ବ୍ରହ୍ମପୁର ଅଫିସ,୨୬ା୮-ବ୍ରହ୍ମପୁର ପୌର ନିଗମ (ବିଏମସି)ର ପୂର୍ବତନ କାଉନସିଲର ଓ କର୍ପୋରେଟର ସଂଘର ସମାବେଶ ରବିବାର ଅନୁଷ୍ଠିତ ହୋଇଯାଇଛି । ଏମ୍ପି ଓ ବିଧାୟକଙ୍କ ଭଳି ପୌରସଂସ୍ଥାକୁ ନିର୍ବାଚିତ ହୋଇଥିବା ପୂର୍ବତନ ସଦସ୍ୟା, ସଦସ୍ୟମାନଙ୍କ ପାଇଁ ସରକାର ପେନସନ ଯୋଜନା କାର୍ଯ୍ୟକାରୀ କରିବାକୁ ସର୍ବସମ୍ମତ ଦାବି ହୋଇଛି। ଏଥିପାଇଁ ତ୍ୱରିତ ପଦକ୍ଷେପ ନେବା ଉପରେ ଗୁରୁତ୍ୱ ଦିଆଯାଇଛି। ସ୍ଥାନୀୟ ପ୍ରକାଶମ ହଲରେ ହୋଇଥିବା ଏହି କାର୍ଯ୍ୟକ୍ରମରେ ଏମ୍ପି ଚନ୍ଦ୍ରଶେଖର ସାହୁ ମୁଖ୍ୟଅତିଥି, ପୂର୍ବତନ ବିଧାୟକ ରମେଶ ଚନ୍ଦ୍ର ଚ୍ୟାଉ ପଟ୍ଟନାୟକ ସମ୍ମାନିତ ଅତିଥି ରୂପେ ଯୋଗ ଦେଇଥିଲେ। ସୂଚନାଯୋଗ୍ୟ, ଚନ୍ଦ୍ରଶେଖର ଏଠାର ପୂର୍ବ ପୌରସଂସ୍ଥାର କାଉନସିଲର ଓ ଦୁଇଥର ନଗରପାଳ ନିର୍ବାଚିତ ହୋଇଥିଲେ। ସେହିପରି ଚ୍ୟାଉ ପଟ୍ଟନାୟକ ମଧ୍ୟ ଅତୀତରେ ପୌର ପରିଷଦର କାଉନସିଲର ଥିଲେ ।
ଉଭୟଙ୍କ ରାଜନୈତିକ ଜୀବନ ପୂର୍ବ ପୌର ପରିଷଦରୁ ଆରମ୍ଭ ହୋଇଥିଲା ।
ସମାବେଶରେ ସଂଘ ସଭାପତି ତଥା ପୂର୍ବ ପୌର ପରିଷଦର ନଗରପାଳ ପି. ଭୀମୁଡ଼ୁ ଅଧ୍ୟକ୍ଷତା କରିଥିଲେ । ନବ ନିର୍ବାଚିତ ବ୍ରହ୍ମପୁର ବିଧାୟକ ବିକ୍ରମ ପଣ୍ଡା, ଏମପି ଚନ୍ଦ୍ରଶେଖର ଓ ପୂର୍ବତନ ବିଧାୟକ ଚ୍ୟାଉ ପଟ୍ଟନାୟକଙ୍କୁ ଏହି ଅବସରରେ ସମ୍ବର୍ଦ୍ଧିତ କରାଯାଇଥିଲା। ଏମପି ସାହୁ କହିଥିଲେ ୧୫୨ ବର୍ଷର ଏହି ପୌରସଂସ୍ଥା ୧୦ ବର୍ଷ ତଳେ ମହାନଗର ନିଗମରେ ପରିଣତ ହୋଇଛି । ଏହାର ସର୍ବାଙ୍ଗୀନ ବିକାଶରେ ପୂର୍ବତନ କାଉନସିଲର ଓ କର୍ପୋରେଟରମାନେ ସାମିଲ ହେବାକୁ ସେ ଆହ୍ବାନ ଦେଇଥିଲେ। ଜାନିବିଲି ବୃହତ ଜଳଯୋଗାଣ ପ୍ରକଳ୍ପ ନିର୍ମାଣ ନେଇ ମହାନଗର ସାରା ପାଇପ ଲାଇନ ସଂଯୋଗ ପାଇଁ ରାସ୍ତାଗୁଡ଼ିକ ଖୋଳି ଦିଆଯାଇଛି ଏବଂ ସମ୍ପୃକ୍ତ ଠିକା ସଂସ୍ଥା ପୁନଃ ନିର୍ମାଣରେ ଅହେତୁକ ବିଳମ୍ବ କରୁଥିବାରୁ ସମସ୍ୟା ସଂଗୀନ ହୋଇଯାଇଥିବା ସାହୁ ସ୍ବୀକାର କରିଥିଲେ ।
ମହାନଗର ସମସ୍ୟା ସମାଧାନ ପାଇଁ ପଦକ୍ଷେପ ନିଆଯାଉଥିବା ଏବଂ ଏହି ପୁରାତନ ସହରକୁ ଆଦର୍ଶ ଓ ସ୍ବଚ୍ଛ କରିବା ନିମନ୍ତେ ସମସ୍ତଙ୍କ ସହଯୋଗ କାମନା କରିଥିଲେ ବିଧାୟକ ପଣ୍ଡା। ଚ୍ୟାଉ ପଟ୍ଟନାୟକ ମଧ୍ୟ ଉଦବୋଧନ ଦେଇଥିଲେ। ପୂର୍ବତନ ଉପନଗରପାଳ ତଥା ପ୍ରାକ୍ତନ ବିଧାୟକ ଶିବ ଶଙ୍କର ସାହାଣୀ, ୬ ଥର କାଉନସିଲର ନିର୍ବାଚିତ ହେବା ସହ ଅତୀତରେ ଉପନଗରପାଳ ହୋଇଥିବା ଡ଼. ଭଗବାନ ଗନ୍ତାୟତ, ପୂର୍ବତନ ଡେପୁଟି ମେୟର ଜ୍ୟୋତ୍ସ୍ନା ନାୟକ, ପ୍ରାକ୍ତନ ଉପନଗରପାଳ ଜାମୁଲା ଶଙ୍କର ନାରାୟଣ ମଞ୍ଚାସୀନ ଥିଲେ। ସଂଘ ପକ୍ଷରୁ ଏମାନଙ୍କୁ ସମ୍ମାନିତ କରାଯାଇଥିଲା। ସଂଘ ସମ୍ପାଦକ ଅଶୋକ କୁମାର ସାହୁ ପ୍ରାରମ୍ଭିକ ସୂଚନା ଦେଇଥିବା ବେଳେ ପୂର୍ବତନ କାଉନସିଲର ଜେ. ସୁଷମା ରାଣୀ କାର୍ଯ୍ୟକ୍ରମ ସଂଯୋଜନା କରିଥିଲେ । ଅତୀତରେ ପୌର ସଂସ୍ଥାକୁ ନିର୍ବାଚିତ ଉଦୟନାଥ ନାୟକ, ଅଲେଖ ଚୌଧୁରୀ, ପ୍ରମୋଦ କୁମାର ଜେନା, ଉମା ଚରଣ ନାୟକଙ୍କ ସମେତ ଶତାଧିକ ସଦସ୍ୟା ଓ ସଦସ୍ୟ ଉପସ୍ଥିତ ଥିଲେ ।
