ରାୟପୁର,୮।୩: ଛତିଶଗଡ଼ ସରକାରଙ୍କ ‘ବିହାନ’ ଯୋଜନାରେ ସେରିଖେଡିଠାରେ ଥିବା ଏକ ମହିଳା ସ୍ବୟଂ ସହାୟକ ଗୋଷ୍ଠୀ ହୋଲି ପର୍ବ ପାଇଁ ଫୁଲରେ ତିଆରି କରିଛନ୍ତି ପ୍ରାକୃତିକ ରଙ୍ଗ। ଏମାନେ ଏସବୁ ଫୁଲ ମନ୍ଦିର, ବିବାହ ମଣ୍ଡପ, ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ଓ ଘରେ ବ୍ୟବହାର ହୋଇସାରିଥିବା ଫୁଲକୁ ସଂଗ୍ରହ କରି ତିଆରି କରିଥିବା କୁହନ୍ତି। ଉଜାଲା ନାମକ ଏହି ସ୍ବୟଂ ସହାୟକ ଗୋଷ୍ଠୀର ଜଣେ ସଦସ୍ୟ ସକାଳ ୯ଟାରୁ ସନ୍ଧ୍ୟା ୫ଟା ମଧ୍ୟରେ ଏହି ଫୁଲରୁ ପାଖାପାଖି ୩ କିଲୋଗ୍ରାମ ରଙ୍ଗ ତିଆରି କରନ୍ତି ବୋଲି କହିଛନ୍ତି। ମନ୍ଦିର, ବିବାହ ମଣ୍ଡପ, ମୁଖ୍ୟମନ୍ତ୍ରୀଙ୍କ ଘର ଓ ସରକାରୀ କାର୍ଯ୍ୟକ୍ରମରେ ବ୍ୟବହାର କରାଯାଇଥିବା ଫୁଲ ଓ ଏହାର ପତ୍ରକୁ ଶୁଖାଇ ମେଶିନରେ ପ୍ରୋସେସିଂ କରି ଏହି ରଙ୍ଗ ପ୍ରସ୍ତୁତ କରାଯାଉଛି। ୩ମାସ ପୂର୍ବରୁ ଏହି କାମ ଆରମ୍ଭ କରାଯାଇଥିବା ବେଳେ ଏବେ ପ୍ରତିଦିନ ପ୍ରାୟ ସମସ୍ତେ ମିଶି ପ୍ରତିଦିନ ଏହିପରି ୨୦-୨୫ କିଲୋଗ୍ରାମ ରଙ୍ଗ ତିଆରି କରୁଥିବାରୁ ଏହା ବେଶ୍ ଲାଭଦାୟକ ବ୍ୟବସାୟ ବୋଲି ଜଣାପଡିଛି। ପଞ୍ଚାୟତ ଓ ଜିଲା ପ୍ରଶାସନର ସହାୟତାରେ ସେମାନେ ଏହି ରଙ୍ଗ ତିଆରି କରୁଛନ୍ତି। ଏହା କେବଳ ରାୟପୁର ବା ଛତିଶଗଡ଼ ନୁହେଁ ଦେଶର ବିଭିନ୍ନ ଭାଗକୁ ପଠାଯାଉଛି। ଏହାର ଚାହିଦା ମଧ୍ୟ ରହିଛି। ଫୁଲତୋଡାରେ ଆସୁଥିବା କପଡା ଅବା ପ୍ଲାଷ୍ଟିକକୁ ସାବୁନ ପ୍ୟାକିଂରେ ବ୍ୟବହାର କରାଯାଉଛି। ଗତବର୍ଷ ମଧ୍ୟ ଏହି ସ୍ବୟଂ ସହାୟକ ଗୋଷ୍ଠୀ ଦ୍ୱାରା ଦିପାବଳୀ ସମୟରେ ମାଟି ଓ ଗୋବରରେ ତିଆରି ଦୀପର ଚାହିଦା ଥିଲା।
