ନୂଆଦିଲ୍ଲୀ,୧୩-୯: ଅଟୋ ସେକ୍ଟରରେ ଦେଖାଦେଇଥିବା ମାନ୍ଦାବସ୍ଥା ପାଇଁ କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରାମନ୍ ଓଲା ଓ ଉବର ଭଳି ଟ୍ୟାକ୍ସି ଏଗ୍ରିଗେଟର୍ସକୁ ଦାୟୀ କରିଛନ୍ତି। କିନ୍ତୁ ଦେଶର ସର୍ବବୃହତ କାର୍ ନିର୍ମାତା ମାରୁତି ଏଥିରେ ସହମତ ନୁହେଁ। କମ୍ପାନୀର ଜଣେ ଶୀର୍ଷ ଅଧିକାରୀ କାର୍ଯ୍ୟନିର୍ବାହୀ ନିର୍ଦ୍ଦେଶକ ଶଶାଙ୍କ ଶ୍ରୀବାସ୍ତବଙ୍କ ମତରେ ଯୁବବର୍ଗଙ୍କ ମଧ୍ୟରେ ଓଲା, ଉବର ବ୍ୟବହାର ପ୍ରତି ଆକର୍ଷଣ ବଢ଼ିବା ଆର୍ଥିକ ମାନ୍ଦାବସ୍ଥାର କାରଣ ହୋଇ ନ ପାରେ। ସେ କହିଛନ୍ତି ଯେ, କ୍ୟାବ୍ ସେବା ଦେଶରେ ୬-୭ ବର୍ଷ ହେଲା ଚାଲୁଛି। ଏହି ସମୟରେ ଅଟୋ ଶିଳ୍ପରେ ଭଲ ଅଭିବୃଦ୍ଧି ଦେଖାଯାଇଥିଲା। ଗତ କିଛି ମାସ ହେଲା ଗାଡ଼ି ବିକ୍ରି ଦ୍ରୁତଗତିରେ କାହିଁକି ହ୍ରାସ ପାଇଲା ବୋଲି ସେ ପ୍ରଶ୍ନ କରିଛନ୍ତି। ଏ ସଂକ୍ରାନ୍ତରେ ଅଧ୍ୟୟନର ଆବଶ୍ୟକତା ରହିଛି ବୋଲି ଶ୍ରୀବାସ୍ତବ କହିଛନ୍ତି। ମାନ୍ଦାବସ୍ଥା ଦୂର କରିବା ଲାଗି ସରକାରଙ୍କ ଦ୍ୱାରା ଘୋଷିତ ଉପାୟ ପର୍ଯ୍ୟାପ୍ତ ନୁହେଁ ବୋଲି ସେ କହିଛନ୍ତି।
ଗଣମାଧ୍ୟମ ପ୍ରତିନିଧିଙ୍କ ସହ ଆଲୋଚନା କାଳରେ ସେ କହିଛନ୍ତି ଯେ, କାର୍ କିିଣିବାକୁ ନେଇ ଏବେ ମଧ୍ୟ ଭାରତୀୟଙ୍କ ଧାରଣାରେ କୌଣସି ପରିବର୍ତ୍ତନ ହୋଇନି। ଲୋକେ ନିଜର ଆବଶ୍ୟକତା ଅନୁଯାୟୀ ଏବଂ ସଉକ ପୂର୍ଣ୍ଣ କରିବା ଲାଗି କାର୍ କିଣିବାକୁ ଚିନ୍ତା କରନ୍ତି। ସୂଚନାଥାଉ କି, ଅର୍ଥମନ୍ତ୍ରୀ ସୀତାରାମନ୍ କହିଥିଲେ ଯେ, ଲୋକଙ୍କ ମାନସିକତାରେ ପରିବର୍ତ୍ତନ ଆସିଛି। ଇଏମ୍ଆଇ ଦେଇ କାର୍ କିଣିବା ବଦଳରେ ଲୋକେ ଏବେ ଓଲା, ଉବର ଭଳି କ୍ୟାବ୍ ବ୍ୟବହାର କରିବାକୁ ଅଧିକ ପସନ୍ଦ କରୁଛନ୍ତି।
ଶ୍ରୀବାସ୍ତବଙ୍କ ମତରେ ଅଟୋ ସେକ୍ଟରରେ ଦେଖାଦେଇଥିବା ମାନ୍ଦାବସ୍ଥା ପାଇଁ ଓଲା,ଉବର ଦାୟୀ ନୁହେଁ। ପ୍ରକୃତ କାରଣ ସମ୍ପର୍କରେ ଏକ ସିଦ୍ଧାନ୍ତରେ ପହଞ୍ଚତ୍ବାକୁ ହେଲେ ଏ ସଂକ୍ରାନ୍ତରେ ଗଭୀର ଅଧ୍ୟୟନ ହେବା ଆବଶ୍ୟକ। ସେ କହିଛନ୍ତି ଯେ, ମାନ୍ଦାବସ୍ଥା ଦୂର ଲାଗି ସରକାରଙ୍କ ଘୋଷଣା ଦୀର୍ଘକାଳୀନ ସମୟ ପାଇଁ ଭଲ ହୋଇପାରେ। ସେ କହିଛନ୍ତି ଯେ, ଲୋକେ ଅଫିସ ଯିବା ଲାଗି ସପ୍ତାହ ଯାକ ଓଲା,ଉବର ବ୍ୟବହାର କରିପାରନ୍ତି। କିନ୍ତୁ ଛୁଟିଦିନରେ ପରିବାର ସହ ବାହାରକୁ ଯିବା ବେଳେ ନିଜ ଗାଡ଼ି ବ୍ୟବହାର କରିବାକୁ ଅଧିକ ପସନ୍ଦ କରୁଛନ୍ତି। ଅଟୋ ସେକ୍ଟରରେ ମାନ୍ଦାବସ୍ଥା ପାଇଁ ଅନେକଗୁଡ଼ିଏ କାରଣ ହୋଇପାରେ। ନଗଦ ସଙ୍କଟ, ନିୟାମକୀୟ ପ୍ରସଙ୍ଗ ଯୋଗୁ ଦାମ୍ ବଢ଼ିବା, ଅଧିକ ଟିକସ ଆଦାୟ ସହ ବୀମା ମହଙ୍ଗା ହେବା କାରଣ ହୋଇପାରେ। ନିକଟରେ ସୋସାଇଟି ଅଫ୍ ଇଣ୍ଡିଆନ ଅଟୋମୋବାଇଲ ମାନୁଫ୍ୟାକ୍ଚରର୍ସ(ସିଆମ୍)ର ତଥ୍ୟ ଅନୁଯାୟୀ ଅଗଷ୍ଟରେ ଗାଡ଼ି ବିକ୍ରି ୨୩.୫୫% ହ୍ରାସ ପାଇଛି।
