ପୁଚୁକି ଗାଲି ଗୀତରେ ପିଲା ବେଳେ ମୁଁ ଅନେକ ଡ୍ୟାନ୍ସ କରିଛି। ଛୋଟ ବେଳୁ ଏମିତି କିଛି ଗୀତ ଦେଖିଦେଖି ହିରୋ ହେବାର ନିଶା ମୋ ମୁଣ୍ଡକୁ ଢ଼ୁକିିଥିଲା। ସିଧାସଳଖ କହିବାକୁ ଗଲେ ଓଲିଉଡ଼ର ସୁପର୍ଷ୍ଟାର ସିଦ୍ଧାନ୍ତ ମହାପାତ୍ର ତଥା ମୁନା ଭାଇଙ୍କ ଯୋଗୁଁ ମୋର ଅଭିନେତା ହେବାର ଆଶା ସୃଷ୍ଟି ହୋଇଛି। ଥିଏଟରରେ କାମ କରୁ କରୁ ଓଲିଉଡ଼ ଜଗତରେ ପ୍ରବେଶ କରିଗଲି। ହେଲେ ମୁନା ଭାଇଙ୍କ ସହ ଦିନେ କାମ କରିବାର ସୁଯୋଗ ପାଇବି ବୋଲି ସ୍ବପ୍ନରେ ବି ଭାବି ନଥିଲି। ପ୍ରଥମ ଚଳଚ୍ଚିତ୍ର ‘କଥା ଦେଲି ମଥା ଛୁଇଁ ’ପରେ କିଛି ଭଲ ପ୍ରୋଜେକ୍ଟ ମିଳି ନ ଥିଲା। ଦିନେ ହଠାତ୍ ଫୋନ ଆସିଲା ନିର୍ଦ୍ଦେଶକ ବବି ଇସ୍ଲାମଙ୍କର। ଚର୍ଚ୍ଚିତ ଛବିରାଣୀ ହତ୍ୟାକାଣ୍ଡକୁ ନେଇ ସିନେମାର କାହାଣୀ ପର୍ଯ୍ୟବସିିତ ବୋଲି କହି ମୋତେ ମୁଖ୍ୟ ଭୂମିକାରେ ଅଭିନୟ କରିବାକୁ ପଡ଼ିବ ବୋଲି ଜଣାଇଥିଲେ। ଏହା ପରେ କହିଥିଲେ, ଫିଲ୍ମରେ ଅନ୍ୟ ଏକ ଭୂମିକା ବି ରହିଛି। ଏହି ଭୂମିକାକୁ ହିରୋ କୁହା ନ ଗଲେ ସୁଦ୍ଧା ଏହା ବହୁ ଗୁରୁତ୍ୱପୂର୍ଣ୍ଣ ଭୂମିକା ଓ ଏଥିରେ ଜଣେ ଭଲ କଳାକାର ଅଭିନୟ କରିବେ। ତାଙ୍କଠାରୁ ଏହା ଜାଣିବା ପରେ ମୁଁ ସ୍ଥିର କରିଥିଲି ଯେ, ଗୋଟିଏ ଫିଲ୍ମରେ ଦୁଇଟି ମୁଖ୍ୟ ଭୂମିକାକୁ ସ୍ଥାନ ଦିଆଯାଉଛି ଅର୍ଥ ମୋ ହିରୋ ଭୂମିକାର ଗୁରୁତ୍ୱ ସେତେ ନ ଥିବ। ଏଣୁ ମନା କରିଦେବା ଭଲ। ହେଲେ ଖବର ପାଇଲି ସେହି ଗୁରୁତ୍ୱପୂର୍ଣ୍ଣ ଭୂମିକାରେ ଅଭିନୟ କରିବେ ଓଲିଉଡ଼ ସୁପରଷ୍ଟାର୍ ସିଦ୍ଧାନ୍ତ ମହାପାତ୍ର। ବହୁତ ଖୁସି ହୋଇଯାଇଥିଲି। ଆଉ ମନା କରିବାର କୌଣସି ଉପାୟ ମୋ ପାଖରେ ନ ଥିଲା। ଶୁଟିଂ ଆରମ୍ଭ ହେଲା। କିଶନନଗରରେ ଗୋଟିଏ ସିନ୍ର ଶୁଟିଂ ଚାଲିଥାଏ ଯେଉଁଥିରେ ମୁନା ଭାଇଙ୍କର ସିନ୍ ମୋ ସହ ଥିଲା। ଏତିକି ଜାଣିଛ,ି ଜଣେ କଳାକାର ସବୁବେଳେ ଶିଖିଥାଏ। ଶିଖିବାର ସମୟ କି ବୟସ କିଛି ନଥାଏ। ସେ ଦିନ ବି ସେମିତି କିଛି ଘଟିଥିଲା। ଶୁଟିଂ ସେଟ୍ରେ ମୁଁ ମୁନା ଭାଇଙ୍କୁ ଭେଟିଲି ଓ ତାଙ୍କ ବ୍ୟବହାର ମୋତେ ବହୁତ ଭଲ ଲାଗିଥିଲା। ମୁଁ ତାଙ୍କଠାରୁ ବୟସରେ ସାନ କିମ୍ବା ଅଭିଜ୍ଞତାରେ କମ୍ ବୋଲି କେବେ ବି ଅନୁଭବ କରିନଥିଲି॥ ସେ ସୁପରଷ୍ଟାର୍ କେମିତି ହୋଇଛନ୍ତି ତାହା ସୁଟିଂର କିଛି ଘଣ୍ଟା ଭିତରେ ଜାଣି ଯାଇଥିଲି। ଜଣେ ଭଲ ମଣିଷ, ଭଲ କଳାକାର, ଅଭିନୟର ଯାଦୁକରି ତାଙ୍କ ପାଖରେ ଅଛି। କ୍ୟାମେରା ସମ୍ମୁଖରେ କ’ଣ କଲେ ତାହା ଗ୍ରହଣୀୟ ହୋଇପାରିବ ତାହା ସେ ବହୁତ ଭଲ ଭାବେ ଜାଣନ୍ତି। ଏତିକି କହିବି, ସିଦ୍ଧାନ୍ତ ମହାପାତ୍ର ହେଲେ ଜଣେ ଫୁଲ୍ ପ୍ୟାକେଜ୍ କଳାକାର। ମୁନା ଭାଇଙ୍କ ସହ କାମ କରି ଅନେକ କିଛି ଶିଖିଛି। ମୁନା ଭାଇଙ୍କ ସହ ଅଭିନୟ ଥିଲା ଏକ ଭିନ୍ନ ଅନୁଭବ, ଯାହା ମୋ କ୍ୟାରିୟରକୁ ଆଗକୁ ନେବାରେ ଅନେକ ସାହାଯ୍ୟ କରିବ।
-କୁମାରଶ୍ରୀ
