ମହାକାଳପଡ଼ା,୪।୯(ଡି.ଏନ.ଏ.): ମହାକାଳପଡା ବ୍ଲକ ଅଧୀନ ବିଜୟ ନଗର-ଓରତ ମୁଖ୍ୟ ପୂର୍ତ୍ତ ରାସ୍ତା ନିର୍ମାଣ ବିଳମ୍ବ ପ୍ରତିବାଦରେ ସ୍ଥାନୀୟ ଓଳିଆ ଗ୍ରାମରେ ଲୋକମାନେ ଟାୟାର ଜାଳି ରାସ୍ତା ରୋକ କରିଛନ୍ତି। ଯାହା ଫଳରେ ବସ, ଟ୍ରକ, ବାଇକ, ଜରୁରୀ କାଳୀନ ସେବା ଗାଡି ସମେତ ପଥଚାରି ଯାତାୟତରେ ସମସ୍ୟା ହେଉଛି। ମିଳିଥିବା ସୁଚନା ଅନୁସାରେ, ଏହି ପୂର୍ତ୍ତ ବିଭାଗ ଦ୍ୱାରା ପରିଚାଳିତ ଏହି ନିର୍ମାଣ କାର୍ଯ୍ୟକୁ ଠିକାଦାରମାନେ ମନମୁଖୀ ଭାବେ କରୁଛନ୍ତି। ଫଳରେ ଟିକେ ବର୍ଷା ହେଲେ କାଦୁଅ ପାଣି ପଚର ପଚର ହେଉଥିବା ନେଇ ଅସନ୍ତୋଷ ଦେଖିବାକୁ ମିଳିଛି। ଏ ସମ୍ପର୍କରେ କେନ୍ଦ୍ରାପଡା ପୂର୍ତ୍ତ ବିଭାଗ ନିର୍ବାହୀ ଯନ୍ତ୍ରୀ ସରୋଜ କୁମାର ନାୟକଙ୍କ ମତାମତ ନିଆଯିବାପରେ ଯେ କହିଥିଲେ, ବର୍ଷା ଯୋଗୁ ନିର୍ମାଣ ବାଧାପ୍ରାପ୍ତ ହେଉଛି। ଦିନେ ଦୁଇ ମଧ୍ୟରେ କାର୍ଯ୍ୟ ଆରମ୍ଭ ହେବ ବୋଲି ଯନ୍ତ୍ରୀ କହିଛନ୍ତି। ରାସ୍ତା ନିର୍ମାଣ ପ୍ରତିବାଦରେ ଓଳିଆ ଗ୍ରାମରେ ରାସ୍ତାରୋକୋ କରାଯାଇଛି।
