ବୋଲଗଡ଼,୧୪ା୮(ଡି.ଏନ.ଏ.)-ବୋଲଗଡ଼ ବ୍ଲକ ବାଙ୍କୋଇଦେଶ ପଞ୍ଚାୟତ କାର୍ଯ୍ୟାଳୟଠାରେ ମଙ୍ଗଳବାର ପିପୁଲ୍ସ ଫୋରମ୍ ପକ୍ଷରୁ ଭ୍ରାମ୍ୟମାଣ ମାଗଣା ଚିକିତ୍ସା ଶିବିର ଉଦ୍ଘାଟିତ ହୋଇଯାଇଛି। ଅନ୍ନପୂର୍ଣ୍ଣା ଫାଇନାନ୍ସ ଏଥିରେ ସହଯୋଗ କରିଥିଲା। ଶିବିରରେ ଶିଶୁ ଓ ସ୍ତ୍ରୀ ରୋଗ ଚିକିତ୍ସା ସୁବିଧା ସହ ପରାମର୍ଶ ଦିଆଯାଇଥିଲା। ଭ୍ରାମ୍ୟମାଣ ଭ୍ୟାନ୍ରୁ ମାଗଣାରେ ଔଷଧ ବଣ୍ଟନ କରାଯାଇଥିଲା। ଡା. ସୁବ୍ରତ କୁମାର ମାଝି ଶିଶୁ ଓ ଡା. ପ୍ରିୟାଶା ସ୍ତ୍ରୀ ରୋଗ ଚିକିତ୍ସାଜନିତ ପରାମର୍ଶ ଦେଇଥିଲେ। ଏହି କାର୍ଯ୍ୟକ୍ରମ ଅକ୍ଟୋବର ପର୍ଯ୍ୟନ୍ତ ପ୍ରତି ମାସର ୨ୟ ଓ ୪ର୍ଥ ମଙ୍ଗଳବାର ଅପରାହ୍ନ ୩ଟାରୁ ସନ୍ଧ୍ୟା ୫ଟା ଯାଏ ଜାରି ରହିବ ବୋଲି ଆୟୋଜକଙ୍କ ପକ୍ଷରୁ ସାମାଜିକ କର୍ମୀ ପ୍ରଦୀପ କୁମାର ପଟ୍ଟନାୟକ ସୂଚନା ଦେଇଥିଲେ। ସରପଞ୍ଚ ଜ୍ୟୋତ୍ସ୍ନାମୟୀ ଫତେସିଂହ, ସମିତି ସଭ୍ୟା ପ୍ରଭାତୀ ରାଉତରାୟ, ଶିକ୍ଷାବିତ ଜୟକୃଷ୍ଣ ଫତେସିଂହ, ଅର୍ଥ ଲଗାଣକାରୀ ସଂସ୍ଥା ମ୍ୟାନେଜର ଶିବାଜୀ ଭୋଳ, ଦୟାନିଧି ପତି, ସାମାଜିକ କର୍ମୀ ପ୍ରମୋଦ କୁମାର ମହାପାତ୍ର ଓ ରଞ୍ଜନ ଲେଙ୍କା ପ୍ରମୁଖ କାର୍ଯ୍ୟକ୍ରମରେ ଉପସ୍ଥିତ ଥିଲେ। ବାଙ୍କୋଇ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଶିଶୁ ଏବଂ ସ୍ତ୍ରୀ ରୋଗ ଡାକ୍ତର ନ ଥିବାରୁ ଉକ୍ତ କାର୍ଯ୍ୟକ୍ରମ ବେଶ୍ ସ୍ବାଗତଯୋଗ୍ୟ ହୋଇପାରିଛି।
