ନୂଆଦିଲ୍ଲୀ, ୯ା୧: ବିହାରର ବହୁଚର୍ଚ୍ଚିତ ମୁଜାଫରପୁର ଆଶ୍ରୟ ଗୃହରୁ ଯୁବତୀ ନିଖୋଜ ଏବଂ ହତ୍ୟା ମାମଲାରେ ବୁଧବାର କେନ୍ଦ୍ରୀୟ ତଦନ୍ତକାରୀ ବ୍ୟୁରୋ (ସିବିଆଇ) ସୁପ୍ରିମକୋର୍ଟରେ ରିପୋର୍ଟ ଦାଖଲ କରିଛି। ମୁଜଫରାପୁରରସ୍ଥିତ ଉକ୍ତ ଆଶ୍ରୟ ଗୃହରେ କୌଣସି ଯୁବତୀଙ୍କ ହତ୍ୟା ହୋଇନାହିଁ ଏବଂ ମିଳିଥିବା ମଣିଷ କଙ୍କାଳ କୌଣସି ନାବାଳିକା ଅନ୍ତେବାସୀଙ୍କ ନୁହେଁ ବୋଲି ସିବିଆଇ ନିଜ ରିପୋର୍ଟରେ ଉଲ୍ଲେଖ କରିଛି।
ପ୍ରଧାନ ବିଚାରପତି ଏସ୍.ଏ. ବୋବ୍ଡେଙ୍କ ଅଧ୍ୟକ୍ଷତାରେ ଗଠିତ ଖଣ୍ଡପୀଠ ଆଶ୍ରୟ ଗୃୃହ କେଳେଙ୍କାରୀ ମାମଲାର ଶୁଣାଣି କରି ସିବିଆଇ ରିପୋର୍ଟକୁ ଗ୍ରହଣ କରିଛନ୍ତି। ସିବିଆଇ ମୁଜାଫରପୁର ଆଶ୍ରୟ ଗୃୃହ କେଳେଙ୍କାରୀ ମାମଲା ସହ ମୋଟ ୧୭ଟି ଆଶ୍ରୟ ଗୃହରେ ଉତ୍ପୀଡ଼ନ ଏବଂ ନିର୍ଯାତନା ଘଟଣାର ତଦନ୍ତ ପରେ ରିପୋର୍ଟ ଦାଖଲ କରିଛି। ଆଟର୍ନି ଜେନେରାଲ କେ.କେ. ବେଣୁଗୋପାଳ ସିବିଆଇର ପକ୍ଷ ରଖି ଯୁକ୍ତି ବାଢିଥିଲେ ଯେ, ଆଶ୍ରୟ ଗୃହରୁ ମିଳିଥିବା ଦୁଇ କଙ୍କାଳ କୌଣସି ଅନ୍ତେବାସୀଙ୍କ ନୁହେଁ। ଗୋଟିଏ କଙ୍କାଳ ଜଣେ ପୁରୁଷଙ୍କ ଥିବାବେଳେ ଅନ୍ୟଟି ଜଣେ ମହିଳାଙ୍କ। ଏହି ବିଷୟ ଫୋରେନ୍ସିକ ରିପୋର୍ଟକୁ ଜଣାପଡ଼ିଛି। ଉଲ୍ଲେଖଯୋଗ୍ୟ ୨୦୧୮ରେ ଟାଟା ଇନଷ୍ଟିଚ୍ୟୁଟ ଅଫ୍ ସୋସିଆଲ ସାଇନ୍ସର ରିପୋର୍ଟ ପରେ ଏହି ଘଟଣା ପ୍ରକଟ ହୋଇ ସାରା ଦେଶରେ ଆଲୋଡ଼ନ ସୃଷ୍ଟି କରିଥିଲା।
