ରୂପ୍ସା, ୨।୧୦(ଡି.ଏନ.ଏ.)-ବାଲେଶ୍ୱର ସଦର ବ୍ଲକ ଅନ୍ତର୍ଗତ କଷାଫଳ ନିକଟ ସମୁଦ୍ର ବେଳାଭୂମିରୁ ବେଆଇନ ଭାବେ ବାଲି ଖନନ କରି ଚୋରାଚାଲାଣ କରାଯାଉଥିବାରୁ ସ୍ଥାନୀୟ ଅଞ୍ଚଳରେ ଉତ୍ତେଜନା ଦେଖାଦେଇଛି। ଜେସିବି ମେଶିନ୍ ଦ୍ୱାରା ବାଲି ଖନନ ହେବା ଯୋଗୁ ସମୁଦ୍ରକୂଳ ଆଡ଼ିବନ୍ଧରେ ଥିବା ଝାଉଁଗଛ ଉପୁଡି ପଡୁଛି। ବାଲି ଚୋରା ଚାଲାଣକାରୀମାନେ ସେଗୁଡ଼ିକୁ କାଟି ବିକ୍ରି କରୁଥିବା ଗ୍ରାମବାସୀ ଅଭିଯୋଗ କରିଛନ୍ତି। ମଙ୍ଗଳବାର ପ୍ରଶାସନ ପକ୍ଷରୁ ସଦର ତହସିଲଦାର ପଞ୍ଚାନନ ପାତ୍ର, ଲଙ୍ଗଳେଶ୍ୱର ଫରେଷ୍ଟର ଜିତେନ୍ଦ୍ର କୁମାର ରାଉତ, ଛାନୁଆ ଆର୍ଆଇ, ସାର୍ଥା ଫାଣ୍ଡି ଅଧିକାରୀ ଡି.ଏମ୍. ସିଂ ପ୍ରମୁଖ ସଦଳବଳ ବେଳାଭୂମିରେ ଚଢ଼ାଉ କରିଥିଲେ। ଉତ୍ତ୍ୟକ୍ତ ଲୋକଙ୍କୁ ବୁଝାଶୁଝା କରିବା ସହ ବାଲି ଖନନ ଓ ଚାଲାଣରେ ବ୍ୟବହୃତ ଜେସିବି ମେଶିନ୍, ଟ୍ରାକ୍ଟର ସହ ୧୦ହଜାର ଟଙ୍କାର ଝାଉଁ କାଠ ଜବତ କରାଯିବା ପରେ ପରିସ୍ଥିତି ଶାନ୍ତ ପଡ଼ିଥିଲା।
ସମୁଦ୍ର ନିକଟ ତରଡ଼ାବୁଧିଆ ଗାଁକୁ ଲାଗିଥିବା ଆଡ଼ିବନ୍ଧ ଗ୍ରାମବାସୀଙ୍କୁ ସୁରକ୍ଷା ଦେଇଥାଏ। ଏହି ସମୁଦ୍ରକୂଳ ବେଳାଭୂମିରେ ପ୍ରତିବର୍ଷ ବାରୁଣୀ ମେଳା ଅନୁଷ୍ଠିତ ହୋଇଥାଏ। ସୋମବାର ଏହି ଆଡ଼ିବନ୍ଧରୁ ଜେସିବି ଯୋଗେ ବାଲି ଉତ୍ତୋଳନ କରି ଟ୍ରାକ୍ଟର ସାହାଯ୍ୟରେ ଶହ ଶହ ଟ୍ରିପ୍ ଚାଲାଣ କରାଯିବା ସହ ଝାଉଁ ଗଛ କାଟି ନିଆଯାଉଥିବା ଗ୍ରାମବାସୀ ମନ୍ମଥ ବେହେରା, ପ୍ରିୟରଞ୍ଜନ ପୃଷ୍ଟି, ମୁକୁନ୍ଦ ଆଦିତ, ପ୍ରଭାତ ବେହେରା ଓ ଶମ୍ଭୁନାଥ ଶାବଳ ପ୍ରମୁଖ ଅଭିଯୋଗ କରିଥିଲେ। ବିଧାୟକ ମଦନମୋହନ ଦତ୍ତ ଏ ସମ୍ପର୍କରେ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ ପାଇଁ ଜିଲାପାଳ କେ. ସୁଦର୍ଶନ ଚକ୍ରବର୍ତ୍ତୀଙ୍କୁ ଜଣାଇଥିଲେ। ଗ୍ରାମର ମହିଳା, ପୁରୁଷ ମିଶି କଟା ଯାଇଥିବା ଝାଉଁଗଛ ଓ ଜେସିବି ମେଶିନ ସହ ଟ୍ରାକ୍ଟରକୁ ଅଟକ ରଖିଥିଲେ। ଜିଲାପାଳଙ୍କ ନିର୍ଦ୍ଦେଶକ୍ରମେ ମଙ୍ଗଳବାର ପ୍ରଶାସନ ପକ୍ଷରୁ ଚଢ଼ାଉ ହେବା ପରେ ଗ୍ରାମବାସୀ ଏହାକୁ ଉଚିତ ପଦକ୍ଷେପ ବୋଲି କହିଛନ୍ତି। ପୂର୍ବରୁ ମଧ୍ୟ ଏହି ବେଳାଭୂମିରୁ ବାରମ୍ବାର ବେଆଇନ ଭାବେ ବାଲି ଖନନ ହେଉଥିବା ଗ୍ରାମବାସୀ ପ୍ରଶାସନଠାରେ ଅଭିଯୋଗ କରିଥିଲେ। ଜଣେ ଜନପ୍ରତିନିଧିଙ୍କ ଇସାରାରେ ଚୋରା ବାଲିଚାଲାଣ ଓ ଝାଉଁଗଛ କଟାଯାଉଥିବା ସୂଚନା ମିଳିଛି।
