ସାକ୍ଷୀଗୋପାଳ, ୪ା୮(ଡି.ଏନ୍.ଏ.): ସାକ୍ଷୀଗୋପାଳ ରେଳଷ୍ଟେଶନ ନିକଟରେ ଶୁକ୍ରବାର ବିଳମ୍ବିତ ରାତ୍ରିରେ ଏକ ଦୁଇଟି ପରିବାରରୁ ଲୁଟେରାମାନେ ବିପୁଳ ପରିମାଣର ସମ୍ପତ୍ତି ଲୁଟ୍ କରିନେଇଛନ୍ତି। ଲୁଟେରାମାନେ ଯାଦବ ନିବାସରେ ୧୦ଜଣ ଡକାୟତ ପଶି ୭ଜଣ ପରିବାର ସଦସ୍ୟଙ୍କ ମୁଣ୍ଡରେ ପିସ୍ତଲ ଲଗାଇ ହାତଗୋଡ ବାନ୍ଧି ସେମାନଙ୍କୁ ମାରପିଟ୍ କରି ଲକ୍ଷାଧିକ ଟଙ୍କା, ସୁନା ଗହଣା ଲୁଟ୍ କରିଛନ୍ତି। ମାତ୍ର ୪୦ ମିନିଟ୍ ଭିତରେ ସେମାନେ ଅବସରପ୍ରାପ୍ତ ଦୁଇ କର୍ମଚାରୀଙ୍କୁ ସର୍ବଶାନ୍ତ କରିଦେଇ ଘଟଣାସ୍ଥଳରୁ ଖସି ପଳାଇ ଯାଇଥିଲେ। ଖବରପାଇ ରାତି ୩ଟାରେ ସତ୍ୟବାଦୀ ଥାନା ଆଇଆଇସି ତପନ କୁମାର ରାଉତ ଓ ପୋଲିସ ଅଧିକାରୀମାନେ ଘଟଣାସ୍ଥଳରେ ପହଞ୍ଚତ୍ ଆଖପାଖ ଅଞ୍ଚଳରେ ଚଢ଼ାଉ କରିଥିଲେ। ଦୁଇ ପରିବାର ପକ୍ଷରୁ ସତ୍ୟବାଦୀ ଥାନାରେ ଲିଖିତ ଅଭିଯୋଗ କରାଯାଇଛି। ଏନେଇ ସତ୍ୟବାଦୀ ଥାନା କେସ୍ ନଂ ୧୩୦/୧୯ରେ ଏକ ମାମଲା ରୁଜୁ କରାଯାଇଛି। ତଦନ୍ତକାରୀ ଅଧିକାରୀ ରବିନ୍ଦ୍ର ନାଥ ନନ୍ଦ ସାଇଣ୍ଟିଫିକ୍ ଟିମ୍ ସହ ଘଟଣାସ୍ଥଳକୁ ଯାଇ ତଦନ୍ତ ଆରମ୍ଭ କରିଛନ୍ତି। ସାକ୍ଷୀଗୋପାଳ ଷ୍ଟେଶନ ନିକଟରେ ଅବସରପ୍ରାପ୍ତ ବ୍ୟାଙ୍କ କର୍ମଚାରୀ ଯାଦବ ନାୟକ ତାଙ୍କ ପରିବାର ସହ ଉପର ମହଲାରେ ରହୁଥିବାବେଳେ ଅନ୍ୟଜଣେ ଅବସରପ୍ରାପ୍ତ କର୍ମଚାରୀ ଗଦାଧର ରଥ ସ୍ତ୍ରୀ କଲ୍ୟାଣୀଙ୍କ ସହ ତଳେ ଭଡାରେ ରୁହନ୍ତି। ଡକାୟତମାନେ ମୁଖ୍ୟ ଫାଟକ ତାଲା ଭାଙ୍ଗି ଗୋଟିଏ ଝରକା ଗ୍ରୀଲ ତାଡି ଗଦାଧରଙ୍କ କୋଠରୀକୁ ପଶିଥିଲେ। ଗଦାଧର ଓ କଲ୍ୟାଣୀଙ୍କୁ ଖଟ ଉପରେ ବାନ୍ଧିଦେଇ ସେମାନଙ୍କ ଠାରୁ ଆଲମିରା ଚାବି ନେଇ ୪୦ ହଜାର ଟଙ୍କା, ୪ ଭରି ଓଜନର ସୁନା ଗହଣା ଲୁଟି ନେଇଥିଲେ। ଏହା ସହ ଆଲମିରା, ଫ୍ରିଜ୍, ରୋଷେଇଘର, ଟେବୁଲ ଡ୍ରରୁ ଜିନଷ ପତ୍ର ବାହାର କରି ପକାଇ ଦେଇଥିଲେ। ପରେ ଡକାୟତ ଦଳ ଉପର ମହଲାରେ ଯାଦବ ନାୟକ, ତାଙ୍କ ସ୍ତ୍ରୀ ମୀନା ଦେବୀ, ଦୁଇଝିଅ ଗୀତାଞ୍ଜଳୀ, ପୁଷ୍ପାଞ୍ଜଳୀ ଓ ନାତି ସୌମ୍ୟରଞ୍ଜନଙ୍କ ମୁଣ୍ଡରେ ପିସ୍ତଲ ଲଗାଇ ସେମାନଙ୍କୁ ଗୋଟିଏ ଘରେ ବାନ୍ଧି ବନ୍ଦ କରିଦେଇଥିଲେ। ଝିଅ ଓ ସ୍ତ୍ରୀ ପିନ୍ଧିଥିବା ସୁନା ଅଳଙ୍କାର ଛଡାଇ ନେଇଥିଲେ। ନଗଦ ଏକ ଲକ୍ଷ ଟଙ୍କା, ୧୦ ଭରି ସୁନା ଅଳଙ୍କାର, ରୂପା ଗହଣା, ୩ ଟି ମୋବାଇଲ ଓ ୪ ଟି ହାତ ଘଣ୍ଟା ଆଦି ଲୁଟି ନେଇଥିବା ପୋଲିସ ନିକଟରେ ଅଭିଯୋଗରେ ଉଲ୍ଲେଖ କରାଯାଇଛି।
