ଅନୁଗୋଳ ଅଫିସ, ୧୯।୪- ଦ୍ୱିତୀୟ ପର୍ଯ୍ୟାୟ ନିର୍ବାଚନ ଗୁରୁବାର ଶେଷ ହୋଇଥିବାରୁ ତୃତୀୟ ପର୍ଯ୍ୟାୟ ପାଇଁ ପ୍ରସ୍ତୁତି ଜୋର ଧରିଛି। ଇତିମଧ୍ୟରେ ପ୍ରଚାର ପାଇଁ ପ୍ରାର୍ଥୀଙ୍କ ହାତରେ ଆଉ ମାତ୍ର ୩ ଦିନ ବାକି ରହିଛି। ୨୩ ତାରିଖରେ ଭୋଟ୍ ଗ୍ରହଣ ହେବାକୁ ଥିବାରୁ ବିଭିନ୍ନ ଦଳର ଷ୍ଟାର ପ୍ରଚାରକ ଜିଲାକୁ ଘନ ଘନ ଗସ୍ତ କରୁଛନ୍ତି। ତେବେ ନେତାମାନେ ଏବେ ଗାଁ ମୁହଁା ହୋଇଥିବାରୁ ସହରରେ ସେମାନଙ୍କୁ ସେତେଟା ଦେଖିବାକୁ ମିଳୁନି। ଗୁରୁବାର ବିଜେଡିର ଷ୍ଟାର ପ୍ରଚାରକ ଭାବେ ରାଜ୍ୟ ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପ୍ରଚାରର ମଙ୍ଗ ଧରିଥିଲେ। ସେହିପରି ସନ୍ଧ୍ୟାରେ ବିଜେଡିର ଏକ ଥ୍ରୀ ଡି ପ୍ରଚାର ଗାଡ଼ି ଅନୁଗୋଳରେ ପହଞ୍ଚତ୍ଛି। ସନ୍ଧ୍ୟାରେ ଅନୁଗୋଳ ବସ୍ଷ୍ଟାଣ୍ଡ ଠାରେ ଥିବା ଘୋଡ଼ା ଛକ ଠାରେ ଉକ୍ତ ଥ୍ରୀ ଡି ଗାଡ଼ି ପ୍ରଚାର କରୁଥିବା ଦେଖିବାକୁ ମିଳିଛି।
ଅନୁଗୋଳରେ ରାଜନୀତି ମଇଦାନକୁ ଓହ୍ଲାଇଥିବା ୩ ପ୍ରମୁଖ ଦଳର ନେତାମାନେ ଏବେ ନିଜ ନିର୍ବାଚନମଣ୍ଡଳୀର ବିଭିନ୍ନ ଗାଁରେ ପ୍ରଚାର ଚଳାଇଛନ୍ତି। ଘନ ଘନ ନିର୍ବାଚନୀ ବୈଠକ ସହ ଶୋଭାଯାତ୍ରା କରି ଭୋଟରଙ୍କୁ ଭେଟୁଛନ୍ତି। ବିଭିନ୍ନ ଉନ୍ନତିକର କାର୍ଯ୍ୟ କରିବାକୁ ପ୍ରତିଶ୍ରୁତିମାନ ଦେଉଛନ୍ତି। ଗୁରୁବାର ସନ୍ଧ୍ୟାରେ ବିଜେଡି ପାର୍ଟି କାର୍ଯ୍ୟାଳୟରେ ପହଞ୍ଚିଥିବା ଥ୍ରୀ ଡି ପ୍ରଚାର ଗାଡ଼ି ସହରର ବିଭିନ୍ନ ସ୍ଥାନକୁ ଯାଇ ପ୍ରଚାର କରିଛି। ଉକ୍ତ ଗାଡ଼ିରେ ଏକ ବଡ଼ ଏଲଇଡି ଲାଗିଥିବାବେଳେ ସାଉଣ୍ଡ ସିଷ୍ଟମ ମଧ୍ୟ ରହିଛି। ବିଜେଡି ସରକାରଙ୍କ ବିଭିନ୍ନ ଜନ ହିତକର ଯୋଜନା ସମ୍ପର୍କରେ ଏହାଦ୍ୱାରା ଲୋକଙ୍କୁ ଅବଗତ କରାଯାଉଥିବାବେଳେ ଦଳୀୟ ପ୍ରାର୍ଥୀଙ୍କୁ ଭୋଟ ଦେଇ ବିଜୟୀ କରିବାକୁ ମଧ୍ୟ ନିବେଦନ କରାଯାଉଛି। ସେହିପରି ଭାଜପା ପକ୍ଷରୁ ମଧ୍ୟ ପ୍ରଚାର କାର୍ଯ୍ୟ ଜାରି ରହିଛି। ଭାଜପା ପ୍ରାର୍ଥୀ ବିଭିନ୍ନ ଗାଁରେ ପ୍ରଚାର କରୁଥିବାଳେ ଶୁକ୍ରବାର ଠାରୁ ସହରାଞ୍ଚଳରେ ପ୍ରଚାର ଜମାଇବେ ବୋଲି ସୂଚନା ମିଳିଛି। ଏପରି କି ଏକ ବଡ଼ ଧରଣର ରୋଡ ଶୋ କାର୍ଯ୍ୟକ୍ରମ ରହିଥିବା ଦଳୀୟ କାର୍ଯ୍ୟାଳୟ ପକ୍ଷରୁ ସୂଚନା ମିଳିଛି। କିନ୍ତୁ ଷ୍ଟାର ପ୍ରଚାରକରେ କଂଗ୍ରେସ ପଛରେ ପଡ଼ିଛି। ଅନୁଗୋଳକୁ କେହି ଜଣେ ବି ହେଲେ ଦଳର ଷ୍ଟାର ପ୍ରଚାରକ ଆସିନାହାନ୍ତି। ଦଳୀୟ କାର୍ଯ୍ୟାଳୟ ପକ୍ଷରୁ ମିଳିଥିବା ସୂଚନା ମୁତାବକ ଗୁରୁବାର ବିଳମ୍ବିତ ରାତିରେ ଷ୍ଟାର ପ୍ରଚାରକ ପହଞ୍ଚିବେ। ଅନ୍ୟପକ୍ଷରେ ସହରାଞ୍ଚଳରେ ନିର୍ବାଚନୀ ପ୍ରଚାର ନ ହେବାରୁ ଯୁବ ଭୋଟରଙ୍କ ମଧ୍ୟରେ ଅସନ୍ତୋଷ ଦେଖିବାକୁ ମିଳିଛି।
