ଗୋପାଳପୁର,୧୧ା୨-ଗୋଳନ୍ଥରା ଥାନା ମେଣ୍ଢରାଜପୁର ଛକରେ ସିଲ୍କ ସିଟି ବସ୍ ୧୧ କେଭି ବିଦ୍ୟୁତ୍ ତାର ସଂସ୍ପର୍ଶରେ ଆସିବାରୁ ରବିବାର ୧୦ ଜଣଙ୍କ ମୃତ୍ୟୁ ଘଟିଥିଲା। ସୋମବାର ଅପରାହ୍ନରେ ଚିକିଟି ବିଧାୟିକା ଉଷା ଦେବୀ, ବ୍ଲକ ଅଧ୍ୟକ୍ଷା ଏମ.ପଦ୍ମାବତୀ, ତହସିଲ ଓ ବ୍ଲକ ପ୍ରଶାସନର ଅଧିକାରୀମାନେ ଚିକିଟି ବ୍ଲକ ଡଙ୍କଲପାଡୁ ଗ୍ରାମରେ ପହଞ୍ଚତ୍ଥିଲେ। ସେଠାରେ ମୃତକଙ୍କ ପରିବାର ସଦସ୍ୟଙ୍କୁ ଭେଟି ସରକାରଙ୍କ ପକ୍ଷରୁ ସମସ୍ତ ସହଯୋଗ ଯୋଗାଇ ଦିଆଯିବ। ଏଥିସହ ପ୍ରତ୍ୟେକ ମୃତକଙ୍କ ପରିବାରକୁ ରେଡକ୍ରସ ପାଣ୍ଠିରୁ ୧୦ ହଜାର ଟଙ୍କା ପ୍ରଦାନ କରାଯିବ ବୋଲି କହିଥିଲେ। ଚିକିଟି ଭାରପ୍ରାପ୍ତ ଗୋଷ୍ଠୀ ଶିକ୍ଷାଧିକାରୀ କୋରେଶୁ ସେଠୀ ମୃତ ଛାତ୍ର ଦେବରାଜୁ ଓ ଛାତ୍ରୀ ସନ୍ତୋଷିନୀ ସାହୁଙ୍କ ପରିବାରକୁ ଗୁରୁ-ଛାତ୍ର କଲ୍ୟାଣ ପାଣ୍ଠିରୁ ୫ ହଜାର ଟଙ୍କା ପ୍ରଦାନ କରିଥିଲେ। ସେହିପରି ୟୁ.ସନ୍ନ୍ୟାସୀ ରେଡ୍ଡୀ କହିଛନ୍ତି, ପୁଅ ଅଶୋକର ନିର୍ବନ୍ଧ ପାଇଁ ଚିକରଡ଼ା ଯାଉଥିବା ବସଟି ବିଦ୍ୟୁତ୍ ତାର ସଂସ୍ପର୍ଶରେ ଆସି ୧୦ ଜଣଙ୍କ ଜୀବନ ଚାଲିଗଲା, ଯାହାକୁ ନେଇ ଏବେ ଗ୍ରାମରେ ଶୋକର ଛାୟା ଖେଳିଯାଇଛି। ମଙ୍ଗଳବାର ପୁଅର ବାହାଘର ହୋଇଥାନ୍ତା। କିନ୍ତୁ ଏଭଳି ଘଟଣା ପରେ ବିବାହକୁ ନେଇ ଅନିଶ୍ଚିତତା ରହିଛି। ସେହିପରି ସିଏଚ୍ ଡିଲେଶ୍ୱର ରେଡ୍ଡୀଙ୍କ କହିବା ପ୍ରକାରେ ଅଞ୍ଚଳବାସୀ ହରେଇଥିବା ଲୋକଙ୍କୁ ଝୁରୁଛନ୍ତି। ସରକାର ଯେଉଁ ଆର୍ଥିକ ସହାୟତା ଘୋଷଣା କରିଛନ୍ତି, ତା’ଠାରୁ ଅଧିକ ସହାୟତା ରାଶି ଦେଇଥିଲେ ମୃତକଙ୍କ ପରିବାରବର୍ଗ ଉପକୃତ ହୋଇପାରନ୍ତେ ଓ ଘଟଣାର ଠିକ ତଦନ୍ତ କରି ଦୋଷୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି କରିଥିଲେ। ବିଦ୍ୟୁତ୍ ବିଭାଗର ଖାମଖିଆଲ ନୀତି ଯୋଗୁ ଏଭଳି ଘଟଣା ଘଟିଥିବା ଏନ. ଡମ୍ବୁରୁ ରେଡ୍ଡୀ କହିବା ସହ ମୃତକଙ୍କ ପରିବାରକୁ ୧୦ ଲକ୍ଷ ଟଙ୍କା ସହାୟତା ରାଶି ପ୍ରଦାନ କରିବାକୁ ସେ ଦାବି କରିଛନ୍ତି।
