ଓ୍ବାଶିଟନ୍,୫।୧୦: ସୋସିଆଲ ମିଡିଆ ପ୍ଲାଟଫର୍ମ ଫେସବୁକ, ହ୍ବାଟ୍ସଆପ୍ ଏବଂ ଇନଷ୍ଟାଗ୍ରାମ ସୋମବାର ରାତିରେ ହଠାତ୍ ଡାଉନ୍ ହୋଇଯାଇଥିଲା। ଫଳରେ ବିଶ୍ୱର କୋଟି କୋଟି ଉପଭୋକ୍ତା ବହୁ ଅସୁବିଧାର ସମ୍ମୁଖୀନ ହୋଇଥିଲେ। ସର୍ଭର ଡାଉନ୍ ଯୋଗୁ ହ୍ବାଟସଆପ ବ୍ୟବହାରକାରୀମାନେ ବାର୍ତ୍ତା ପଠାଇବା କିମ୍ବା ଗ୍ରହଣ କରିବାରେ ସକ୍ଷମ ହୋଇ ନ ଥିଲେ। ସେହିଭଳି, ବ୍ୟବହାରକାରୀମାନେ ଫେସବୁକରେ କେବଳ ପୁରୁଣା ବିଷୟବସ୍ତୁ ଦେଖୁଥିଲେ। ଏହି ସମସ୍ୟା ହେତୁ ଇନଷ୍ଟାଗ୍ରାମ ବ୍ୟବହାରକାରୀମାନେ ମଧ୍ୟ ଷ୍ଟାଟସ ଏବଂ ରିଲ ଦେଖିବାରେ ଅସୁବିଧାର ସମ୍ମୁଖୀନ ହୋଇଥିଲେ। ତଥାପି, ପ୍ରାୟ ୬ ଘଣ୍ଟା ପରିଶ୍ରମ ପରେ, ଏହି ସମସ୍ତ ସୋସିଆଲ ମିଡିଆ ପ୍ଲାଟଫର୍ମଗୁଡିକ ପୁଣିଥରେ କାମ କରିବା ଆରମ୍ଭ କରିଥିଲା। ତେବେ ଆସନ୍ତୁ ଜାଣିବା ସାରା ବିଶ୍ୱରେ ହ୍ବାଟସଆପ, ଫେସବୁକ ଏବଂ ଇନଷ୍ଟା ହଠାତ୍ କାହଁିକି ଡାଉନ୍ ହୋଇଯାଇଥିଲା।
ବିଶ୍ୱର ସାଇବର କ୍ରାଇମ ବିଶେଷଜ୍ଞ ଏବଂ ଅନୁସନ୍ଧାନକାରୀମାନେ ଏହିପରି ବିଶ୍ୱସ୍ତରୀୟ ଅଘଟଣର ପ୍ରକୃତ କାରଣ ଖୋଜିବାକୁ ଚେଷ୍ଟା କରିଥିଲେ। ବ୍ରାଏନ କ୍ରେବସ ନାମକ ଜଣେ ସାଇବର କ୍ରାଇମ୍ ରିପୋର୍ଟରଙ୍କ ଅନୁଯାୟୀ, ଏହି ପ୍ଲାଟଫର୍ମଗୁଡିକ ଡାଉନ୍ ହେବାର କାରଣ ହେଉଛି ବିଜିପି ଅର୍ଥାତ୍ ବର୍ଡର ଗେଟୱେ ପ୍ରୋଟୋକଲରେ ଏକ ତ୍ରୁଟି। ବିଜିପି ହେତୁ ଇଣ୍ଟରନେଟ ସଠିକ ଭାବରେ କାମ କରିବାକୁ ସକ୍ଷମ ଅଟେ। ଇଣ୍ଟରନେଟ ହେଉଛି ଅନେକ ନେଟୱାର୍କର ଏକ ନେଟୱାର୍କ ଏବଂ ବିଜିପିର କାମ ହେଉଛି ଏହି ନେଟୱାର୍କଗୁଡ଼ିକୁ ଏକତ୍ର ସଂଯୋଗ କରିବା। ଯଦି ବିଜିପି ତ୍ରୁଟିପୂର୍ଣ୍ଣ କିମ୍ବା ଏହା କୌଣସି କାରଣରୁ କାମ ବନ୍ଦ କରିଦିଏ, ତେବେ ଇଣ୍ଟରନେଟ ରଏଟର୍ସଗୁଡିକ କଣ କରିବେ ଜାଣିପାରନ୍ତି ନାହିଁ ଏବଂ ଇଣ୍ଟରନେଟ କାମ ବନ୍ଦ କରିଦିଏ। ବଡ଼ ରଏଟର୍ସଗୁଡିକ ସେମାନଙ୍କର ମାର୍ଗଗୁଡ଼ିକୁ ଅପଡେଟ କରି ରଖନ୍ତି ଯାହା ଦ୍ୱାରା ନେଟୱର୍କ ପ୍ୟାକେଟଗୁଡିକ ଶେଷ ଉତ୍ସକୁ ବିତରଣ ହୋଇପାରିବ। ଫେସବୁକ କ୍ଷେତ୍ରରେ ଏହା ଘଟିଛି। ଫେସବୁକ ପ୍ଲାଟଫର୍ମ ତାର ଶେଷ ଗନ୍ତବ୍ୟସ୍ଥଳରେ ଥିଲା ଏବଂ ବିଜିପିରେ ଏକ ତ୍ରୁଟି ହେତୁ ଫେସବୁକ ଅନ୍ୟ ନେଟୱାର୍କକୁ ଏହା ଇଣ୍ଟରନେଟରେ ଅଛି ବୋଲି କହିପାରିଲା ନାହିଁ।
ସୋମବାର ଫେସବୁକ, ହ୍ବାଟସଆପ ଏବଂ ଇନଷ୍ଟାଗ୍ରାମରେ ଆସିଥିବା ତ୍ରୁଟି ପଛରେ ଡିଏନ୍ଏସ୍ ମଧ୍ୟ ଦାୟୀ ବୋଲି ଜଣାପଡିଛି। ଡିଏନ୍ଏସ୍ ଯଥା ଡୋମେନ ନେମ୍ ସିଷ୍ଟମ ଇଣ୍ଟରନେଟର ଏକ ଗୁରୁତ୍ୱପୂର୍ଣ୍ଣ ଅଂଶ। ଇଣ୍ଟରନେଟ ପାଇଁ ଏହା ଏକ ପ୍ରକାର ଫୋନବୁକ। ଏହା ହେଉଛି ଏକ ଉପକରଣ ଯାହା ଫେସବୁକ ପରି ଡୋମେନ ନାମକୁ ପ୍ରକୃତ ଇଣ୍ଟରନେଟ ପ୍ରୋଟୋକଲରେ ପରିଣତ କରେ। ଏକ ଡିଏନ୍ଏସ୍ ତ୍ରୁଟି ହେତୁ ଉପଭୋକ୍ତାଙ୍କର ବ୍ରାଉଜର୍ କିମ୍ବା ସ୍ମାର୍ଟଫୋନ ଆପ ଫେସବୁକର ସେବାକୁ ପ୍ରବେଶ କରିବାରେ ଅସମର୍ଥ ହେଲା।
ସୋମବାର ଅଘଟଣ ବିଷୟରେ ଫେସବୁକ ନିଶ୍ଚିତ କରିଛି ଯେ, ଏହା ସାଇବର ଆକ୍ରମଣ ନୁହେଁ। କମ୍ପାନୀ କହିଛି ଯେ, ଏହି ଅଘଟଣର ମୁଖ୍ୟ କାରଣ ହେଉଛି ଭୁଲ ସଂରଚନା ବିତରଣ (କନଫିଗେରେସନ ଚେଞ୍ଜ୍)। ଏହି ତ୍ରୁଟି କାରଣରୁ କମ୍ପାନୀର ୩.୫ ବିଲିୟନ ଉପଭୋକ୍ତା ସୋସିଆଲ ମିଡିଆ ଏବଂ ମେସେଜିଂ ସେବା ପାଇବାରେ ଅସୁବିଧା ଭୋଗୁଛନ୍ତି। କମ୍ପାନୀ ଆହୁରି ମଧ୍ୟ କହିଛି ଯେ ଏହି ଅଘଟଣରେ ଉପଭୋକ୍ତାଙ୍କ ତଥ୍ୟକୁ ନେଇ କୌଣସି ଟ୍ୟାମ୍ପରିଂ ହୋଇଛି ବୋଲି ଦର୍ଶାଇବାକୁ ଏପର୍ଯ୍ୟନ୍ତ ସେମାନଙ୍କ ପାଖରେ କୌଣସି ପ୍ରମାଣ ନାହିଁ।
