍ମାଣ ପାଇଁ ନିବେଦନ କରିଥିଲେ। ତୁରନ୍ତ ଏହା କରିବାକୁ ପିଏ ଆଇଟିଡ଼ିଏଙ୍କୁ ମନ୍ତ୍ରୀ ନିର୍ଦ୍ଦେଶ ଦେଇଥିଲେ। ଏହା ପରେ ମନ୍ତ୍ରୀ କୁଡ଼ିପୁଞ୍ଜା ସେବାଶ୍ରମକୁ ଯାଇଥିଲେ। ସେଠାରେ ଅବ୍ୟବସ୍ଥା ଦେଖି ଅସନ୍ତୋଷ ପ୍ରକାଶ କରିଥିଲେ। ସ୍କୁଲରେ ପିଲାଙ୍କୁ ତଳେ ବସା ଯାଇଥିବା ଓ ମିଥ୍ୟା ଉପସ୍ଥାନ ଦେଖି ବିରକ୍ତ ହେବା ସହ ପ୍ରଧାନଶିକ୍ଷୟିତ୍ରୀ ପ୍ରମିଳା ପାଣିଗ୍ରାହୀଙ୍କୁ କାର୍ଯ୍ୟରୁ ନିଲମ୍ବିତ କରିବାକୁ ଜିଲା ମଙ୍ଗଳ ଅଧିକାରୀଙ୍କୁ ନିର୍ଦ୍ଦେଶ ଦେଇଥିଲେ। ଫୁଲବାଣୀ ବିଧାୟକ ଅଙ୍ଗଦ କହଁର, ଜିଲା ପରିଷଦ ଅଧ୍ୟକ୍ଷା ଆକାଂକ୍ଷା ପ୍ରଧାନ, ପିଏ ଆଇଟିଡିଏ ବୀରେନ୍ଦ୍ର କୁମାର ଦାସ, ଜିଲା ମଙ୍ଗଳ ଅଧିକାରୀ ଶେଷଦେବ ବେହେରା, ଜୀବନଜୀବିକା ପ୍ରକଳ୍ପ ପରାମର୍ଶଦାତା ବୈଦ୍ୟନାଥ ଖଟୁଆ ପ୍ରମୁଖ ଏହି ଗସ୍ତରେ ସାମିଲ ଥିଲେ।
