ପଞ୍ଜୀକରଣ ଅପେକ୍ଷାରେ ୩୨୮ ଚାଷୀ
7:35 amJanuary 4, 2020 / 21

ଜୟପୁର,୪।୧(ଡି.ଏନ୍‌.ଏ.) ଧାର୍ଯ୍ୟ ତାରିଖ ଭିତରେ କୋରାପୁଟ ଜିଲାର ଅଧିକାଂଶ ଚାଷୀ ନାମ ପଞ୍ଜିକରଣ କରିପାରି ନାହାନ୍ତି। ଜିଲାପାଳ, ଯୋଗାଣ ଅଧିକାରୀଙ୍କ ଦୃଷ୍ଟିକୁ ଏହା ଅଣାଯିବା ପରେ ରାଜ୍ୟ ସରକାରଙ୍କୁ ଅବଗତ କରିଥିଲା ଜିଲା ପ୍ରଶାସନ। ଖାଦ୍ୟ ଯୋଗାଣ ବିଭାଗର ନିର୍ଦ୍ଦେଶକ୍ରମେ ନିର୍ଦ୍ଧାରିତ ସମୟ ଭିତରେ ପଞ୍ଜିକରଣ କରିପାରି ନ ଥିବା ଚାଷୀ ପୁନର୍ବାର ଏଥିପାଇଁ ଆବେଦନ କରିଥିଲେ। ଜିଲାର ୨୦ଟି ଲ୍ୟାମ୍ପ ମଧ୍ୟରୁ ୮ଟି ଲ୍ୟାମ୍ପର ୩୨୮ ଜଣ ଚାଷୀ ଏହି ଆବେଦନ କରିଛନ୍ତି ା କିନ୍ତୁ ରାଜ୍ୟ ସରକାର ଚୂଡ଼ାନ୍ତ ନିଷ୍ପତ୍ତି ନେଇ ନ ଥିବା ଯୋଗୁ ପଞ୍ଜିକରଣ ଅପେକ୍ଷାରେ ରହିଛନ୍ତି ଚାଷୀ। ତୁରନ୍ତ ନିଷ୍ପତ୍ତି ନ ହେଲେ ପଞ୍ଜିକରଣ ଅପେକ୍ଷାରେ ଥିବା ଚାଷୀ ସେମାନଙ୍କ ଅମଳ ଧାନ କେଉଁଠାରେ ବିକିବେ, ସେନେଇ ଚିନ୍ତାରେ ରହିଛନ୍ତି ା
ଜୟପୁର ବ୍ଲକ କୁମୁଲିପୁଟ ଲ୍ୟାମ୍ପ ଅଧୀନରେ ୮୫ ଜଣ, ଉମୁରୀ ଲ୍ୟାମ୍ପର ୩୯, କୋଟପାଡ଼ ବ୍ଲକ ସଦର ଲ୍ୟାମ୍ପର ୮୧, ବୋରିଗୁମ୍ମା ବ୍ଲକ ସଦର ଲ୍ୟାମ୍ପର ଜଣେ ଏବଂ କାମତା ଲ୍ୟାମ୍ପର ୧୨, ବୈପାରୀଗୁଡ଼ା ବ୍ଲକ ସଦରର ୭, ଲକ୍ଷ୍ମୀପୁର ବ୍ଲକ କାକିରିଗୁମ୍ମା ଲ୍ୟାମ୍ପର ୪ ଓ ସର୍ବାଧିକ କୁନ୍ଦୁରା ବ୍ଲକ ସଦର ଲ୍ୟାମ୍ପର ୧୫୩ ଜଣ ଚାଷୀ ପଞ୍ଜିକରଣ ପାଇଁ ଆବେଦନ କରିଛନ୍ତି। କୁନ୍ଦୁରା ବ୍ଲକର ଚାଷୀମାନେ ଅନ୍ତିମ ତାରିଖ ପୂର୍ବରୁ ଲ୍ୟାମ୍ପରେ କାଗଜପତ୍ର ଦାଖଲ କରି ପଞ୍ଜିକରଣ ପାଇଁ ଆବେଦନ କରିଥିଲେ। କିନ୍ତୁ ଲ୍ୟାମ୍ପ କର୍ମଚାରୀଙ୍କ ଅବହେଳା ଯୋଗୁ ତାହା ହୋଇପାରି ନ ଥିବା ସେମାନେ ଜିଲା ପ୍ରଶାସନ ପାଖରେ ଅଭିଯୋଗ କରିଛନ୍ତି। ଏନେଇ ଯାଞ୍ଚ କରାଯିବ ବୋଲି ପ୍ରଶାସନ କହିଛି। ଉଲ୍ଲେଖଯୋଗ୍ୟ, ୨୦୧୯-୨୦ରେ ଚାଷୀଙ୍କ ଖରିଫ ଧାନ ବିକ୍ରି ପାଇଁ ରାଜ୍ୟ ସରକାର ଅଗଷ୍ଟ ୧ରୁ ସେପ୍ଟେମ୍ବର ୩୦ ସୁଦ୍ଧା ପଞ୍ଜିକରଣ ପାଇଁ ତାରିଖ ଧାର୍ଯ୍ୟ କରିଥିଲେ। ଏହି ଦୁଇମାସ ଭିତରେ ଅଧିକାଂଶ ଚାଷୀ ପଞ୍ଜିକରଣ କରି ନ ଥିବା ଯୋଗୁ ଏହି ଅବଧି ଅକ୍ଟୋବର ୩୧କୁ ବୃଦ୍ଧି କରାଯାଇଥିଲା। ଅନ୍ତିମ ତାରିଖ ସୁଦ୍ଧା ୨୬ ହଜାର ୮୩୦ ଜଣ ଚାଷୀ ପଞ୍ଜିକୃତ ହୋଇଥିଲେ। ସେଥିରୁ ଜାଲ୍‌ ପଞ୍ଜିକରଣ କରିଥିବା ୫୭ ଜଣ ଯାଞ୍ଚ ପରେ ବାଦ୍‌ ପଡ଼ିଥିଲେ।