ଭୁବନେଶ୍ୱର, ୯।୨(କ୍ରୀଡ଼ା ପ୍ରତିନିଧି)-
ଏଫଆଇଏଚ୍ ହକି ପ୍ରୋ ଲିଗ୍ରେ ବିଶ୍ୱର ନମ୍ବରଓ୍ବାନ ବେଲଜିୟମ ବିପକ୍ଷ ମ୍ୟାଚ ଜିତିବାପରେ ଭାରତ ବିଶ୍ୱ ର଼୍ୟାଙ୍କିଙ୍ଗ୍ର ୪ ନମ୍ବର ସ୍ଥାନକୁ ଉନ୍ନୀତ ହୋଇଛି। ୨୦୦୩ରେ ର଼୍ୟାଙ୍କିଙ୍ଗ୍ ପ୍ରଥା ପ୍ରଚଳନ ହେବାପରେ ଭାରତ ପ୍ରଥମଥରପାଇଁ ଏହି ସଫଳତା ଅର୍ଜନ କରିଛି। ପୂର୍ବରୁ ଭାରତ ବିଶ୍ୱ ର଼୍ୟାଙ୍କିଙ୍ଗ୍ର ୫ ନମ୍ବର ସ୍ଥାନରେ ଥିଲା। ଏହା ପୂର୍ବରୁ ପ୍ରୋ ଲିଗ୍ରେ ଭାରତ ୨ଟି ମ୍ୟାଚରେ ନେଦରଲାଣ୍ଡ୍ସକୁ ହରାଇଥିଲା। ପ୍ରଥମ ମ୍ୟାଚକୁ ଦଳ ୫-୨ ଗୋଲରେ ଜିତିଥିବାବେଳେ ଦ୍ୱିତୀୟ ମ୍ୟାଚ ୩-୩ ସ୍ଥିତିରେ ଶେଷ ହେବାରୁ ଶୁଟ୍ ଆଉଟରେ ଭାରତ ୩-୧ ଗୋଲରେ ବିଜୟ ହାସଲ କରିଥିଲା। ବେଲଜିୟମ ବିପକ୍ଷରେ ଭାରତର ଏହା ୫୦ତମ ବିଜୟ ଥିଲା। ଏହା ଭାରତକୁ ବିଶ୍ୱ ର଼୍ୟାଙ୍କିଙ୍ଗ୍ର ୪ ନମ୍ବର ସ୍ଥାନକୁ ନେଇ ଯାଇଥିବାବେଳେ ଅଲିମ୍ପିକ୍ସ ଚାମ୍ପିୟନ ଆର୍ଜେଣ୍ଟିନା ୫ ନମ୍ବର ସ୍ଥାନକୁ ଖସିଛି।
ଦୁଃଖଦାୟକ
”ଏହା ଏକ କଷ୍ଟସାଧ୍ୟ ମ୍ୟାଚ ଥିଲା। ଘରୋଇ ପରିବେଶରେ ଭାରତ ବିପକ୍ଷରେ ଖେଳିବା ସହଜ ନୁହେଁ। ତେବେ ଆମେ ଅନେକ ସୁଯୋଗ ପାଇଥିଲେ ହେଁ ତାହାକୁ ଗୋଲରେ ପରିଣତ କରି ନ ପାରିବା ଦୁଃଖଦାୟକ ଥିଲା। ଏହି ମ୍ୟାଚରେ ଭାରତୀୟ ଗୋଲକିପର ଚମତ୍କାର ସେଭ୍ କରିଥିଲେ। ଫଳରେ ଆମେ ଅନେକ ପେନାଲ୍ଟି କର୍ନର ପାଇଥିଲେ ହେଁ ମାତ୍ର ଗୋଟିଏ ଗୋଲ ଦେଇ ପାରିଥିଲୁ। ତେବେ ଆମେ ରବିବାର ଆମେ ପରାଜୟର ମଧୁର ପ୍ରତିଶୋଧ ନେଇପାରିବୁ ବୋଲି ଆଶା ରଖିଛୁ“ ବୋଲି ବେଲଜିୟମ ଅଧିନାୟକ ଥୋମାସ ବ୍ରିଲ୍ସ ପ୍ରକାଶ କରିଛନ୍ତି। ଶନିବାର ମ୍ୟାଚରେ ବେଲଜିୟମର ବଲ୍ ପୋଜେସନ ଚମତ୍କାର ରହିଥିଲା। ୩୮ ଥର ଏହି ଦଳ ଭାରତ ସର୍କଲରେ ପ୍ରବେଶ କରିଥିଲା। ୨୪ଟି ଶୁଟ୍ କରିଥିଲେ ହେଁ କେବଳ ଗୋଟିଏ ଗୋଲ ଦେବାକୁ ସକ୍ଷମ ହୋଇଥିଲା।
