ବାରିପଦା ଅଫିସ/ଠାକୁରମୁଣ୍ଡା/ ରାଇରଙ୍ଗପୁର,୪ା୧(ଡ଼ି.ଏନ୍.ଏ.)- ମୟୂରଭଞ୍ଜ ଜିଲାରେ ବନ ବିଭାଗ ପକ୍ଷରୁ ଶୁକ୍ରବାର ପକ୍ଷୀ ଗଣନା କାର୍ଯ୍ୟକ୍ରମ ଆରମ୍ଭ ହୋଇଛି। ପକ୍ଷୀଙ୍କ ସଂରକ୍ଷଣ, ପ୍ରଜାତି ଚିହ୍ନଟ ଓ ଗତିବିଧି ଜାଣିବା ପାଇଁ ଏହି ଗଣନା କରାଯାଉଛି। ଶିମିଳିପାଳ ଅଭୟାରଣ୍ୟ ସମେତ ବାରିପଦା, କରଞ୍ଜିଆ ଓ ରାଇରଙ୍ଗପୁରର ବନଖଣ୍ଡର ୬ଟି ବନାଞ୍ଚଳରେ ପକ୍ଷୀ ଗଣନା ଆରମ୍ଭ କରାଯାଇଛି। ବନପାଳ, ପକ୍ଷୀ ଗବେଷକ, ବନ କର୍ମଚାରୀମାନେ ଉପସ୍ଥିତ ରହି ଗଣନା କରିଛନ୍ତି। ଜିଲାର ଦେଉଳି, ବଡ଼ଯୋଡ଼, ପାଉଁଶିଆ, ବାଙ୍କବଳ, ଶୁଲେପଡ଼ା ସମେତ ପ୍ରାୟ ୧୦୦ଟି ଜଳାଶୟରେ ଏହି ଗଣନା କାର୍ଯ୍ୟ ହେଉଛି। ସକାଳ ୬ଟା ୩୦ରୁ ଜଳାଶୟଗୁଡିକରେ ଗଣନା ଆରମ୍ଭ କରାଯାଇଛି। ବାଇନାକୁଲାର ଯୋଗେ ପକ୍ଷୀଙ୍କୁ ଦେଖି ଗଣନା କରାଯାଉଛି।
ସେହିପରି କରଞ୍ଜିଆ ବନଖଣ୍ଡ ଅନ୍ତର୍ଗତ ସାତକୋଶିଆ ରେଞ୍ଜ ଅଞ୍ଚଳର ପକ୍ଷୀ ଗଣନା ଆରମ୍ଭ ହୋଇଛି। ରେଞ୍ଜ ଅଞ୍ଚଳରେ ଥିବା ୩ଟି ସ୍ଥାନରେ ଏହି ଗଣନା କରାଯାଇଛି। ଏନେଇ ରେଞ୍ଜ ଅଧିକାରୀ ପୀତାମ୍ବର ସେଠୀ ସୂଚନା ଦେଇଛନ୍ତି। ପକ୍ଷୀ ଗଣନା କାର୍ଯ୍ୟ ପାଇଁ ବନବିଭାଗ ପକ୍ଷରୁ ୩ଟି ଟିମ ଗଠନ କରାଯାଇଛି। ତରଡ଼ିଆ ବନ୍ଧ ଓ ଶାଳନ୍ଦୀ ନଦୀର ସାତବେଢ଼ିଠାରେ ଏହି ଗଣନା କରାଯାଉଛି। ଗଣନାରେ ମୋଟ ୧୪/୧୫ ପ୍ରକାରର ପକ୍ଷୀଙ୍କୁ ଚିହ୍ନଟ କରାଯାଇଛି। ବିଶେଷ କରି ଗେଣ୍ଡାଳିଅ, ହଂସରାଳି, ପାଣିକୁଆ, କଜଳପାତି, ଶୁଆ ଅଧିକ ସଂଖ୍ୟାରେ ଦେଖା ଯାଇଛନ୍ତି। ଶୁକ୍ରବାର ସୁଦ୍ଧା ମୋଟ ୧୦୩୦ ପକ୍ଷୀ ଥିବାର ଆକୋଳନ କରାଯାଇଛି। ଗତବର୍ଷ ପକ୍ଷୀ ଗଣନାରେ ୯୭୬ଟି ପକ୍ଷୀ ଥିବା ବନବିଭାଗ ଆକଳନ କରିଥିଲା। ଶୁକ୍ରବାର ବର୍ଷା ଯୋଗୁଁ ଗଣନା କାର୍ଯ୍ୟ ବନ୍ଦ ରହିଛି। ଗଣନା କାର୍ଯ୍ୟରେ ଫରେଷ୍ଟର କେଦାରନାଥ ବାରିକ, ଫରେଷ୍ଟ ଗାର୍ଡ ସମୀର ମହାନ୍ତି, ଯୋଗେଶ୍ୱର କୁଡି ,ନଳିନୀ ମହାନ୍ତ, ଲୋକନାଥ ରାଉତ, ଆଶିଷ ବେହେରା, ମକରଧ୍ୱଜ ନାୟକ, ଗଦାଧର ବେହେରାଙ୍କ ସମେତ ଟିପିଏଫ କର୍ମକର୍ତ୍ତାମାନେ ସାମିଲ ଥିଲେ।
