ଅନୁଗୋଳ ଅଫିସ, ୪।୧୨-ଅନୁଗୋଳ ପୌରାଞ୍ଚଳର ମିଶ୍ରପଡ଼ା ହାଇଟେକ୍ ନର୍ସରୀ ନିକଟରେ ନିର୍ମାଣ ହେବାକୁ ଥିବା ମାଇକ୍ରୋ କମ୍ପୋଷ୍ଟି ସେଣ୍ଟର(ଏମ୍ସିସି)କୁ ବିରୋଧ ଜାରି ରହିଛି। ଉପଜିଲାପାଳଙ୍କ କାର୍ଯ୍ୟାଳୟରେ ମଙ୍ଗଳବାର ଅପରାହ୍ନରେ ଆଲୋଚନା ପାଇଁ ପୂର୍ବରୁ ସମୟ ଧାର୍ଯ୍ୟ କରାଯାଇଥିଲେ ବି ବୈଠକ ହୋଇପାରି ନାହିଁ। ଏପରି କି ଲୋକଙ୍କୁ ସଚେତନ କରିବା ପାଇଁ ପୌର କର୍ତ୍ତୃପକ୍ଷ ପ୍ରସ୍ତୁତ କରିଥିବା ଭିଡିଓକୁ ମଧ୍ୟ କେହି ଦେଖିଲେ ନାହଁି। ଏଠାରେ ଏମ୍ସିସି ନିର୍ମାଣ କରାଯାଇପାରିବ ନାହିଁ ବୋଲି ରୋକ୍ଠୋକ୍ କହିବା ସହ ଅନୁଗୋଳ ପୌରପାଳିକା ଗୋ ବ୍ୟାକ୍ ବୋଲି କହି ପ୍ରତିବାଦ କରିଥିଲେ। ଫଳରେ ଲୋକଙ୍କୁ ସଚେତନ କରିବାକୁ ଯାଇଥିବା ପୌର କର୍ତ୍ତୃପକ୍ଷ ବାଧ୍ୟ ହୋଇ ମିଶ୍ରପଡ଼ାରୁ ଫେରିଆସିଥିଲେ। ଘଟଣା ସମ୍ପର୍କରେ ପୌରପାଳିକା ପକ୍ଷରୁ ଜିଲାପାଳଙ୍କୁ ଲିଖିତ ଭାବେ ଅବଗତ କରିଥିବା ଜଣାପଡ଼ିଛି।
ପ୍ରକାଶ ଯେ, ଅନୁଗୋଳ ପୌରପାଳିକା ପକ୍ଷରୁ ସହରର ୩ଟି ସ୍ଥାନରେ ଏମ୍ସିସି ନିର୍ମାଣ କରାଯିବ। ହୁଲୁରୁସିଂହାରେ ଏହି ନିର୍ମାଣ ଚାଲୁଥିବାବେଳେ ହେମସୁରପଡ଼ା ଦୁର୍ଗାମଣ୍ଡପ ଠାରେ କାର୍ଯ୍ୟ ଆରମ୍ଭ ହୋଇନାହିଁ। ତେବେ ମିଶ୍ରପଡ଼ାରେ ନିର୍ମାଣ ପୂର୍ବରୁ ପୌରପାଳିକାକୁ ଜୋରଦାର ବିରୋଧର ସମ୍ମୁଖୀନ ହେବାକୁ ପଡ଼ିଛି। ଗତ ଗୁରୁବାର ସ୍ଥାନୀୟ ଲୋକେ ନିର୍ମାଣ କାର୍ଯ୍ୟକୁ ବିରୋଧ କରିଥିଲେ। ଏହାପରେ ଶୁକ୍ରବାର ଉପଜିଲାପାଳଙ୍କ କାର୍ଯ୍ୟାଳୟରେ ବୈଠକ ବସିଥିଲା। ଏମ୍ସିସିର କାର୍ଯ୍ୟ ସମ୍ପର୍କରେ ମଙ୍ଗଳବାର ଲୋକଙ୍କୁ ଭିଡିଓ ମାଧ୍ୟମରେ ସଚେତନ କରିବା ସହ ପୋଷ୍ଟର ମାରିବାକୁ ଉକ୍ତ ବୈଠକରେ ନିଷ୍ପତ୍ତି ହୋଇଥିଲା। କିନ୍ତୁ ଆଜି ପୌର କର୍ତ୍ତୃପକ୍ଷ ଦଳ ବଳ ଧରି ହାଇଟେକ୍ ନର୍ସରୀ ନିକଟକୁ ଯାଇଥିଲେ ମଧ୍ୟ ଲୋକଙ୍କ ବିରୋଧର ଶିକାର ହୋଇଥିଲେ। ଏପରି କି କୌଣସି ଆଲୋଚନା କରାଯିବ ନାହିଁ ବୋଲି ଲୋକମାନେ ସିଧାସଳଖ ଭାବେ କହିଥିଲେ। ପୌର କର୍ତ୍ତୃପକ୍ଷ ପାରାଦୀପ ଯାଇ ଆଣିଥିବା ଏମ୍ସିସିର ଭିଡିଓକୁ ମଧ୍ୟ ସ୍ଥାନୀୟ ଲୋକେ ଦେଖିବାକୁ ମନା କରିଦେଇଥିଲେ। ଏ ନେଇ ପୌର ନିର୍ବାହୀ ଅଧିକାରୀ ବିନୋଦ ଚନ୍ଦ୍ର ପଣ୍ଡା କହିଛନ୍ତି, ଲୋକମାନେ ବିରୋଧ କରିବାରୁ ଫେରିଆସିଲୁ। କୌଣସି କଥା ସେମାନେ ଶୁଣିବାକୁ ପ୍ରସ୍ତୁତ ନ ଥିଲେ। ଏ ନେଇ ଜିଲାପାଳଙ୍କୁ ଅବଗତ କରିବୁ। ସେ ଯାହା ପଦକ୍ଷେପ ନେବେ ତାକୁ ଅପେକ୍ଷା କରିବୁ ବୋଲି ପଣ୍ଡା କହିଛନ୍ତି।
