ଭୋପାଳ,୩।୨: ମଧ୍ୟପ୍ରଦେଶର ରାଜଧାନୀ ଭୋପାଳର ରାଜା ଭୋଜ ବିମାନବନ୍ଦରର ସୁରକ୍ଷାକୁ ନେଇ ପ୍ରଶ୍ନ ଉଠିଛି। ରବିବାର ଏଠାରେ ବିମାନ ବନ୍ଦରର ପାଚେରି ଡେଇଁ ଜଣେ ଯୁବକ ଭିତରକୁ ପଶିବା ସହ ସେଠାରେ ଥିବା ଏକ ହେଲିକପ୍ଟର ଉପରକୁ ପଥର ମାଡ କରିଥିଲେ। ଫଳରେ ହେଲିକପ୍ଟରର କାଚ ଭାଙ୍ଗି ଯାଇଥିଲା। ଏହାପରେ ଦିଲ୍ଲୀ ଯିବାକୁ ଥିବା ସ୍ପାଇସ ଜେଟର ରନ୍ଓ୍ବେ ଉପରେ ଶୋଇ ଯାଇଥିଲେ। ଏହା ଦେଖିବା ପରେ ପାଇଲଟ ତୁରନ୍ତ ଏଟିଏସ୍କୁ ଏ ସମ୍ପର୍କରେ ସୂଚନା ଦେଇଥିଲେ। ଏହାପରେ ସିଆର୍ପିଏଫ୍ ଟିମ୍ ସେଠାରେ ପହଞ୍ଚି ଉକ୍ତ ଯୁବକଙ୍କୁ ଗିରଫ କରିବା ସହ ତାଙ୍କୁ ପଚରା ଉଚରା କରିଛନ୍ତି। ସୂଚନା ଅନୁଯାୟୀ, ରବିବାର ଅପରାହ୍ନ ପ୍ରାୟ ୫ଟା ବେଳେ ଯୁବକ ଜଣଙ୍କ ବିମାନ ବନ୍ଦର ଭିତରକୁ ପ୍ରବେଶ କରି ହ୍ୟାଙ୍ଗର ପର୍ଯ୍ୟନ୍ତ ପହଞ୍ଚି ଯାଇଥିଲେ।
