ଆନନ୍ଦପୁର,୮। ୧୦(ସ୍ବ.ପ୍ର.)- ରାଜରାଜୁଡା ଅମଳରୁ ରାଜପୁତ ଜାତିର ଏକ ସ୍ବତନ୍ତ୍ର ପରିଚୟ ରହିଛି। ରାଜବଂଶ ଏବଂ ରାଜ୍ୟର ସୁରକ୍ଷାର ଗୁରୁଦାୟିତ୍ୱ ବହନ କରୁଥିବା ଏହି ରାଜପୁତ ଜାତି ନିଜର ପ୍ରାଚୀନ ପରମ୍ପରାକୁ ଉଦଜୀବିତ କରିବା ଉଦ୍ଦେଶ୍ୟରେ ପବିତ୍ର ବିଜୟାଦଶମୀ ଦିନ ଛଡିବାଡି ଖେଳର ନିଆରା ପର୍ବ ପାଳନ କରିଛନ୍ତି। ଏଥିପାଇଁ ମଧ୍ୟାହ୍ନ ସମୟରେ ଆନନ୍ଦପୁରର ରଜପୁତ ସାହିର ବୟୋଜ୍ୟୋଷ୍ଠ ବ୍ୟକ୍ତିଙ୍କଠାରୁ ଆରମ୍ଭ କରି ଯୁବକ ଓ ଛୋଟ ପିଲାମାନେ ନିଜ ନିଜ ଘରେ ପୂଜାପାଇଆସୁଥିବା ପାରମ୍ପରିକ ଅସ୍ତ୍ରଶସ୍ତ୍ର ତଥା ଖଣ୍ଡା, ତଲଓାର୍, ବାନାପାଟା,ମୁଦଗର, ବର୍ଚ୍ଛା,କଟାରୀ, ଛୁରୀ ଆଦିକୁ ସାହିର ମଧ୍ୟସ୍ଥଳରେ ରଖିଥିଲେ। ଯଥାରୀତି ପୂଜାର୍ଚ୍ଚନା ସହିତ ହୋମଯଜ୍ଞାଦି କାର୍ଯ୍ୟ ସମ୍ପାଦନ କରାଯାଇଥିଲା। ଚଳିତ ବର୍ଷ ଏହି ଅବସରରେ ପୂର୍ବରୁ ରହିଆସିଥିବା ପଶୁବଳି ପ୍ରଥାକୁ ଉଚ୍ଛେଦ କରାଯାଇ ପରମ୍ପରା ସ୍ବରୂପ କଖାରୁ ବଳି ଦିଆଯାଇ ବିଧି କାର୍ଯ୍ୟ ଶେଷ କରାଯାଇଥିଲା। ମା’ ଦୁର୍ଗା ଓ ଦଧିବାମନଜୀଉଙ୍କ ମନ୍ଦିର ସମ୍ମୁଖରେ ଛଡିବାଡି ଖେଳ ପ୍ରଦର୍ଶନ କରାଯାଇଥିଲା। ଲିଟୁ ରାମ, ହଗୁର ରାମ, ସିପୁନ ରାମ ପ୍ରମୁଖଙ୍କ ସମେତ ସାହିର ବହୁ ଯୁବକ କାର୍ଯ୍ୟକ୍ରମ ପରିଚାଳନା କରିଥିଲେ। ଅପରାହ୍ନରେ ପ୍ରଥମେ ସାହିର ପୂଜାସ୍ଥଳରେ ଛଡିବାଡି ଖେଳ ଶେଷ ହେବା ପରେ ଗ୍ରାମଦେବତୀ ମା’ ପାତାଳଶ୍ୱରୀଙ୍କ ନିକଟରେ ଖେଳ ପ୍ରଦର୍ଶନ ପୂର୍ବକ ଆଶୀର୍ବାଦ ଭିକ୍ଷା କରାଯାଇଥିଲା। ପରେ ପରମ୍ପରା ଅନୁଯାୟୀ ଆନନ୍ଦପୁରର ଆରାଧ୍ୟ ଦେବତା ଦଧିବାମନଜୀ ଏବଂ ମା’ ଦେଶ ଦୁର୍ଗାଙ୍କ ନିକଟରେ ଏହି ଖେଳ ଶାନ୍ତିଶୃଙ୍ଖଳାର ସହ ସମାପନ ହୋଇଥିଲା। ଏହି ଖେଳକୁ ଦେଖିବା ପାଇଁ ଶତାଧିକ ଲୋକଙ୍କ ସାମଗମ ହୋଇଥିଲା।
