ଜଳେଶ୍ୱର/ଭୋଗରାଇ, ୧୯ା୮(ଡିଏନ.ଏ.)-ଲଘୁଚାପଜନିତ ଲଗାଣ ବର୍ଷା ଯୋଗୁ ବାଲେଶ୍ୱର ଜିଲାର ନଦୀ ନାଳ ଉଛୁଳିବା ଆରମ୍ଭ କରିଛି। ଉପରମୁଣ୍ଡରେ ପ୍ରବଳ ବର୍ଷା ଯୋଗୁ ସୁବର୍ଣ୍ଣରେଖାରେ ଚଳିତବର୍ଷର ପ୍ରଥମ ବନ୍ୟାଜଳ ଆସିଛି। ଅନୁରୂପ ବୁଢାବଳଙ୍ଗରେ ଜଳପତ୍ତନ ବୃଦ୍ଧି ପାଇଛି। ରବିବାର ମଧ୍ୟାହ୍ନରେ ଜଳକା କୂଳ ଲଙ୍ଘିଥିବା ସୂଚନା ମିଳିଛି। ଉତ୍ତର ବାଲେଶ୍ୱରରେ ଶନିବାର ରାତିଠାରୁ ଅବିଶ୍ରାନ୍ତ ବର୍ଷା ଲାଗି ରହିଥିବା ବେଳେ ରବିବାର ସନ୍ଧ୍ୟାରୁ ବର୍ଷା ପରିମାଣ କମିଛି। ଏହାସତ୍ତ୍ୱେ ପ୍ରଶାସନ ସୁବର୍ଣ୍ଣରେଖା ବନ୍ୟାଜଳ ସ୍ଥିତି ଉପରେ କଡା ନଜର ରଖିଛି।
ଜିଲା ଜରୁରୀକାଳୀନ ଦପ୍ତରରୁ ମିଳିଥିବା ସୂଚନା ଅନୁଯାୟୀ ଗତ ୨୪ ଘଣ୍ଟାରେ ଜଳେଶ୍ୱରରେ ସର୍ବାଧିକ ୧୬୧ ମି.ମି. ବର୍ଷା ହୋଇଥିବା ବେଳେ ଭୋଗରାଇରେ ୧୩୦, ବସ୍ତାରେ ୬୭, ବାଲିଆପାଳରେ ୫୨ମି.ମି. ବର୍ଷା ହୋଇଛି। ଜିଲାରେ ମୋଟ ବର୍ଷାର ପରିମାଣ ୬୧୨ମି.ମି. ବୋଲି ରେକର୍ଡ କରାଯାଇଛି। ଲଗାଣ ବର୍ଷା କାରଣରୁ ଜୀବନଯାତ୍ରା ପ୍ରଭାବିତ ହୋଇଛି। ସୁବର୍ଣ୍ଣରେଖାର ଉପରମୁଣ୍ଡରେ ଅଧିକ ବର୍ଷା ହୋଇଥିବା ସୂଚନା ମିଳିଛି। ଜାମସେଦପୁରରେ ୧୧୯, ରାଜଘାଟରେ ୧୧୩.୪, ଜାମଶୁଳାରେ ୯୮.୮, ଘାଟଶିଳାରେ ୯୧.୪ ଓ ଫେକୋଘାଟରେ ୮୩.୦ମି.ମି. ବର୍ଷା ହୋଇଥିବା ସେଚ ବିଭାଗ ପକ୍ଷରୁ ସୂଚନା ଦିଆଯାଇଛି। ରବିବାର ସନ୍ଧ୍ୟା ୬ଟା ସୁଦ୍ଧା ସୁବର୍ଣ୍ଣରେଖାର ରାଜଘାଟଠାରେ ଜଳପତ୍ତନ ବୃଦ୍ଧି ପାଇ ୫.୮ ମିଟରରେ ପହଞ୍ଚିଛି। ସେଠାରେ ସତର୍କ ସଙ୍କେତ ୯.୪୫ମିଟର ଥିବା ବେଳେ ବିପଦ ସଙ୍କେତ ୧୦.୩୬ମିଟର ରହିଛି। ଜଳସ୍ତର କ୍ରମଶଃ ବୃଦ୍ଧି ପାଉଥିବାରୁ ପ୍ରଶାସନ ଓ ସେଚବିଭାଗ ଏଥିପ୍ରତି ସଜାଗ ଦୃଷ୍ଟି ରଖିଛି।
