ନୂଆଦିଲ୍ଲୀ, ୧୨।୧୨- ପୂର୍ବତନ ଭାରତୀୟ କ୍ରିକେଟର ଯୁବରାଜ ସିଂ ଶନିବାର ୪୦ ବର୍ଷରେ ପଦାର୍ପଣ କରିଛନ୍ତି। ଏହି ଅବସରରେ ସେ ତାଙ୍କ ବାପା ଯୋଗରାଜ ସିଂ ଦେଇଥିବା ମନ୍ତବ୍ୟ ସହ ଏକମତ ନ ଥିବା ସ୍ପଷ୍ଟ କରିଛନ୍ତି। କୃଷକଙ୍କ ପାଇଁ ପୁରସ୍କାର ଫେରାଉଥିବା କ୍ରୀଡ଼ାବିତଙ୍କୁ ସମର୍ଥନ କରିଥିଲେ ପୂର୍ବତନ କ୍ରିକେଟର ଯୋଗରାଜ। ଏ ସମ୍ପର୍କରେ ଯୁବି ଲେଖିଛନ୍ତି, ମୋ ବାପାଙ୍କ ମନ୍ତବ୍ୟ ଲାଗି ମୁଁ ଦୁଃଖିତ। ତାହା ସମ୍ପୂର୍ଣ୍ଣ ତାଙ୍କ ବ୍ୟକ୍ତିଗତ ମତ। ତାଙ୍କ ସହ ମୋର ଆଦର୍ଶ ସମାନ ନୁହେଁ।
ଏହା ବ୍ୟତୀତ ଚଳିତ ଥର ନିଜ ଜନ୍ମଦିନ ପାଳନ କରିବେ ନାହିଁ ବୋଲି ସ୍ପଷ୍ଟ କରିଛନ୍ତି ଯୁବି। ପୂର୍ବତନ ବିସ୍ଫୋରକ ବ୍ୟାଟ୍ସମ୍ୟାନ କୃଷକଙ୍କ ଆନ୍ଦୋଳନକୁ ସମର୍ଥନ କରି ମଧ୍ୟରାତିରେ ଟୁଇଟ୍ କରି ଲେଖିଛନ୍ତି, କୃଷକମାନେ ହେଉଛନ୍ତି ଦେଶର ରକ୍ତ। ଏଥିରେ କୌଣସି ଦ୍ୱନ୍ଦ୍ୱ ନାହିଁ। ମୁଁ ବିଶ୍ୱାସ କରେ ଶାନ୍ତିପୂର୍ଣ୍ଣ ଆଲୋଚନା ମାଧ୍ୟମରେ ବିବାଦର ସମାଧାନ ହୋଇପାରିବ। ଜନ୍ମଦିନ ପ୍ରତ୍ୟେକଙ୍କ ପାଇଁ ଇଚ୍ଛା ପୂରଣ କରିବାର ସୁବର୍ଣ୍ଣ ସୁଯୋଗ। ଏହି ଜନ୍ମଦିନ ପାଳନ କରିବା ବଦଳରେ କୃଷକ ଓ କେନ୍ଦ୍ର ସରକାରଙ୍କ ମଧ୍ୟରେ ଶୀଘ୍ର ସମାଧାନ ଲାଗି ମୁଁ ପ୍ରାର୍ଥନା କରୁଛି।
