ଶ୍ରୀନଗର, ୩୧ା୮ :ଜମ୍ମୁ-କଶ୍ମୀରର ସ୍ବାୟତ୍ତତା ପ୍ରତ୍ୟାହାର ପରେ ଉପତ୍ୟକାବାସୀଙ୍କ ଉପରେ ଭାରତୀୟ ସୁରକ୍ଷା ବଳର ବର୍ବରତା ଓ ନିର୍ଯାତନାକୁ ନେଇ ଅନେକ ଅଭିଯୋଗ ସାମ୍ନାକୁ ଆସିଛି। ଅନେକ ଗ୍ରାମରେ ଲୋକଙ୍କୁ ଲାଠି ଓ କେବୁଲରେ ମାଡ଼ ମରାଯିବା ସହ ବିଦ୍ୟୁତ୍ ଝଟ୍କା ଦିଆଯାଇଥିବା ନେଇ ରିପୋର୍ଟ ପ୍ରକାଶ ପାଇଛି। ଅନେକ ଗ୍ରାମବାସୀ ସେମାନଙ୍କ ଶରୀରର କ୍ଷତ ଦେଖାଇ ସେନା ବିରୋଧରେ ଆଣିଥିବା ଅଭିଯୋଗର ସତ୍ୟାସତ୍ୟ ଅଧିକାରୀମାନଙ୍କଠାରୁ ଜାଣିବା ସମ୍ଭବ ହୋଇନାହିଁ। ଭାରତୀୟ ସେନା ଏହାକୁ ଭିତ୍ତିହୀନ ଓ ନିରାଧାର ବୋଲି ଅଭିହିତ କରିଛି।
କିଛିବର୍ଷ ଧରି ଭାରତ ବିରୋଧୀ ଆତଙ୍କବାଦର କେନ୍ଦ୍ରସ୍ଥଳ ପାଲଟିଥିବା ଦକ୍ଷିଣ କଶ୍ମୀରର କେତେକ ଜିଲାର ଗାଁଗୁଡ଼ିକରେ ସେନା ଓ ପୋଲିସ ପକ୍ଷରୁ ରାତିଅଧିଆ ଚଢ଼ାଉ କରାଯାଇ ଲୋକଙ୍କୁ ପିଟାଯାଉଛି। ଗୋଟିଏ ଗ୍ରାମର ଦୁଇଭାଇ କହିଛନ୍ତି, ଆମକୁ ରାତିରେ ଉଠାଇ ଏକ ସ୍ଥାନକୁ ନିଆଯାଇଥିଲା, ଯେଉଁଠି ଅନ୍ୟ କେତେଜଣ ଗାଁଲୋକ ଏକତ୍ରିତ ହୋଇଥିଲେ। ସୁରକ୍ଷା ବଳ ଆମକୁ ପିଟିବାରେ ଲାଗିଥିଲେ। ଦୋଷ କ’ଣ ବୋଲି ପଚାରିବା ପରେ ବି ସେମାନେ ନ ଶୁଣି କେବୁଲରେ ପ୍ରହାର କରି ପଛପଟେ ଗୋଇଠା ମାରୁଥିଲେ। ଆମେ ମୂର୍ଚ୍ଛା ହୋଇଯିବା ପରେ ଚେତା ଆଣିବା ପାଇଁ ଇଲେକ୍ଟ୍ରିକ୍ ଶକ୍ ଦେଉଥିଲେ। ମାଡ଼ ମାରିବାବେଳେ ଆମେ ଚିତ୍କାର କରିବାରୁ ସେମାନେ ମାଟି ପୂରାଇ ଆମ ମୁହଁ ବନ୍ଦ କରିଦେଇଥିଲେ। ଯନ୍ତ୍ରଣା ଅସହ୍ୟ ହେବାରୁ ଆମେ ସେମାନଙ୍କୁ କହିଥିଲୁ, ଆମକୁ ପିଟନାହିଁ, ଗୁଳିକରି ମାରିଦିଅ। ଆମକୁ ନେଇଯିବା ପାଇଁ ଭଗବାନଙ୍କ ନିକଟରେ ପ୍ରାର୍ଥନା କରୁଥିଲୁ ବୋଲି ପରିଚୟ ପ୍ରଘଟ ନ କରିବା ସର୍ତ୍ତରେ ଦୁଇଭାଇ ଅଭିଯୋଗ ଆଣିଛନ୍ତି। ସାରା ଭାରତରେ ବହୁ ଲୋକ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅନୁଚ୍ଛେଦ ୩୭୦ ଉଚ୍ଛେଦ ନିଷ୍ପତ୍ତିକୁ ପ୍ରଶଂସା କରୁଛନ୍ତି। ଏହାକୁ ଅନେକ ମୁଖ୍ୟସ୍ରୋତ ଗଣମାଧ୍ୟମର ମଧ୍ୟ ସମର୍ଥନ ମିଳିଛି ବୋଲି ବିବିସିରେ ରିପୋର୍ଟ ପ୍ରକାଶ ପାଇଛି।
