ଭୁବନେଶ୍ୱର, ୧୦।୮(ବ୍ୟୁରୋ): ଭୁବନେଶ୍ୱର ମହାନଗର ନିଗମ (ବିଏମସି) ପକ୍ଷରୁ ଗତ ରବିବାର ୟୁନିଟ-୪ ମାଛ ମାର୍କେଟକୁ ସିଲ କରଯାଇଥିଲା। ଉକ୍ତ ଘଟଣାକୁ ନେଇ ଜୟ ଯବାନ ମତ୍ସ୍ୟ ବ୍ୟବସାୟୀ ସଂଘ ପକ୍ଷରୁ ସୋମବାର ଏକ ବୈଠକ ବସିଥିଲା। ଏଥିରେ ମାର୍କେଟର ସମସ୍ତ ପାଇକାରୀ ଓ ଖୁଚୁରା ବ୍ୟବସାୟୀ ଯୋଗଦେଇଥିଲେ। ଆଗାମୀ ଦିନରେ ସରକାରଙ୍କ ସମସ୍ତ କୋଭିଡ୍ କଟକଣାକୁ ମାନିବା ସହ ଏଭଳି ଘଟଣା ଯେପରି ଆଗକୁ ନ ହେବ ସେଥିପ୍ରତି ଧ୍ୟାନଦେବାକୁ ସଂଘ ପକ୍ଷରୁ ସମସ୍ତଙ୍କୁ ଅବଗତ କରାଯାଇଛି। ଏହାପରେ ସଂଘ ଭୁବନେଶ୍ୱର ମଧ୍ୟ ବିଧାୟକ ଅନନ୍ତ ନାରାୟଣ ଜେନାଙ୍କୁ ଭେଟି ହାଟ ବନ୍ଦ ସମ୍ପର୍କରେ ବିସ୍ତୃତ ସୂଚନା ପ୍ରଦାନ ସହ ଏହାର ଆଗାମୀ ସମସ୍ୟା ସମ୍ପର୍କରେ ଅବଗତ କରାଇଥିଲା। ସେହିଭଳି ହାଟ ଖୋଲିବା ଓ ବିଏମ୍ସିର ସମସ୍ତ କୋଭିଡ୍ କଟକଣାକୁ ପାଳନ କରିବା ସହ ଶଟ୍ଡାଉନରେ କୌଣସି ଦୋକାନ ନ ଖୋଲିବାର ଦାୟିତ୍ୱ ସଂଘ ନିଜ ହାତକୁ ନେବ ବୋଲି ବିଏମ୍ସି କମିଶନରଙ୍କୁ ଭେଟି ସଂଘ ଜଣାଇଛି। ଏଥିସହ ଏକ ଅନୁରୋଧ ପତ୍ର ମଧ୍ୟ ପ୍ରଦାନ କରିଛି।
ସଂଘର ସାଧାରଣ ସମ୍ପାଦକ ଜମ୍ବେଶ୍ୱର ମଲ୍ଲିକ କହିଛନ୍ତି, ବିଏମ୍ସି ପକ୍ଷରୁ ଶୀଘ୍ର ମାଛ ହାଟ ଖୋଲା ନ ଗଲେ ପ୍ରାୟ ୫୦ ଲକ୍ଷ ଟଙ୍କାର ମାଛ ନଷ୍ଟ ହୋଇଯିବ ଓ ୩୦୦ରୁ ଊର୍ଦ୍ଧ୍ୱ ବ୍ୟବସାୟୀ ବ୍ୟାପକ କ୍ଷତି ସହିବେ। ସେ କହିଛନ୍ତି, ଶଟ୍ଡାଉନରେ ସମସ୍ତ ୩୯ ମାଛ ପାଇକାରୀ ଦୋକାନ ବା ଗଦି ବନ୍ଦ ରହିଥିଲା। ଗଦିରେ କାର୍ଯ୍ୟରତ କର୍ମଚାରୀ ଓ ସେମାନଙ୍କ ପରିବାର ସେଠାରେ ରହୁଥିବାରୁ ଶଟ୍ଡାଉନରେ ମାଛର ଯତ୍ନ ପାଇଁ ଟ୍ରେ ଖୋଲି ସେଥିରେ ବରଫ ଦେଉଥିବା ସମୟରେ ବିଏମ୍ସି ପକ୍ଷରୁ ଚଢ଼ାଉ କରାଯାଇଥିଲା। ଅଧିକାରୀମାନେ ମାଛ ଗଦି ଖୋଲା ଥିବା ନେଇ କମିଶନରଙ୍କୁ ଜଣାଇ ମାର୍କେଟକୁ ସିଲ୍ କରିଥିଲେ। ମାତ୍ର ୩ଟି ଗଦି ପାଇଁ ୩୯ଟି ଗଦି ମାଲିକ ଓ ୩୦୦ରୁ ଊର୍ଦ୍ଧ୍ୱ ଖୁଚୁରା ବ୍ୟବସାୟୀ ସମସ୍ୟାରେ ପଡିଛନ୍ତି। ସେହିପରି ୩୯ଟି ଗଦିରେ ପ୍ରାୟ ୫୦୦କର୍ମଚାରୀଙ୍କ ସହିତ ୮୦୦ରୁ ଊର୍ଦ୍ଧ୍ୱ ଛୋଟ ମାଛ (ଉଠା ଦୋକାନୀ) ବ୍ୟବସାୟୀ ବର୍ତ୍ତମାନ ସମୟରେ ବିପଦରେ ପଡ଼ିଛନ୍ତି। କମିଶନରଙ୍କ ଉପସ୍ଥିତିରେ ଗଦି ନଂ ୨୪, ୩୨ ଓ ୩୬ ସିଲ୍ ହେବାକୁ ନିଷ୍ପତ୍ତି ହୋଇଥିଲେ ମଧ୍ୟ ବିଏମ୍ସି ଅଧିକାରୀ ୩୯ଟି ଗଦି ସହ ସମ୍ପୂର୍ଣ୍ଣ ମାଛ ମାର୍କେଟକୁ ସିଲ୍ କରିଦେଲେ ବୋଲି ସେ ମତବ୍ୟକ୍ତ କରିଛନ୍ତି।
ସଂଘ ସଭାପତି ଏସ୍.କେ. ମୁସ୍ତାଫାଙ୍କ ନେତୃତ୍ୱରେ ଏକ ୫ଜଣିଆ ଟିମ୍ ବିଧାୟକଙ୍କୁ ଭେଟି ସଂଘର ଦାବିପତ୍ର ପ୍ରଦାନ ପୂର୍ବକ ସମସ୍ତ ବ୍ୟବସାୟୀଙ୍କ ଦୁଃଖ ଜଣାଇବା ସହ ଏହାର ବିଚାର କରି ହାଟ ଖୋଲିବାର ବ୍ୟବସ୍ଥା କଲେ ବ୍ୟବସାୟୀମାନେ ଉପକୃତ ହେବେ ବୋଲି ଜଣାଇଥିଲେ। ତେବେ ଏ ସମ୍ପର୍କରେ ସେ ବିଏମ୍ସି କମିଶନରଙ୍କ ସହ କଥା ହୋଇ ଆଇନ ଅନୁସାରେ ଯାହା କରିହେବ କରିବେ ଏବଂ ଏଭଳି ସମୟରେ ନିୟମ ଭାଙ୍ଗିବା ଅନୁଚିତ ବୋଲି ବିଧାୟକ ଜେନା ସଂଘର କର୍ମକର୍ତ୍ତାକୁ ପରାମର୍ଶ ଦେଇଥିଲେ।
