ରାଜା, ମ୍ୟାକ୍‌ଗ୍ରା ପ୍ଲେୟର ଅଫ୍‌ ଦି ମନ୍ଥ୍‌
8:14 amSeptember 13, 2022 / 07

ଦୁବାଇ, ୧୩ା୯ (ପି.ଟି.):ଅଷ୍ଟ୍ରେଲିଆର ଟାହଲିଆ ମ୍ୟାକ୍‌ଗ୍ରା ଓ ଜିମ୍ବାଓ୍ବେର ସିକନ୍ଦର ରାଜା ଅଗଷ୍ଟ ମାସ ପାଇଁ ପ୍ଲେୟର ଅଫ୍‌ ଦି ମନ୍ଥ୍‌ ବିବେଚିତ ହୋଇଛନ୍ତି। ଭାରତର ଜେମିମା ରୋଡ୍ରିଗୁଏଜ୍‌ ଏହି ପୁରସ୍କାର ଦୌଡ଼ରେ ପଛରେ ପଡ଼ିଯାଇଛନ୍ତି। ରାଜ୍ୟଗୋଷ୍ଠୀ କ୍ରୀଡ଼ା ସ୍ବର୍ଣ୍ଣ ବିଜୟୀ ଅଷ୍ଟ୍ରେଲିଆ ଦଳର ଦୁଇ ଖେଳାଳି ବେଥ୍‌ ମୁନି ଓ ଟାହଲିଆ ମ୍ୟାକ୍‌ଗ୍ରାଙ୍କ ସହ ରୋଡ୍ରିଗୁଏଜ୍‌ଙ୍କ ନାମ ମହିଳା ବିଭାଗ ପୁରସ୍କାର ପାଇଁ ସୁପାରିସ ହୋଇଥିଲା। ତେବେ ବର୍ମିଂହାମ୍‌ ରାଜ୍ୟଗୋଷ୍ଠୀ କ୍ରୀଡ଼ାରେ ତାଙ୍କ ଦେଶକୁ ସ୍ବର୍ଣ୍ଣ ଜିତାଇବାରେ ପ୍ରମୁଖ ଭୂମିକା ଗ୍ରହଣ କରିଥିବାରୁ ମ୍ୟାକ୍‌ଗ୍ରା ଏହି ପୁରସ୍କାର ଜିତିପାରିଛନ୍ତି। ଏହାପୂର୍ବରୁ ଅଷ୍ଟ୍ରେଲିଆର ଏଲିସା ହିଲି ଏପ୍ରିଲ୍‌ରେ ପ୍ଲେୟର ଅଫ୍‌ ଦି ମନ୍ଥ୍‌ ପୁରସ୍କାର ପାଇଥିଲେ। ଅଗଷ୍ଟ ମାସରେ ମ୍ୟାକ୍‌ଗ୍ରା ୫୭ ଆଭରେଜ୍‌ରେ ୧୧୪ ରନ୍‌ ସଂଗ୍ରହ କରିଛନ୍ତି। ୧୩.୪୦ ହାରରେ ସେ ୫ ଉଇକେଟ ମଧ୍ୟ ଅକ୍ତିଆର କରିଛନ୍ତି। ଅଷ୍ଟ୍ରେଲିଆ ଦଳରେ ଅନେକ ଷ୍ଟାର ଖେଳାଳି ଅଛନ୍ତି। ହେଲେ ପାକିସ୍ତାନ ବିପକ୍ଷ ମ୍ୟାଚ୍‌ରେ ମ୍ୟାକ୍‌ଗ୍ରା ପ୍ରମୁଖ ଭୂମିକା ଗ୍ରହଣ କରିଥିଲେ। ଏହି ମ୍ୟାଚ୍‌ରେ ସେ ୭୮ ରନ୍‌ କରି ଅପରାଜିତ ରହିଥିବା ବେଳେ ୩ ଉଇକେଟ ଅକ୍ତିଆର କରିଥିଲେ। ଏହି ମାସରେ ମ୍ୟାକ୍‌ଗ୍ରା ଆହୁରି ମଧ୍ୟ ଆଇସିସି ଟି୨୦ ପ୍ଲେୟର ର଼୍ୟାଙ୍କିଙ୍ଗ୍‌ ଅଲ୍‌ରାଉଣ୍ଡର ତାଲିକାରେ କ୍ୟାରିୟର ଶ୍ରେଷ୍ଠ ୧୨ତମ ସ୍ଥାନ ଅଧିକାର କରିଥିଲେ। ଅନ୍ୟପକ୍ଷରେ ଜିମ୍ବାଓ୍ବେର ପ୍ରଥମ ପୁରୁଷ ଖେଳାଳି ଭାବେ ରାଜା ଏକ ଅନ୍ତର୍ଜାତୀୟ ପୁରସ୍କାର ଜିତିବାର ଗୌରବ ଅର୍ଜନ କରିଛନ୍ତି। ପୁରୁଷ କ୍ରିକେଟରେ ଆକ୍ସନରେ ପରିପୂର୍ଣ୍ଣ ଏହି ମାସରେ ୩୬ ବର୍ଷୀୟ ରାଜା ନ୍ୟୁଜିଲାଣ୍ଡ ଅଲ୍‌ରାଉଣ୍ଡର ମିଚେଲ ସାଣ୍ଟନର ଓ ଇଂଲଣ୍ଡର ବେନ୍‌ ଷ୍ଟୋକ୍ସଙ୍କୁ ପଛରେ ପକାଇ ପ୍ଲେୟର ଅଫ୍‌ ଦି ମନ୍ଥ୍‌ ପୁରସ୍କାର ଲାଭ କରିଥିଲେ।