ନୂଆଦିଲ୍ଲୀ, ୧୭ ।୬-
ଚଳିତ ବର୍ଷର ଟି୨୦ ବିଶ୍ୱକପ ସମ୍ପର୍କରେ ଅନ୍ତର୍ଜାତୀୟ କ୍ରିକେଟ କାଉନସିଲ(ଆଇସିସି) ନିଷ୍ପତ୍ତି ନେବାରେ ବିଳମ୍ବ କରୁଥିଲେ ହେଁ ଇଣ୍ଡିଆନ ପ୍ରିମିୟରଲିଗ୍(ଆଇପିଏଲ) ଆୟୋଜନ ଆଶା ବଢ଼ିବାରେ ଲାଗିଛି। କୋଭିଡ୍-୧୯ ସଂକ୍ରମଣ ଯୋଗୁ ଟି୨୦ ବିଶ୍ୱକପ୍ ଆୟୋଜନ ଅବାସ୍ତବ ମନେ ହେଉଛି ବୋଲି କହଛନ୍ତି କ୍ରିକେଟ ଅଷ୍ଟ୍ରେଲିଆ ଚେୟାରମ୍ୟାନ ଇଅର୍ଲ ଏଡିଙ୍ଗ୍ସ। ଟୁର୍ନାମେଣ୍ଟରେ ଭାଗ ନେଉଥିବା ୧୬ଟି ଦଳ ଦେଶକୁ ଆସିବା ସହଜ ନୁହେଁ ବୋଲି ସେ ପ୍ରକାଶ କରିଛନ୍ତି। ଅନ୍ୟପକ୍ଷରେ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ(ବିସିସିଆଇ) ସଭାପତି ସୌରଭ ଗାଙ୍ଗୁଲି ଆଇପିଏଲ ଆୟୋଜନ ସମ୍ପର୍କରେ ଚିନ୍ତା କରୁଥିବା ସ୍ପଷ୍ଟ ହୋଇଛି। ସେ ବିସିସିଆଇ ସଦସ୍ୟଭୁକ୍ତ ରାଜ୍ୟମାନଙ୍କୁ ଚିଠି ଲେଖି ନିଜ ଆଭିମୁଖ୍ୟ ଜଣାଇଛନ୍ତି। ଆଇପିଏଲ ୨୦୨୦ ପାଇଁ ସେପ୍ଟେମ୍ବର ୨୬ରୁ ନଭେମ୍ବର ୮କୁ ସମ୍ଭାବ୍ୟ ସମୟଭାବେ ଗାଙ୍ଗୁଲି ଏବଂ ତାଙ୍କ ଟିମ୍ ବିବେଚନା କରଥିବା ଜଣାଯାଇଛି। ତେବେ ଅଷ୍ଟ୍ରେଲିଆରେ ହେବାକୁଥିବା ଟି୨୦ ବିଶ୍ୱକପ ବାତିଲ ହେଲେ ଯାଇ ଆଇପିଏଲ ପାଇଁ ସମୟ ବାହାରିବା ସମ୍ଭବ ହେବ।
ଜୁନ ୧୦ରେ ଅନୁଷ୍ଠିତ ଆଇସିସି ବୋର୍ଡ ବୈଠକରେ ଟି୨୦ ବିଶ୍ୱକପ ସମ୍ପର୍କରେ ଚୂଡ଼ାନ୍ତ ନିଷ୍ପତ୍ତି ହୋଇ ପାରିନାହିଁ। ଜୁଲାଇରେ ଏ ସମ୍ପର୍କରେ ନିଷ୍ପତ୍ତି ନିଆଯିବା ସମ୍ଭାବନା ରହିଛି। ତେବେ ସେତେବେଳ ପର୍ଯ୍ୟନ୍ତ ବିସିସିଆଇ ଚୁପ୍ ହୋଇ ବସିବାକୁ ଚାହୁଁନାହିଁ। ବ୍ରଡକାଷ୍ଟ ପାର୍ଟନରଙ୍କ ସହିତ ଆଲୋଚନା କରି ଆଇପିଏଲ ପାଇଁ ଓ୍ବିଣ୍ଡୋ ବାହାର କରିବା ଦିଗରେ କାର୍ଯ୍ୟ କରୁଛି। ଆଇସିସି ଯେପରି ଟି୨୦ ବିଶ୍ୱକପ ସମ୍ପର୍କରେ ଚିନ୍ତା କରୁଛି ଆମେ ସେପରି ଆଇପିଏଲ ସମ୍ପର୍କରେ ଯୋଜନା ପ୍ରସ୍ତୁତ କରୁଛୁ। ଟି୨୦ ବିଶ୍ୱକପ ବାତିଲ ହେଲେ ଆମେ ଆଇପିଏଲ ପାଇଁ କାର୍ଯ୍ୟ ଆରମ୍ଭ କରିବୁ। ତେଣୁ ସେପ୍ଟେମ୍ବର ୨୬ରୁ ନଭେମ୍ବର ୮କୁ ସମ୍ଭାବ୍ୟସମୟ ଧାର୍ଯ୍ୟ କରାଯାଇଛି ବୋଲି ବିସିସିଆଇର ଜଣେ ଅଫିସିଆଲ ଏକ ସାକ୍ଷାତକାରରେ କହିଛନ୍ତି। ଆଇପିଏଲ ପାଇଁ ସମ୍ଭାବ୍ୟ ଓ୍ବିଣ୍ଡୋ ବାହାର କରାଯାଇଥିବାବେଳେ ବିସିସିଆଇ ପାଇଁ ପରବର୍ତ୍ତୀ ହର୍ଡଲ୍ସ ହେଉଛି ଭେନ୍ୟୁ ଚୂଡ଼ାନ୍ତ କରିବା। ଭେନ୍ୟୁ ସମ୍ପର୍କରେ ଏପର୍ଯ୍ୟନ୍ତ କିଛି ନିଷ୍ପତ୍ତି ନିଆଯାଇନାହିଁ। ଆସନ୍ତା ୩୦ ଦିନରେ କରୋନା ସ୍ଥିତିକୁ ଦେଖିବା ପରେ ଭାରତରେ ଏହି ଲିଗ୍ ଆୟୋଜନକୁ ପ୍ରାଧାନ୍ୟ ଦିଆଯିବ। ଏହା ଅଳ୍ପ ଭେନ୍ୟୁରେ ଏବଂ ବିନା ଦର୍ଶକରେ ମଧ୍ୟ ହୋଇପାରେ। ଆବଶ୍ୟକସ୍ଥଳେ ବିଦେଶରେ ମଧ୍ୟ ଏହାକୁ ଆୟୋଜନ କରାଯାଇପାରେ। ଏପରିକି ଏହାକୁ ଅନ୍ତର୍ଜାତୀୟ ଖେଳାଳିଙ୍କ ବିନା ମଧ୍ୟ ଖେଳାଯାଇପାରେ। ତେଣୁ ଟି୨୦ ବିଶ୍ୱକପ୍ ବାତିଲ ହେଲେ ଯେ କୌଣସି ପ୍ରକାରେ ଆଇପିଏଲ ଆୟୋଜନ ପାଇଁ ଭାରତୀୟ ବୋର୍ଡ ପ୍ରସ୍ତୁତ ହେଉଥିବା ଜଣାଯାଇଛି।
