ନୂଆଦିଲ୍ଲୀ,୩୧-୧(ପି.ଟି.): ପାର୍ଲାମେଣ୍ଟର ବଜେଟ ଅଧିବେଶନ ଶୁକ୍ରବାରଠାରୁ ଆରମ୍ଭ ହେଉଥିବାବେଳେ ଶନିବାର ଅର୍ଥମନ୍ତ୍ରୀ ନିର୍ମଳା ସୀତାରାମନ୍ ୨୦୨୦-୨୧ ବର୍ଷ ଲାଗି ବଜେଟ ଉପସ୍ଥାପନ କରିବେ। ବଜେଟ ଉପସ୍ଥାପନର ଦିନକ ପୂର୍ବରୁ ଅର୍ଥାତ୍ ୩୧ ତାରିଖରେ ସରକାର ଚଳିତବର୍ଷର ଅର୍ଥନୈତିକ ସର୍ଭେ ରିପୋର୍ଟ ଉପସ୍ଥାପନ କରିବେ। ଏହା ଉପରେ ସମସ୍ତଙ୍କର ନଜର ରହିବ। କାରଣ ଅର୍ଥନୈତିକ ସର୍ଭେ ରିପୋର୍ଟ ହେଉଛି ବର୍ଷର ଆର୍ଥତ୍କ ପ୍ରଦର୍ଶନର ସବିଶେଷ ତଥ୍ୟ। ବଜେଟ ଅଧିବେଶନକୁ ସୁରୁଖୁରୁରେ ଚଳାଇବା ପାଇଁ ସରକାରଙ୍କ ପକ୍ଷରୁ ଗୁରୁବାର ସର୍ବଦଳୀୟ ବୈଠକ ଡକାଯାଇଥିଲା। ଏଥିରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସବୁ ରାଜନୈତିକ ଦଳଗୁଡ଼ିକର ସହଯୋଗ ଲୋଡ଼ିଥିଲେ। ସରକାର ସବୁ ପ୍ରସଙ୍ଗରେ ଆଲୋଚନା ପାଇଁ ପ୍ରସ୍ତୁତ ବୋଲି ପ୍ରଧାନମନ୍ତ୍ରୀ କହିଛନ୍ତି। ଏହି ଅଧିବେଶନରେ ଆର୍ଥତ୍କ ପ୍ରସଙ୍ଗ ଉପରେ ସର୍ବାଧିକ ଗୁରୁତ୍ୱ ଦିଆଯିବା ସହ ସାମ୍ପ୍ରତିକ ଅନ୍ତର୍ଜାତୀୟ ସ୍ଥିତିରୁ ଭାରତ କିପରି ଲାଭ ଉଠାଇବ, ତାହା ଉପରେ ଗୁରୁତ୍ୱ ଦେବାକୁ ପ୍ରଧାନମନ୍ତ୍ରୀ କହିଥିବା ବୈଠକ ଶେଷରେ ସଂସଦୀୟ ବ୍ୟାପାର ମନ୍ତ୍ରୀ ପ୍ରହଲ୍ଲାଦ ଜୋଷୀ ଖବରଦାତାମାନଙ୍କୁ ସୂଚନା ଦେଇଛନ୍ତି। ସର୍ବଦଳୀୟ ବୈଠକରେ ୨୬ଟି ଦଳର ନେତା ଯୋଗ ଦେଇଥିଲେ।
ବିରୋଧୀ ଦଳଗୁଡ଼ିକ ସିଏଏ ବିରୋଧୀ ଆନ୍ଦୋଳନ ସମେତ ଦେଶରେ ଦେଖାଦେଇଥିବା ଆର୍ଥତ୍କ ମାନ୍ଦାବସ୍ଥା, ବେରୋଜଗାରି ବୃଦ୍ଧି ଆଦି ପ୍ରସଙ୍ଗ ଉଠାଇଥିଲେ। ସରକାର ବିକ୍ଷୋଭକାରୀଙ୍କ ପାଖରେ ନ ପହଞ୍ଚତ୍ବା ଅହଂକାର ବୋଲି ସେମାନେ ଅଭିଯୋଗ କରିଥିଲେ। ଜମ୍ମୁ-କଶ୍ମୀରରେ ଅଟକ ଥିବା ରାଜନେତାମାନଙ୍କୁ ତୁରନ୍ତ ମୁକ୍ତ କରିଦେବାକୁ ସେମାନେ ଦାବି କରିଥିଲେ। ପୂର୍ବତନ ମୁଖ୍ୟମନ୍ତ୍ରୀ ତଥା ନ୍ୟାଶନାଲ କନ୍ଫରେନ୍ସ ନେତା ଫାରୁକ୍ ଅବ୍ଦୁଲ୍ଲାଙ୍କୁ ତୁ୍ରନ୍ତ ମୁକ୍ତ କରାଗଲେ ସେ ଶୁକ୍ରବାରଠାରୁ ପାର୍ଲାମେଣ୍ଟ ଅଧିବେଶନରେ ସାମିଲ ହୋଇପାରିବେ ବୋଲି କଂଗ୍ରେସ ନେତା ଗୁଲାମ ନବୀ ଆଜାଦ କହିଥିଲେ। ଦିଲ୍ଲୀ ବିଧାନସଭା ନିର୍ବାଚନ ପ୍ରଚାର ବେଳେ କେତେଜଣ ଭାଜପା ନେତା ଉତ୍ତେଜନାପୂର୍ଣ୍ଣ ମନ୍ତବ୍ୟ ଦେଉଥିବା ନେଇ କଂଗ୍ରେସ ନେତା ଆନନ୍ଦ ଶର୍ମା ଅଭିଯୋଗ କରିଥିଲେ। ପ୍ରଧାନମନ୍ତ୍ରୀ ଏଥିରେ ହସ୍ତକ୍ଷେପ କରିବାକୁ ସେ ଦାବି କରିଥିଲେ। ନାଗରିକ ବିଶେଷ କରି ସଂଖ୍ୟାଲଘୁଙ୍କୁ ଆଘାତ ଦେଉଥିବା ଆଇନ ସରକାର ଗୃହୀତ କରାଇବା ଉଚିତ ନୁହେଁ ବୋଲି ଅକାଳୀ ଦଳ ନେତା ସର୍ଦ୍ଦାର ବଲଓ୍ବିନ୍ଦର ସିଂ ବୁନ୍ଦର କହିଥିଲେ। ଅଧିକାଂଶ ନେତା ଆର୍ଥିକ ସ୍ଥିତି ସମ୍ପର୍କରେ ଗୃହରେ ଆଲୋଚନା ପାଇଁ ପ୍ରସ୍ତାବ ଦେଇଥିଲେ। ବିରୋଧୀ ଦଳ ନେତାମାନଙ୍କ ବିଭିନ୍ନ ପ୍ରସ୍ତାବକୁ ପ୍ରଧାନମନ୍ତ୍ରୀ ସ୍ବାଗତ କରିଥିଲେ। ବଜେଟ ଅଧିବେଶନ ଏବଂ ନୂଆବର୍ଷ ଆରମ୍ଭରେ ଦେଶର ଅର୍ଥନୀତିକୁ ଆମେ ଯଦି ଉପଯୁକ୍ତ ଦିଶାନିର୍ଦ୍ଦେଶ ଦେଇପାରିବା ତାହା ଦେଶର ସ୍ବାର୍ଥ ପାଇଁ ବହୁତ ଭଲ ହେବ ବୋଲି ସେ କହିଥିଲେ। ଏହା ବ୍ୟତୀତ ଅନ୍ୟ ସବୁ ପ୍ରସଙ୍ଗରେ ଖୋଲା ଆଲୋଚନା ପାଇଁ ସରକାର ପ୍ରସ୍ତୁତ ଅଛନ୍ତି ବୋଲି ମୋଦି କହିଥିଲେ। ବଜେଟ ଉପସ୍ଥାପନ ପରେ ଶନିବାର ବିରୋଧୀ ଦଳଗୁଡ଼ିକର ବୈଠକ ବସି ଅଧିବେଶନରେ ମିଳିତ ରଣନୀତି ସମ୍ପର୍କରେ ନିଷ୍ପତ୍ତି ନେବେ ବୋଲି ଜଣାପଡିଛି।
