ଲଣ୍ଡନ,୨୯ା୮(ପି.ଟି.): ୟୁରୋପୀୟ ସଂଘ (ଇୟୁ)ରୁ ବ୍ରିଟେନ ଅଲଗା ହେବାର ଶେଷ ତାରିଖ ଅକ୍ଟୋବର ୩୧ ଥିବାବେଳେ ପ୍ରଧାନମନ୍ତ୍ରୀ ବୋରିସ ଜନସନ୍ଙ୍କ ସୁପାରିସକ୍ରମେ ବୁଧବାର ବ୍ରିଟିଶ ପାର୍ଲାମେଣ୍ଟକୁ ଅକ୍ଟୋବର ୧୪ ପର୍ଯ୍ୟନ୍ତ ସ୍ଥଗିତ ରଖିଛନ୍ତି ମହାରାଣୀ ଏଲିଜାବେଥ୍ ଦ୍ୱିତୀୟ। ୧୪ରେ ମହାରାଣୀଙ୍କ ଅଭିଭାଷଣ ସହିତ ପାର୍ଲାମେଣ୍ଟର ନୂଆ ଅଧିବେଶନ ଆରମ୍ଭ ହେବ ଏବଂ ସରକାର ନୂଆ ବିଧେୟକ ଆଗତ କରିବେ। ପ୍ରଧାନମନ୍ତ୍ରୀଙ୍କ ଏଭଳି ପଦକ୍ଷେପକୁ ବିରୋଧୀ ଦଳ କଡ଼ା ସମାଲୋଚନା କରିଛି। ବର୍ତ୍ତମାନର ପାର୍ଲାମେଣ୍ଟ ଅଧିବେଶନର ଦ୍ୱିତୀୟ ପର୍ଯ୍ୟାୟ ସେପ୍ଟେମ୍ବର ୯ରୁ ଆରମ୍ଭ ହେବାକୁ ଥିଲା। ତେବେ ଜନସନ୍ଙ୍କ ଅନୁରୋଧ କ୍ରମେ ରାଣୀ ଏହାକୁ ସ୍ଥଗିତ ରଖିଥିବା ଡାଉନିଂ ଷ୍ଟ୍ରିଟ୍ ପକ୍ଷରୁ କୁହାଯାଇଛି।
ମହାରାଣୀଙ୍କ ପରାମର୍ଶଦାତା କମିଟିର ସଦସ୍ୟ ଥିବା କଞ୍ଜରଭେଟିଭ୍ ପାର୍ଟିର ୩ ଜଣ ସଦସ୍ୟ ତାଙ୍କୁ ବୁଧବାର ସକାଳେ ବାଲମୋରାଲ କାସଲ୍ରେ ଭେଟି ଜନସନ୍ଙ୍କ ତରଫରୁ ଅନୁରୋଧ ଜଣାଇଥିଲେ। ପାର୍ଲାମେଣ୍ଟ ସ୍ଥଗିତ ରହୁଥିବାରୁ ବ୍ରିଟିଶ ଏମ୍ପିମାନଙ୍କୁ ନୂଆ ବିଧେୟକ ଉପରେ ଆଲୋଚନା ପାଇଁ ଖୁବ୍ କମ୍ ସମୟ ମିଳିବ । ଏହା ସମ୍ବିଧାନର ଉଲ୍ଲଂଘନ ବୋଲି ହାଉସ୍ ଅଫ୍ କମନ୍ସର ବାଚସ୍ପତି ଜନ୍ ବେର୍କୋ କହିଛନ୍ତି। ବ୍ରେକ୍ଜିଟ ଉପରେ ଏମ୍ପିମାନଙ୍କୁ ଆଲୋଚନା ପାଇଁ ସୁଯୋଗ ନ ଦେବା ଲାଗି ଏଭଳି ନିଷ୍ପତ୍ତି ନିଆଯାଇଥିବା ସେ ମତ ଦେଇଛନ୍ତି। ସେହିପରି ବିରୋଧୀ ଦଳ ନେତା ଜେରେମି କରବିନ୍ କହିଛନ୍ତି ପାର୍ଲାମେଣ୍ଟ ସ୍ଥଗିତ ନିଷ୍ପତ୍ତି ଗ୍ରହଣୀୟ ନୁହେଁ। ପ୍ରଧାନମନ୍ତ୍ରୀ ବିନା ଚୁକ୍ତିନାମାରେ ବ୍ରେକ୍ଜିଟ ଗୃହୀତ କରାଇବାକୁ ଉଦ୍ୟମ କରୁଛନ୍ତି। ସେ ଯାହା କରୁଛନ୍ତି ତାହା ଗଣତନ୍ତ୍ରକୁ ଧ୍ୱଂସ କରିବା ଲାଗି ଉଦ୍ଦିଷ୍ଟ। ପ୍ରଧାନମନ୍ତ୍ରୀଙ୍କୁ ତାଙ୍କ କାର୍ଯ୍ୟରୁ ବିରତ ରଖିବା ଲାଗି ମଙ୍ଗଳବାର କମନ୍ସରେ ଉଦ୍ୟମ କରାଯିବ ଓ ପରେ ଅନାସ୍ଥା ପ୍ରସ୍ତାବ ଅଣାଯିବ ବୋଲି ଜେରେମି କହିଛନ୍ତି।
ପାର୍ଲାମେଣ୍ଟ ସ୍ଥଗିତ କରିବା ପୂର୍ବରୁ ଜନସନ କ୍ୟାବିନେଟ ବୈଠକ ଡାକି ତାଙ୍କ ଯୋଜନା ସମ୍ପର୍କରେ ଜଣାଇଥିଲେ। ବ୍ରେକ୍ଜିଟକୁ ସର୍ବାଧିକ ପ୍ରାଥମିକତା ଦିଆଯିବ। ଅକ୍ଟୋବର ମଧ୍ୟଭାଗରେ ୟୁରୋପୀୟ ପରିଷଦରେ ଯଦି ନୂଆ ଚୁକ୍ତିନାମା ଆଗତ ହୁଏ ତେବେ ସେ ଏକ ପ୍ରତ୍ୟାହାର ରାଜିନାମା ବିଲ୍ ଆଣିବେ ଏବଂ ଅକ୍ଟୋବର ୩୧ ପୂର୍ବରୁ ଏହାକୁ ଗୃହୀତ କରାଇବା ପାଇଁ ପଦକ୍ଷେପ ନେବେ ବୋଲି କହିଥିଲେ।
