ଜୟପୁର: ଇଚ୍ଛାଶକ୍ତି ଥିଲେ ମଣିଷ ସମସ୍ତ କାର୍ଯ୍ୟ କରିପାରିବ। ଯେତେ ବାଧାବିଘ୍ନ ଆସିଲେ ମଧ୍ୟ ତାକୁ ପଛରେ ପକାଇ ପାର କରିଯିବ। ଏପରି କିଛି କରିଛନ୍ତି ରାଜସ୍ଥାନର ଜଣେ ମହିଳା। ପ୍ରିୟା ସିଂ ଥାଇଲାଣ୍ଡର ଇଣ୍ଟର ନ୍ୟାଶନାଲ ବଡି ବିଲ୍ଡିଂ ଚାମ୍ପିୟନ୍ଶିପ୍ରେ ଜିତି ଦେଶର ନାମ ଉଚ୍ଚା କରିଛନ୍ତି। ଏଥିସହ ସେ ଅନ୍ୟ ମହିଳାଙ୍କ ପାଇଁ ମଧ୍ୟ ଏକ ପ୍ରେରଣା ପାଲଟିଛନ୍ତି। ପ୍ରିୟାଙ୍କ ୮ ବର୍ଷ ବୟସରେ ବିବାହ ହୋଇଯାଇଥିଲା। ବୈବାହିକ ଜୀବନ ପାଇଁ ଯେପରି ତାଙ୍କ ସ୍ବପ୍ନ ମରି ଯାଇଥିଲା। ସେ ଜଣେ ବଡି ବିଲ୍ଡର ହେବାକୁ ଚାହଁଥିଲେ। ସେ ଏପରି ସମାଜରୁ ଥିଲେ ଯେଉଁଠାରେ କି ବିବାହ ପରେ ମହିଳାଙ୍କୁ ସବୁବେଳେ ଓଢଣି ତଳେ ରହିବାକୁ ପଡୁଥିଲା। ହେଲେ ନିଜ ସ୍ବପ୍ନକୁ ଭାଙ୍ଗିବାକୁ ଦେଇ ନ ଥିଲେ ପ୍ରିୟା । ସେ ଏପରି ପରମ୍ପରାରୁ ବାହାରି ନିଜକୁ ବଡି ବିଲ୍ଡର କରିବାରେ ଲାଗିପଡିଲେ। ଏଥିରେ ତାଙ୍କ ୨ ଝିଅଙ୍କ ସବୁବେଳେ ସହାୟତା ରହିଛି। ସେଥିପାଇଁ ଆଜି ସେ ତାଙ୍କ ଲକ୍ଷ୍ୟସ୍ଥଳରେ ପହଞ୍ଚିପାରିଛନ୍ତି। ସେ ପରିଶ୍ରମ କରି ଇଣ୍ଟର ନ୍ୟାଶନାଲ ବଡି ବିଲ୍ଡିଂରେ ସ୍ବର୍ଣ୍ଣ ପଦକ ଜିତି ରାଜସ୍ଥାନର ପ୍ରଥମ ମହିଳା ବଡି ବିଲ୍ଡର ହୋଇପାରିଛନ୍ତି। ଏଥିସହ ତାଙ୍କୁ ପ୍ରୋ କାର୍ଡ ମଧ୍ୟ ମିଳିଯାଇଛି।
