ବନ୍ତଳା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର: ପ୍ରସୂତିଙ୍କ ହାତରେ ରହିଗଲା ଭଙ୍ଗା ପ୍ଲାଷ୍ଟିକ ଭେନଫ୍ଲୋନ
9:06 amSeptember 23, 2019 / 21

ବନ୍ତଳା, ୨୩ା୯(ଡି.ଏନ.ଏ.) ଅନୁଗୋଳ ଜିଲା ବନ୍ତଳା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଜଣେ ପ୍ରସୂତିଙ୍କ ହାତରେ ସାଲାଇନ ପ୍ଲାଷ୍ଟିକ ଭେନଫ୍ଲୋନ ଭାଙ୍ଗି ରହିଯିବା ଘଟଣା ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି। ଘଟଣାରୁ ଜଣାପଡିଛି, ସାତକୋଶିଆ ଅଭୟାରଣ୍ୟ ପୁରୁଣାକୋଟ ଥାନା ଜଗନ୍ନାଥପୁର ଗ୍ରାମର କୌଶଲ୍ୟା ସାହୁ (୨୭)ଙ୍କ ପ୍ରସବ ଯନ୍ତ୍ରଣା ହେବାରୁ ତାଙ୍କୁ ଶୁକ୍ରବାର ବନ୍ତଳା ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା। ଅପରାହ୍ନରେ ସେ ଜଣେ ଶିଶୁ କନ୍ୟାକୁ ଜନ୍ମ ଦେଇଥିଲେ। ମୁଣ୍ଡ ବୁଲାଇବା ଯୋଗୁ ସ୍ବାସ୍ଥ୍ୟକେନ୍ଦ୍ର କର୍ମଚାରୀ ତାଙ୍କୁ ଏକ ସାଲାଇନ ଲଗାଇବା ସହ ୧୮ ସାଇଜର ପ୍ଲାଷ୍ଟିକ ଭେନ ଫ୍ଲୋନ ଲଗାଇଥିଲେ। ଆଗକୁ ସାଲାଇନର ଆବଶ୍ୟକ ଥିବା ନେଇ ଭେନ ଫ୍ଲୋନକୁ ବାହାର କରି ନ ଥିଲେ। ପରେ ଭେନ ଫ୍ଲୋନଟି ହାତରେ ହଲୁଥିବା ପ୍ରସୂତି ଜାଣିବା ପରେ ତାଙ୍କ ଶାଶୁଙ୍କୁ ଜଣାଇଥିଲେ। ଶନିବାର ଅପରାହ୍ନରେ କୌଶଲ୍ୟାଙ୍କ ଶାଶୁ ଜଣେ ଷ୍ଟାଫ ନର୍ସଙ୍କୁ ଜଣାଇବା ପରେ ନର୍ସଜଣକ ଭେନଫ୍ଲୋନକୁ ହାତରୁ ବାହାର କରିଥିଲେ। କିନ୍ତୁ ପ୍ଲାଷ୍ଟିକ ଭେନ ଫ୍ଲୋନଟି ଭାଙ୍ଗି ଅଧା ଭେନ ଭିତରେ ରହି ଯାଇଥିଲା। ଯନ୍ତ୍ରଣା ହେବାରୁ ରବିବାର ସକାଳେ ପ୍ରସୂତି ଓ ପରିବାର ବର୍ଗ ଜିଲା ମୁଖ୍ୟ ଚିକିତ୍ସାଳୟକୁ ଯାଇ ଭଙ୍ଗା ପ୍ଲାଷ୍ଟିକ ଭେନଫ୍ଲୋନକୁ ବାହାର କରିଥିଲେ। ସେଠାରୁ ବନ୍ତଳା ଗୋଷ୍ଠୀ କେନ୍ଦ୍ରକୁ ଫେରି ଘରକୁ ଆସିଥିଲେ। ତାଙ୍କ ସ୍ବାସ୍ଥ୍ୟାବସ୍ଥା ଭଲ ଥିବା ଜଣାପଡିଛି। ସରକାରଙ୍କ ପକ୍ଷରୁ ନିମ୍ନମାନର ସାମଗ୍ରୀ ଯୋଗାଯାଉଥିବାରୁ ଏଭଳି ଘଟୁଥିବା ପ୍ରସୂତିଙ୍କ ପରିବାର ପକ୍ଷରୁ ଅଭିଯୋଗ ହୋଇଛି।
ଏ ବିଷୟରେ ବନ୍ତଳା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଅଧିକାରୀ ଡା. ଘନଶ୍ୟାମ ବେହେରାଙ୍କୁ ଯୋଗାଯୋଗ କରାଯାଇଥିଲେ ମଧ୍ୟ ଫୋନ ନ ଲାଗିବାରୁ ମତାମତ ମିଳିପାରିନାହିଁ। ସୂଚନାଥାଉ କି, ଗତ ମେ ତାରିଖରେ ଏହି ସ୍ବାସ୍ଥ୍ୟକେନ୍ଦ୍ରରେ ଚିକିତ୍ସିତ ହେବାବେଳେ ଗଡତରାସ ଗ୍ରାମର ଜଣେ ୩ ବର୍ଷର ଶିଶୁ ଶୁଭଙ୍କରଙ୍କ ଅଣ୍ଟାରେ ଇଞ୍ଜେକଶନ ଛୁଞ୍ଚି ଭାଙ୍ଗି ରହିଯାଇଥିଲା। ଗତ ଶୁକ୍ରବାର ଅପରାହ୍ନରେ ଏମ୍‌ସରେ ଅପରେଶନ ପରେ ଏହାକୁ ବାହାର କରାଯାଇଛି।