ମନମୁଣ୍ଡା, ୧୨।୬ (ଡି.ଏନ୍.ଏ): ବୌଦ୍ଧ ଜିଲା ମନମୁଣ୍ଡା ପଁଚେତ୍ର ମହୁଲବାହାଲି ଆର କଲତାପାଲି ଗଁାରେ ପାଏନ୍ ସଁକଟ ଦେଖାଦେଇଛେ। ଇ ଗଁାର ଲୋକ୍ ବରଷା ପାଏନ୍ ଭରସାରେ ଚାଷ୍ବାସ କରୁଛନ୍, ହେଲେ ଅନେକ ସମିଆରେ ଚାଷ୍ବାସ ମର୍ଡିରେ ମାଡ଼ ଖାଉଛେ। ସେନ୍ତା ଉଭଏ ଗଁାବାସୀକର ଗଧାପଧା ଲାଗି ଦୁଇ ଗଁାରେ ଗୁଟେ ଲେଖେଁ ବଁଧ୍ ରହିଛେ। ହେଲେ ବଁଧ୍ମାନେ ବହୁତ୍ ବଛର ହେଲା ମାଟିକାମ୍ ନାଇଁ ହେବାର ଲାଗି ତୁପି ହେଇଗଲାନ। ବଁଧେ ଯେତ୍କି ପାଏନ୍ ରହିବାର କଥା ନାଇଁ ରହିବାର। ଇଆଡ଼େ ଖରା ତାତିରୁ ବଁଚ୍ବାର ଲାଗି ଗାଈଗୋରୁ ବଁଧ୍କେ ପାଏନ୍ ପିଇବାକେ ଯାଇ ପାଏନ୍ରେ ପଡ଼ିରହୁଛନ୍। ଏନ୍ତାଥି ବଁଧର ପାଏନ୍ ଦୂଷିତ୍ ହେଉଛେ ସତ୍, ହେଲେ ଗାଈଗୋରୁକର ଗୁଲଗୁଲା ଦେଖି ଗଁବାସୀ ତାହାକୁ ନାଇଁ ଖେଦବାର। ନିଜେ ଗଁାବାସୀ ଉପେ ଶୂଇନ୍ ହେଇ ସେ ଦୂଷିତ ପାଏନ୍ରେ ଗଧାବୁଡ଼ା କରୁଛନ୍ ଆର ଅନେକ ଲୋକ ଚର୍ମ ରୋଗ୍ର ଶିକାର ହେଉଛନ୍। ଇଆଡ଼େ ଗଁାବାସୀ ଖାଏବା ପିଇବାର ଲାଗି ଗଁାରେ ଥିବାର ଦୁଇଟା ନଲ୍ଚୁଅଁା ଉପରେ ନିରଭର କରୁଛନ୍। ହେଲେ ନଲ୍ଚୁଅଁାରୁ ପାଏନ୍ ଟିକେ ନେବାର ଲାଗି ହେଲେ ଧାଡ଼ି ଲମାବାକେ ପଡ଼ୁଛେ। କହେବାକେ ଗଲେ ଉଭଏ ଗଁାବାସୀ ଖାଏଲା ପିଇଲା ପାଏନ୍ ଲାଗି ବଡ଼ା ଦହଗଁଜ୍ ହେଉଛନ୍। ଏନ୍ତାଥି ଦୁଇ ଗଁାବାସୀକର ଲାଗି ପିଇଲା ପାଏନ୍ର ସୁବିଧା କରବାରଟା ନିହାତି ଜରୁରି ଆଏ। ନାଇଁହେଲେ ଗଁାବାସୀ ଆଗ୍କେ ଆହୁରି ଦୁରଦଶା ଭୋଗ୍ କରବାରଟା ଝଲୋ ଝଲୋ ଦିଶୁଛେ। ପରଶାସନ୍ ଲୁକ୍କର ପିଇଲା ପାଏନ୍ ସୁବିଧା ଲାଗି ଉନିଆ ଗଁାମାନକେ ନୂଅଁା ନୂଅଁା ପ୍ରକଳ୍ପ ତିଆରି କରୁଛେ। ହେଲେ ମହୁଲବାହାଲି ଆର କଲତାପାଲି ଇଥ୍ରୁ ବାଦ୍ ପଡ଼ିଛନ୍। ଯେନ୍ଥିରଲାଗି ଗଁାବାସୀକର ଭିତରେ ଗୁଟେ ଅସନ୍ତୋଷ ଭାବ୍ ଦେଖ୍ବାକେ ମିଲିଛେ। ଥାନୀୟ ପରଶାସନ ଯେତେ ଜଲଦି ହେବା ଉଭଏ ଗଁାବାସୀକୁ ପାଇପ୍ ପାଏନ୍ ଯୁଗେଇ ଦେବାର ସଂଗେ ଚାଷ୍ ଲାଗି ତେଲ ନଦୀରେ ଉଠାଜଲସେଚନ ପଏଣ୍ଟ ବସାବାକେ ଗଁାର ନକୁଳ ବାଘ, ନେପାଳ ବାଘ, ଉତ୍ତମ ବଗର୍ତ୍ତି, ଧ୍ରୁବ ବଗର୍ତ୍ତି, ଶାନ୍ତନୁ ପ୍ରଧାନ, ହେମନ୍ତ ମହାକୁଡ଼, ଶିବରାତ୍ର ସିଂ ପରମୁଖ ଦାବି ଜନେଇଛନ୍।
