ଭୁବନେଶ୍ୱର, ୧୫।୯(ବ୍ୟୁରୋ): ଭଲ କାମ କରି ପୁରସ୍କାର ନିଅ, ନହେଲେ ଦଣ୍ଡ ପାଅ। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏଭଳି ଗୁରୁମନ୍ତ୍ର ଦେଇଛନ୍ତି ସତ, ହେଲେ ପ୍ରକୃତରେ ପୋଲିସର ଇଚ୍ଛାଶକ୍ତିର ଅଭାବ ଥିବା ଭଳି ମନେହେଉଛି। ନୂଆ ମୋଟର ଯାନ ଆଇନ ଲାଗୁ ହେବାପରେ ବଡ଼ଧରଣର ଜରିମାନା ଓ ଧରପଗଡ଼ ଉପରେ ମୁଖ୍ୟମନ୍ତ୍ରୀ ୩ ମାସ କୋହଳ କରିଛନ୍ତି। ପୋଲିସ କମିଶନର ସୁଧାଂଶୁ ଷଡ଼ଙ୍ଗୀ ମାତ୍ର ୫ଟି ଟ୍ରାଫିକ୍ ନିୟମ ଅବମାନନା ପାଇଁ ଜରିମାନା କଥା କହିଥିଲେ। କିନ୍ତୁ ପୋଲିସ ସମ୍ପୂର୍ଣ୍ଣ ଭାବେ ହାତବାନ୍ଧି ବସିପଡ଼ିଛି। ଫଳରେ ସେପ୍ଟେମ୍ବର ପ୍ରଥମ ସପ୍ତାହରେ ଲୋକମାନେ ଯେଭଳି ସତର୍କ ହୋଇ ଟ୍ରାଫିକ୍ ନିୟମ ମାନିବା ଦେଖିବାକୁୁ ମିଳିଥିଲା, ତାହା ଏବେ ଆଉ ନାହିଁ। ଲୋକମାନେ ପୂର୍ବଭଳି ମନଇଚ୍ଛା ରାସ୍ତାକୁ ବ୍ୟବହାର କରୁଥିବା ଦେଖିବାକୁ ମିଳୁଛି। କିଏ ହେଲମେଟ୍ ପିନ୍ଧୁନି ତ କିଏ ରୁଙ୍ଗ୍ରୁଟ୍ରେ ଯାଉଛି। ଏହାକୁ ରୋକିବାକୁ କେହିନାହିଁ। ବିଶେଷ କରି ଉଦ୍ଘାଟନ ପରଠାରୁ ବମିଖାଲ ଫ୍ଲାଏଓଭର ଉପରେ ଗୁରୁତର ସମସ୍ୟା ସୃଷ୍ଟି କରୁଥିବା ରଙ୍ଗରୁଟ୍ ଚଳପ୍ରଚଳକୁ ରୋକାଯାଇପାରିଲା ନାହିଁ। ଟ୍ରାଫିକ୍ ନିୟମକୁ ମାନି ଚଳୁଥିବା ସ୍ଥାନୀୟ ଅଞ୍ଚଳର ଲୋକେ ଆଶା ରଖିଥିଲେ, ନୂଆ ମୋଟର ଯାନ ଆଇନ ଲାଗୁ ହେବା ପରେ ଏହି ରଙ୍ଗରୁଟ୍ ଚଳପ୍ରଚଳ ବନ୍ଦ ହେବ, କିନ୍ତୁ ତାହା ସମ୍ଭବ ହୋଇପାରିଲା ନାହିଁ।
ବମିଖାଲ ଫ୍ଲାଏଓଭରକୁ ଓ୍ବାନ୍ ଓ୍ବେ କରାଯାଇଛି। ଅର୍ଥାତ୍ ତାହା ଉପରେ ରସୁଲଗଡ଼ରୁ ଶହୀଦନଗର କିମ୍ବା ବମିଖାଲ କେହି ଯାଇପାରିବେ ନାହିଁ। ସେହିପରି ଫ୍ଲାଏଓଭରରେ ଶହୀଦନଗରରୁ ଆସୁଥିବା ଲୋକେ ବମିଖାଲକୁ ଯାଇପାରିବେ ନାହିଁ କି ବମିଖାଲରୁ ରସୁଲଗଡ଼ ମଧ୍ୟ କେହି ସେଥିରେ ଯାଇପାରିବେ ନାହିଁ। କିନ୍ତୁ ଏହାକୁ ଅଧିକାଂଶ ଲୋକେ ଖାତିର କରୁନାହାନ୍ତି। ପ୍ରତିଦିନ ଶହ ଶହ ବାଇକ ଦ୍ରୁତଗତିରେ ଫ୍ଲାଏଓଭର ଉପରେ ରଙ୍ଗ୍ ରୁଟ୍ରେ ଚଳପ୍ରଚଳ କରୁଛି। କେବଳ ବାଇକ ନୁହେଁ, ୪ଚକିଆ ଯାନ ମଧ୍ୟ ଯାଉଛି। ଯେଉଁମାନେ ହେଲମେଟ ପିନ୍ଧି ନିୟମ ମାନି ଯାଉଛନ୍ତି, ସେମାନେ ରଙ୍ଗରୁଟ୍ରେ ଯାଉଥିବା ଯାନଗୁଡ଼ିକୁ ଭୟ କରି ଧୀରେ ଧୀରେ ଯାଉଛନ୍ତି। ବୋଧହୁଏ ଏହି ଫ୍ଲାଏଓଭର ଭୁବନେଶ୍ୱରରେ ଏକମାତ୍ର ସ୍ଥାନ, ଯେଉଁଠି ନିୟମ ମାନି ଯାଉଥିବା ଲୋକେ ସତର୍କ ହୋଇଯିବାକୁ ପଡ଼ୁଛି। କାରଣ ଅନେକ ସମୟରେ ଦୁର୍ଘଟଣାର ଆଶଙ୍କା ଥାଏ।
ସାମାଜିକ କର୍ମୀ ବାସୁଦେବ ଭଟ୍ଟ କୁହନ୍ତି, ପ୍ରଥମତଃ ବମିଖାଲ ଫ୍ଲାଏଓଭର ଭବିଷ୍ୟତକୁ ଦେଖି କରାଯାଇ ନାହିଁ। ଆଜିକାଲି ରାଜଧାନୀରେ ଟ୍ରାଫିକ ସମସ୍ୟା ଯେଉଁଭଳି ଭାବେ ଦେଖାଯାଉଛି ସେ କ୍ଷେତ୍ରରେ ଏହି ଫ୍ଲାଏଓଭର ନିର୍ମାଣ ବାବଦ ଟଙ୍କା ପାଣିରେ ପଡ଼ିଲା ଭଳି ହୋଇଛି। କାରଣ ଏହା ସଂକୀର୍ଣ୍ଣ ଓ ଅଜବ ଭାବେ ତିଆରି ହୋଇଛି। ତ୍ରୁଟି ଘୋଡ଼ାଇବାକୁ ତାହାକୁ ଓ୍ବାନ୍ଓ୍ବେ କରାଯାଇଥିବାବେଳେ ତାହାକୁ ଅନେକେ ନ ମାନି ରଙ୍ଗ୍ରୁଟ୍ରେ ଯାତାୟାତ କରୁଛନ୍ତି। ତେଣୁ ଯଥାଶୀଘ୍ର ସେଠାରେ ଯାଞ୍ଚ ବ୍ୟବସ୍ଥା କରାଯିବା ଉଚିତ। ସେହିପରି ନୂଆ ନିୟମ ଅନୁଯାୟୀ ଉଲ୍ଲଂଘନକାରୀଙ୍କଠାରୁ ୧୦ଗୁଣା ଜରିମାନା ଆଦାୟ କରାଯିବା ଜରୁରୀ।
ଭୁବନେଶ୍ୱର ଟ୍ରାଫିକ ଏସିପି କିଶୋର କୁମାର ପାଣିଗ୍ରାହୀ କୁହନ୍ତି, ରାଜଧାନୀର ବିଭିନ୍ନ ସ୍ଥାନରେ ଯାଞ୍ଚ କରାଯାଉଛି। ତେବେ ସେହି ସ୍ଥାନକୁ ଆମେ ଅଧିକ ଗୁରୁତ୍ୱ ଦେବୁ। ଫ୍ଲାଏଓଭରରେ ରଙ୍ଗ୍ରୁଟ୍ରେ ଏବଂ ବିନା ହେଲ୍ମେଟ୍ରେ କେହି ଯାଉଥିଲେ ସେ ଦିଗରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବୁ।
