ଭୁବନେଶ୍ୱର, ୧।୧୦(ବ୍ୟୁରୋ): ରେଳ ଆବର୍ଜନାରୁ ବାହାରିବ ଇନ୍ଧନ (ଲାଇଟ୍ ଡିଜେଲ ଅଏଲ୍)। ଭାରତୀୟ ରେଳପଥ ପକ୍ଷରୁ ଭୁବନେଶ୍ୱରରେ ସ୍ଥାପନ ହେବାକୁ ଯାଉଛି ପ୍ରଥମ ପ୍ଲାଣ୍ଟ୍। ସୋମବାର ମଞ୍ଚେଶ୍ୱର ରେଳଡବା ମରାମତି କାରଖାନା ପରିସରରେ ପୂର୍ବତଟ ରେଳପଥର ମହାପ୍ରବନ୍ଧକ ବିଦ୍ୟା ଭୂଷଣ ‘ସ୍କ୍ରାପ୍ ଟୁ ଏନର୍ଜି ପ୍ଲାଣ୍ଟ’ ପାଇଁ ଶିଳାନ୍ୟାସ କରିଛନ୍ତି। ଏଥିପାଇଁ ମୋଟ ବ୍ୟୟ ଅଟକଳ ୨ କୋଟି ରହିଥିବାବେଳେ ଆସନ୍ତା ବର୍ଷ ଜାନୁଆରୀ ସୁଦ୍ଧା କାର୍ଯ୍ୟ ସାରିବାକୁ ଲକ୍ଷ୍ୟ ରଖାଯାଇଛି। ଏଠାରେ ଦୈନିକ ୫୦୦ କିଲୋଗ୍ରାମ ଆବର୍ଜନାରୁ ଶକ୍ତି ଉତ୍ପାଦନ କରିବା କ୍ଷମତା ରହିବ। ପ୍ଲାଣ୍ଟ ପରିଚାଳନା ପାଇଁ ବାର୍ଷିକ ୨୫ ଲକ୍ଷ ଟଙ୍କା ଖର୍ଚ୍ଚ କରାଯିବ ଓ ୧୨ ଲକ୍ଷ ଟଙ୍କା ଆୟ କରିହେବ ବୋଲି ରେଳପଥ ପକ୍ଷରୁ କୁହାଯାଇଛି।
ମଞ୍ଚେଶ୍ୱର ରେଳଡବା କାରଖାନା ଓ ଭୁବନେଶ୍ୱର ମୁଖ୍ୟ ରେଳ ଷ୍ଟେଶନ ନିକଟ କୋଚିଂ ଡିପୋରୁ ମାତ୍ରାଧିକ ଅଣଲୌହ ଓ ଧାତବ ସାମଗ୍ରୀ (ସ୍କ୍ରାପ୍) ନିଷ୍କାସିତ ହୋଇଥାଏ। ବିକଳ୍ପ ବ୍ୟବସ୍ଥା ନ ଥିବାରୁ ଏସବୁ ଆବର୍ଜନାକୁ ମାଟିରେ ପୋତିଦିଆଯାଇଥାଏ। ଏଥିଯୋଗୁ ପରିବେଶଜନିତ କ୍ଷତି ହେଉଥିବାରୁ ରେଳପଥର ଚିନ୍ତା ବଢ଼ିଥିଲା। ଏହି ଆବର୍ଜନାରୁ ଇନ୍ଧନ ଉତ୍ପାଦନ କରିବାକୁ ଯୋଜନା ଆରମ୍ଭ ହୋଇଥିଲା। ଉନ୍ନତ ଜ୍ଞାନକୌଶଳ ବ୍ୟବହାର କରି ‘ପଲିକ୍ରାକ’ ପଦ୍ଧତିରେ ଏଠାରେ ଇନ୍ଧନ ଉତ୍ପାଦନ ହେବ। ଏହାକୁ ବିଶ୍ୱର ପ୍ରଥମ ବିଷମ ଉତ୍ପ୍ରେରକ ପ୍ରକ୍ରିୟା (ହେଟ୍ରୋଜେନସ୍ କାଟାଲିଟିକ୍ ପ୍ରୋସେସ୍) କୁହାଯାଉଛି। ଏହି ପ୍ରଣାଳୀରେ ବର୍ଜ୍ୟବସ୍ତୁକୁ ସିଧାସଳଖ ପ୍ରକ୍ରିୟାକରଣ କରାଯାଇ ୨୪ ଘଣ୍ଟା ଭିତରେ ଇନ୍ଧନ ସୃଷ୍ଟି କରାଯାଇପାରିବ। ଏହା ଏକ ସଂଲଗ୍ନ ବା ନିବୁଜ ୟୁନିଟ ହୋଇଥିବାରୁ ଧୂଳିଜନିତ କୌଣସି ପ୍ରଦୂଷଣର ଆଶଙ୍କା ନାହଁି। ଏହି ପ୍ରକ୍ରିୟାରେ ସୃଷ୍ଟି ହେଉଥିବା ଗ୍ୟାସ୍କୁ ପୁନଃ ବ୍ୟବହାର କରାଯାଇ ଖର୍ଚ୍ଚ କାଟ କରାଯିବ। ଆବଶ୍ୟକ ସୁରକ୍ଷା ବ୍ୟବସ୍ଥା ସହ ପ୍ଲାଣ୍ଟ୍ ୟୁନିଟ୍କୁ ଅଣକୁଶଳୀ କାରିଗର ପରିଚାଳନା କରିପାରିବେ। ଏହା ସମ୍ପୂର୍ଣ୍ଣ ସ୍ବୟଂଚାଳିତ ହୋଇଥିବାରୁ କମ୍ ମାନବ ସମ୍ବଳ ଆବଶ୍ୟକ। ଏହି ପ୍ରକ୍ରିୟାରେ ଉର୍ଜା ଉତ୍ପାଦନ ପାଇଁ ସ୍ବଳ୍ପ ଇନ୍ଧନ ବ୍ୟବହାର ହୁଏ। ଏହି ପ୍ଲାଣ୍ଟ ପାଇଁ ଭୁବନେଶ୍ୱର ରେଳ ଷ୍ଟେଶନ ନିକଟ କୋଚିଂ ଡିପୋ ଓ ରେଳ ଡବା କାରଖାନା ଫିଡର ଭାବେ କାର୍ଯ୍ୟ କରିବେ ବୋଲି ରେଳପଥ ପକ୍ଷରୁ କୁହାଯାଇଛି।
