ଭବାନୀପାଟଣା, ୧୫।୧୦(ଡି.ଏନ୍.ଏ.)- କଳାହାଣ୍ଡି ଜିଲା ଥୁଆମୂଳ ରାମପୁର ଥାନା ଅନ୍ତର୍ଗତ ପୁରୁଣାଗୁମାଠାରେ ଟ୍ରକ ଓ ବାଇକ ଦୁର୍ଘଟଣାରେ ଜଣେ ମୃତ ଓ ଜଣେ ଗୁରୁତର ହେବା ଘଟଣା ନୂଆମୋଡ ନେଇଛି। ସ୍ବାମୀକୁ ସୁପରିକଳ୍ପିତ ଭାବେ ହତ୍ୟା କରାଯାଇଥିବା ନେଇ ମୃତ ବ୍ୟକ୍ତିଙ୍କ ସ୍ତ୍ରୀ ଥୁଆମୂଳ ରାମପୁର ଥାନାରେ ଅଭିଯୋଗ କରିବା ଘଟଣା ସାଧାରଣରେ ଚର୍ଚ୍ଚାର ବିଷୟ ହୋଇଛି।
ପ୍ରକାଶଯୋଗ୍ୟ, ଯେ ଗତ ୧୨ ତାରିଖ ଶନିବାର ଦିନ ପବିତ୍ର ବାଗ କାଣିଗୁମା ସାପ୍ତାହିକ ବଜାରକୁ ଚପଲ ବିକ୍ରି କରିବାକୁ ଯାଇଥିଲେ। ସେଠାରୁ ଅପରାହ୍ନ ୪ ଟା ସମୟରେ ୨୦ ହଜାର ଟଙ୍କା ଧରି ଘରକୁ ବାହାରିଥିଲେ। ସନ୍ଧ୍ୟା ସାଢେ ୬ ଟା ସମୟରେ ଥୁଆମୂଳ ରାମପୁର ଥାନା ଅନ୍ତର୍ଗତ ପୁରୁଣାଗୁମା ବୁଲାଣି ଠାରେ ଏକ ଟ୍ରକ ଓ ପବିତ୍ର ବାଗଙ୍କ ବାଇକ ଦୁର୍ଘଟଣାଗ୍ରସ୍ତ ହେବା ପଳରେ ତାଙ୍କର ମୃତ୍ୟୁ ହୋଇଥିବା ଘଟଣା ପରିବାର ଲୋକଙ୍କୁ ଖବର ଦିଆଯାଇଥିଲା। ପରେ ମୃତ ପବିତ୍ରଙ୍କ ସ୍ତ୍ରୀ ଦୁଆର ଦେଇ ଦୁର୍ଘଟଣାସ୍ଥଳକୁ ଯାଇଥିବା ବେଳେ ପବିତ୍ରଙ୍କ ମୃତଦେହ କିମ୍ବା ସେ ଚଳାଉଥିବା ବାଇକ ମିଳି ନ ଥିଲା। ପରେ ଗୁଣପୁର ଫାଣ୍ଡି ପୋଲିସକୁ ପଚାରିବା ପରେ ମଧ୍ୟ ପବିତ୍ରଙ୍କ ଶବକୁ ଦେଖାଇଲେ ନାହିଁ ବୋଲି ସ୍ତ୍ରୀ ଦୁଆର ଅଭିଯୋଗ କରିଛନ୍ତି। ମୃତ ପବିତ୍ର ଟଙ୍କା ଧରି ଥିବାରୁ ଦୁର୍ବୃତ୍ତମାନେ ତାଙ୍କୁ ଗାଡି ମଡାଇ ହତ୍ୟା କରିଥିବା ସେ ଅଭିଯୋଗ କରିଛନ୍ତି। ତୁରନ୍ତ ଏହାର ତଦନ୍ତ କରି ଅଭିଯୁକ୍ତମାନଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ପାଇଁ ଥୁଆମୂଳ ରାମପୁର ଥାନାରେ ସେ ସୋମବାର ଲିଖିତ ଅଭିଯୋଗ କରିଛନ୍ତି।
