ନୂଆଦିଲ୍ଲୀ,୧୬।୧: ଦୀର୍ଘ ୭ ବର୍ଷ ତଳର ବହୁ ଚର୍ଚ୍ଚିତ ନିର୍ଭୟା ଗଣ ବଳାତ୍କାର ମାମଲାର ଶୁଣାଣି କରି ଆଜି ଦିଲ୍ଲୀର ଏକ କୋର୍ଟ ତିହାର ଜେଲ୍ ପ୍ରଶାସନକୁ ରିପୋର୍ଟ ମାଗିଛନ୍ତି। ଆସନ୍ତା ୨୨ରେ ଏହି ମାମଲାରେ ଦୋଷୀ ସାବ୍ୟସ୍ତ ହୋଇଥିବା ୪ ଜଣଙ୍କୁ ଫାଶୀ ଦେବାକୁ କୋର୍ଟ ନିର୍ଦ୍ଦେଶ ଦେଇଥିବା ବେଳେ ଏ ସମ୍ପର୍କରେ ଜେଲ ପ୍ରଶାସନର ପ୍ରସ୍ତୁତିକୁ ନେଇ କୋର୍ଟ ରିପୋର୍ଟ ମାଗିଛନ୍ତି। ଏବେ ଏହି ମାମଲାର ଶୁଣାଣି ଶୁକ୍ରବାର କରାଯିବ ବୋଲି କୋର୍ଟ କହିଛନ୍ତି। ଅନ୍ୟପଟେ ମୁକେଶ କୁମାର ସିଂଙ୍କ କ୍ଷମା ଆବେଦନକୁ ଦିଲ୍ଲୀ ଉପରାଜ୍ୟପାଳ ଅନିଲ ବେଜଲ ଖାରଜ କରିଦେବା ପରେ ଏବେ ଏହାକୁ ସ୍ବରାଷ୍ଟ୍ର ମନ୍ତ୍ରଣାଳୟ ନିକଟକୁ ପଠାଇ ଦିଆଯାଇଛି। ସ୍ବରାଷ୍ଟ୍ର ମନ୍ତ୍ରଣାଳୟ ଏହାକୁ ଦେଖିବା ପରେ ଏହା ରାଷ୍ଟ୍ରପତିଙ୍କ ନିକଟକୁ ପଠାଯିବ। ଏପଟେ ଆଲୋଚନା ହେଉଛି କି ୨୨ ଜାନୁୟାରୀରେ ଏମାନଙ୍କୁ ଫାଶୀ ନ ହୋଇପାରେ। କାହିଁକିନା ଯଦି ଓ ୨/୩ ଦିନ ମଧ୍ୟରେ ଏମାନଙ୍କ କ୍ଷମା ଆବେଦନ ଖାରଜ ହୋଇଯାଏ ତା’ପରେ ଏମାନଙ୍କୁ ୧୪ ଦିନ ସମୟ ମିଳିବ। ଆଉ ଏହା ଆଇନ ଅନୁଯାୟୀ ୨୨ ତାରିଖ ଅତିକ୍ରମ କରିଯିବ ବୋଲି କୁହାଯାଉଛି।
