ଭଦ୍ରକ ଅଫିସ, ୩।୮ – ବିଧାନସଭାରେ ବିରୋଧୀ ଦଳ ଉପନେତା ତଥା ଭାଜପା ବିଧାୟକ ବିଷ୍ଣୁ ସେଠୀ ମୁସଲିମ୍ ମହିଳାଙ୍କ ଉପରେ ଦେଇଥିବା ମନ୍ତବ୍ୟକୁ ବିରୋଧ କରି ଭଦ୍ରକ କଂଗ୍ରେସ ପକ୍ଷରୁ ନିନ୍ଦା କରାଯାଇଛି। ବିଧାୟକ ସର୍ବ ସମ୍ମୁଖରେ କ୍ଷମା ମାଗନ୍ତୁ ବୋଲି ଦାବି ନେଇ ଶୁକ୍ରବାର ଜିଲା କଂଗ୍ରେସ କାର୍ଯ୍ୟକାରୀ ସଭାପତି ନଳିନୀକାନ୍ତ ମହାନ୍ତିଙ୍କ ନେତୃତ୍ୱରେ ବାଇକ୍ ଶୋଭାଯାତ୍ରା କରାଯାଇଥିଲା। ସ୍ଥାନୀୟ ମଦିନା ମଇଦାନଠାରୁ ଶୋଭାଯାତ୍ରା ବାହାରି ଭଦ୍ରକ ସହର ପରିକ୍ରମା କରି ଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରାଯାଇଥିଲା। ପରେ କଂଗ୍ରେସ କର୍ମକର୍ତ୍ତା ବିଧାୟକ ସେଠୀଙ୍କ କୁଶପୁତ୍ତଳିକା ଦାହ କରିବା ସହ ଜିଲାପାଳଙ୍କୁ ଏକ ଦାବିପତ୍ର ପ୍ରଦାନ କରିଥିଲେ। ଅବ୍ଦୁଲ ମୋକିଦ୍ ଖଁା, ଦେବେନ୍ଦ୍ର ମହାନ୍ତି, ଦିଲୀପ ନାୟକ, ଅସରଫ୍ ଅଲ୍ଲି ଖଁା, ଶେଖ୍ ସମ୍ଦାନୀ, ଶେଖ୍ ଜଫିରୁଦ୍ଦିନ, ଶେଖ୍ ଜୁଲଫୁକାର, ପୀତବାସ ଧଳ, ପୁଷ୍ପରାଜ ଲାହା, ଶେଖ୍ ଫରିୟୁଦ୍ଦିନ୍, ତାହେର ମହମ୍ମଦ ଖଁା ପ୍ରମୁଖ ବିକ୍ଷୋଭରେ ସାମିଲ ଥିଲେ।
