ଇସ୍ଲାମାବାଦ,୧୦।୯: ପାକିସ୍ତାନରେ ଲଗାଣ ବର୍ଷା ଜନିତ ପ୍ରଳୟଙ୍କରୀ ବନ୍ୟାରେ ୩୦ ବିଲିୟନ ଡଲାର ମୂଲ୍ୟର କ୍ଷୟକ୍ଷତି ହୋଇଥିବା ସରକାର ଆକାଳନ କରିଛନ୍ତି। ଶୁକ୍ରବାର ବନ୍ୟାଞ୍ଚଳ ଗସ୍ତରେ ଆସିଥିବା ଜାତିସଂଘ ମହାସଚିବ ଆଣ୍ଟୋନିଓ ଗୁଟେରେସ୍ ପାକିସ୍ତାନକୁ ପର୍ଯ୍ୟାପ୍ତ ସହାୟତା ଯୋଗାଇଦେବା ଲାଗି ସାରା ବିଶ୍ୱକୁ ଅନୁରୋଧ କରିଛନ୍ତି। ରେକର୍ଡ ପରିମାଣର ମୌସୁମୀ ବର୍ଷା ସାଙ୍ଗକୁ ଉତ୍ତରାଞ୍ଚଳ ପର୍ବତରେ ଥିବା ଗ୍ଲେସିୟର ତରଳିବାରୁ ପାକିସ୍ତାନର ବ୍ୟାପକ ଅଞ୍ଚଳରେ ବନ୍ୟାପ୍ଳାବିତ ହୋଇଥିଲା। ଏଥିରେ ୧,୩୯୧ ଜଣଙ୍କ ମୃତ୍ୟୁ ଘଟିବା ସହ ବହୁ ଘରଦ୍ୱାର, ରାସ୍ତା, ରେଳଧାରଣା, ବ୍ରିଜ୍ ଭାଙ୍ଗିଛି। ବ୍ୟାପକ ଅଞ୍ଚଳରେ ଫସଲ ନଷ୍ଟ ହେବା ସହ ବହୁ ଗୃହପାଳିତ ପ୍ରାଣୀଙ୍କ ମୃତ୍ୟୁ ହୋଇଛି। ଏବେ ବି ବହୁ ଅଞ୍ଚଳ ଜଳମଗ୍ନ ଥିବାରୁ ଲକ୍ଷ ଲକ୍ଷ ଲୋକ ବାସହରା ହୋଇ ବିଭିନ୍ନ ସ୍ଥାନରେ ଆଶ୍ରୟ ନେଇଛନ୍ତି। ବନ୍ୟାରେ ୩୩ ନିୟୁତ ଲୋକଙ୍କ ଜୀବନ ଜୀବିକା ପ୍ରଭାବିତ ହୋଇଛି। ବନ୍ୟା ପାଇଁ ପାକ୍ ସରକାର ଏବଂ ଜାତିସଂଘ ମୁଖ୍ୟ ଜଳବାୟୁ ପରିବର୍ତ୍ତନକୁ ଦାୟୀ କରିଛନ୍ତି। ଦୁଇଦିନିଆ ଗସ୍ତରେ ଆସିଥିବା ଗୁଟେରେସ୍ ପାକ୍ ପ୍ରଧାନମନ୍ତ୍ରୀ ଶେହବାଜ ଶରିଫ୍ଙ୍କ ସହ ଆଲୋଚନା ପରେ ଇସ୍ଲାମାବାଦରେ ଏକ ମିଳିତ ଖବରଦାତା ସମ୍ମିଳନୀରେ ଅନ୍ତର୍ଜାତୀୟ ସମୁଦାୟଙ୍କୁ ସହାୟତା ପାଇଁ ନିବେଦନ କରିଥିଲେ। ଯେଉଁ ଦେଶଗୁଡ଼ିକ ଜଳବାୟୁ ପରିବର୍ତ୍ତନ ଲାଗି ଦାୟୀ ସେମାନଙ୍କ ଉପରେ ପ୍ରକୃତି ଦାଉ ସାଧିବା ପରିବର୍ତ୍ତେ ପାକିସ୍ତାନ ଭଳି ଦେଶରେ ବିପର୍ଯ୍ୟୟ ଘଟାଉଛି ବୋଲି ଗୁଟେରେସ୍ କହିଛନ୍ତି।
