ଲାଠୋର, ୧୧ା୬(ଡି.ଏନ.ଏ.): ବଲାଙ୍ଗୀର ଜିଲା ତୁରେକେଲା ବ୍ଲକ ଅଧିନ ବାଞ୍ଜିପାଲି ଗଁାର ସୁରେନ୍ଦ୍ର ତାଣ୍ଡି। ଭିନ୍ନକ୍ଷମ ସୁରେନ୍ଦ୍ର ଝନେ ସ୍ନାତକ। ଘରେ ରୁଗୀଆ ମା’ ସଂଗେ ଦୁଇ ବହେନ୍ ଆର ଗୁଟେ ଭାଇ ରହୁଛନ୍। ବାପା ବନେ ବଛରକେତେ ହେଲା ଆରପାରକେ ଚାଲିଯାଇଛନ୍। ଘରେ ଆର କେହି ରୁଜଗାରିଆ ଲୋକ୍ ନଁାଇଁନ। ପରିବାରକେ ମାସିକ ମିଲୁଛେ ଦିବ୍ୟାଙ୍ଗ ଭତା ବାବ୍ଦେ ୭ଶହ, ମା’ର ଭତା ୫ଶହ ଆର ୩୫ କେ.ଜି. ଚାଉଲ। ଏତ୍କିରେ ପରିବାରଟା ଚଲ୍ଲାବେଲେ ଭିଡ଼ ହେଇଯାଉଛେ। ଇଆଡ଼େ ସରକାରୀ ଚାକିରୀ ଖଁଡ଼େର ଲାଗି ସୁରେନ୍ଦ୍ର ଭିନେ ଭିନେ ଅଫିସ କିଁଦ୍ରି ନିରାଶ ହେଇଛନ୍। ବରଗଡ଼ ଜିଲା ବିଜେପୁର ବ୍ଲକ ଅଂଚଲର ଝନେ ସାମାଜିକ କରମୀ ସୁରେନ୍ଦ୍ରକଁର ଅବସ୍ତା ଦେଖି ତାକର ଗୁଟେ ଭିଡିଓ ବନାବାର ସଂଗେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକକୁଁ ଟ୍ବିଟର ଜରିଆରେ ଜନେଇଥିଲେ। ପ୍ରଧାନମନ୍ତ୍ରୀକଁର ଦପ୍ତରରୁ କିଛି ଉତର ନାଇଁ ମିଲିଥିଲାବେଲେ ମୁଖ୍ୟମନ୍ତ୍ରୀକଁର ଦପ୍ତରରୁ ବଲାଙ୍ଗୀର ଜିଲାପାଲକୁଁ ଘଟନାର ତଦଁତ୍ କରି ପଦକ୍ଷେପ ନେବାକେ ନିରଦେଶ ଆସିଛେ। ଇ ନିରଦେଶ ଅନ୍ସାରେ ଟିଟିଲାଗଡ଼ ଉପଜିଲାପାଳକଁର କାର୍ଯ୍ୟାଳୟର ଚିଠି ନଂ.୧୯୩୧/ତା.୭ା୬ା୨୦୧୯ରେ ରିପୋର୍ଟ ଦେଇଥିଲେ। ରିପୋର୍ଟରେ ସୁରେନ୍ଦ୍ରକୁଁ ଭିନେ ଭିନେ ସମିଆରେ ଦିଆଯାଇଥିବାର ସୁବିଧା ସୁଯୋଗ ବାବ୍ଦେ ଲେଖା ରହିଛେ। ସେ କେହେନ୍ସି ଗୁଟେ ସରକାରୀ ଚାକିରି ପାଏଲେ ତାକର ପରିବାର ଚଲେଇପାରତେ ବଲି ଆଶ୍ ରଖିଥିବାର ତଦଁତ୍ କରିଥିବାର କରମଚାରୀମାନେ ରିପୋର୍ଟରେ ଲେଖିଛନ୍। ଏହେଦେ ସୁରେନ୍ଦ୍ରକଁର ଝନେ ବହେନ୍ ସନ୍ତୋଷିନୀ ପକ୍ଷାଘାତରେ ପୀଡ଼ିତ ହେଇ ଘରେ ପଡ଼ିରହିଛନ୍। ଏହେଦେ ବାକି ରହିଲା ସରକାର ସୁରେନ୍ଦ୍ରକୁଁ କେଭେ ରୁଜଗାର ପଁଥା ଦେଉଛନ୍।
