ଭୁବନେଶ୍ୱର, ୯ା୧୨(ବ୍ୟୁରୋ): କୁକୁର ହୋଇ ମଧ୍ୟ ମାଲିକ ପ୍ରତି ଥିବା ବିଶ୍ୱସନୀୟତା ପ୍ରତିପାଦିତ କରୁଥିଲେ। ମାଲିକଙ୍କ ଆଜ୍ଞାଧୀନ ହୋଇ ବିଚାରକଙ୍କ ସବୁ କଥାକୁ ମାନୁଥିଲେ ସେମାନେ। ଏଭଳି ଦେଖିବାକୁ ମିଳିଥିଲା ଡଗ୍ ଶୋ’ରେ। ରବିବାର ଶେଷ ହୋଇଯାଇଛି ଡଗ୍ ଶୋ’। ଓଡ଼ିଶା କେନେଲ କ୍ଲବ୍ ପକ୍ଷରୁ ଚାଲୁଥିବା ଏହି ଶୋ’ର ଉଦ୍ଯାପନୀ ଦିବସରେ ଥିଲା ଜାତୀୟସ୍ତରୀୟ ଅଲ୍ ବ୍ରିଡ୍ସ ଚମ୍ପିୟନ୍ଶିପ୍ ଡଗ୍ ଶୋ’। ବିଭିନ୍ନ ପ୍ରଜାତିର କୁକୁର ଭିନ୍ନ ଭିନ୍ନ ପୋଷାକରେ ସାଜସଜା ହୋଇ ପଡ଼ିଆରେ ଦର୍ଶକଙ୍କୁ ବିମୋହିତ କରିଥିଲେ। ବିଚାରକଙ୍କ କଥା ମାନି ନିଜ ପାରଦର୍ଶିତା ଦେଖାଇଥିଲେ। କୁକୁରଙ୍କ ଏଭଳି ଚମତ୍କାର ଖେଳ ଦେଖି ଉପସ୍ଥିତ ଦର୍ଶକ ଭରପୂର ମଜା ନେଇଥିଲେ। ଏଥିରେ ଜର୍ମାନ ସେଫର୍ଡ, ପଗ୍, ଲାବ୍ରାଡର, ଗୋଲ୍ଡେନ୍ ରେଟ୍ରିଭର, ବେଲଜିଆନ ମାଲିନଏସ୍, ବକ୍ସର, ଆମେରିକାନ କକର ସ୍ପାନିଏଲ, ଡୋବରମ୍ୟାନ, ଡାଲମାସିଆନ, ଗ୍ରେଟ୍ ଡେନ୍, ଅକିତା, କାନ୍ କର୍ସୋ, ବୁଲ୍ମାସ୍ତିଫ, ପୋମେରିଆନ୍, ସାଇବେରିଆନ ହସ୍କି, ସେଣ୍ଟ ବର୍ନାଡ, ଶି ଜୁ, ବିଗଲ୍, ହ୍ବିପେଟ୍, ମିନ୍ ପିନ୍, ଚିଓ୍ବାଓ୍ବା, ଚାଓ ଚାଓ, ଲାସା ଆପ୍ସୋ, ପଶ୍ମି, କାରାଭାନ୍ ହାଉଣ୍ଡ ସମେତ ୩୮ ପ୍ରଜାତିର ୨୮୦ କୁକୁର ଭାଗ ନେଇଥିଲେ। ଚଳିତ ବର୍ଷ ପ୍ରଥମ ଥର ପାଇଁ ଶୋ’ରେ ‘ସିପର୍କି’ ପ୍ରଜାତିର ଏକ କୁକୁର ଭାଗ ନେଇଥିଲା। ଏହି ପ୍ରଜାତିର କୁକୁର ପ୍ରଥମ ଥର ପାଇଁ ଏହି ଶୋ’ରେ ନୁହେଁ ବରଂ ଭାରତରେ ପ୍ରଥମ ଥର ପାଇଁ ଅଂଶଗ୍ରହଣ କରିଥିବାରୁ ଏହା ଉପରେ ସମସ୍ତଙ୍କ ନଜର ରହିଥିଲା। କୋଲକାତା, ବାଙ୍ଗାଲୁରୁ, ଉଟି, ତାମିଲନାଡ଼ୁ, ଛତିଶଗଡ଼, ଆନ୍ଧ୍ରପ୍ରଦେଶ, ଗୁଜୁରାଟ, ମହାରାଷ୍ଟ୍ର ସମେତ ଓଡ଼ିଶାର ଭୁବନେଶ୍ୱର, କଟକ, ବ୍ରହ୍ମପୁର, ରାଉରକେଲା, ବାଲେଶ୍ୱର, ସମ୍ବଲପୁରରୁ କୁକୁରମାନେ ଆସିଥିଲେ। ଭିନ୍ନ ଭିନ୍ନ ପ୍ରଜାତିର ବିଭିନ୍ନ ବର୍ଗରେ ପ୍ରତିଯୋଗିତା ହୋଇଥିଲା। ଚଳିତ ବର୍ଷ କ୍ଲବ୍ ତା’ର ୫୯ ଓ ୬୦ ତମ ଜାତୀୟସ୍ତରୀୟ ଅଲ୍ ବ୍ରିଡ୍ସ ଚମ୍ପିଆନଶିପ୍ ଶୋ’ କରିଥିଲା। ଏଥିରେ ସ୍ବେଡେନ୍ରୁ ଇଭା ଲିଲ୍ଜେକ୍ଭିସ୍ତ ଓ ଲାଟଭିଆରୁ ରିତା ଖଡିକେ ସ୍କାଡିନା ବିଚାରକ ଭାବେ କାର୍ଯ୍ୟ ତୁଲାଇଥିଲେ। ବାଙ୍ଗାଲୋରର ରିତେଶ ମିତ୍ତଲଙ୍କ ଜର୍ମାନ ସେଫର୍ଡ ‘ଜାମ୍ପି’ ଉଭୟ ୫୯ତମ ଓ ୬୦ତମ ଜାତୀୟସ୍ତରୀୟ ଅଲ୍ ବ୍ରିଡ୍ସ ଚାମ୍ପିୟନଶିପ୍ ଶୋ’ରେ ବେଷ୍ଟ ଇନ୍ ଶୋ’ ଭାବେ ପୁରସ୍କୃତ ହୋଇଥିଲା। କୋଲକାତାର ଦୀପଶିଖା ଆଦିତ୍ୟଙ୍କ ଡୋବରମ୍ୟାନ ‘ଜାଇଲା’ ୫୯ତମ ଜାତୀୟସ୍ତରୀୟ ଅଲ୍ ବ୍ରିଡ୍ସ ଚାମ୍ପିୟନଶିପ୍ ଶୋ’ ଏବଂ କୋଲକାତାର ସୌରଭ ଚୌଧୁରୀଙ୍କ ଲାବ୍ରାଡର ‘ଲାବ୍ରାମାରିନ’ ଦ୍ୱିତୀୟ ସ୍ଥାନ ଅଧିକାର କରିଥିଲା। ଶୋ’ ସମ୍ପର୍କରେ କ୍ଲବ୍ର ଅବୈତନିକ ସମ୍ପାଦକ ସୁବ୍ରତ ପୃଷ୍ଟି କୁହନ୍ତି, ପ୍ରତିବର୍ଷ ପରି ଏଥର ମଧ୍ୟ ଶୋ’ ଭଲରେ ସମ୍ପାଦିତ ହୋଇଛି। ଆମେ ଯାହ ଆଶା କରିଥିଲୁ ତାହା ହୋଇଛି। ଗତବର୍ଷଠାରୁ ଏଥର ଅଧିକ ପ୍ରଜାତିର ସଂଖ୍ୟକ କୁକୁର ଭାଗ ନେଇଥିଲେ।
