ନାଲ୍‌କୋରେ ବି ସମଦଶା
7:44 amJuly 30, 2019 / 21

ବଅଁରପାଳ, ୩୦।୭(ଡି.ଏନ.ଏ.)-ତାଳଚେରଠାରେ ଭରତପୁର କୋଇଲା ଖଣି ଦୁର୍ଘଟଣାର ପ୍ରଭାବ ନାଲ୍‌କୋ ପ୍ଲାଣ୍ଟରେ ମଧ୍ୟ ପଡିଛି। ନବରନତ୍ପ୍ରାପ୍ତ ରାଷ୍ଟ୍ରାୟତ୍ତ ଉଦ୍ୟୋଗ ନାଲ୍‌କୋରେ ବର୍ତ୍ତମାନ କୋଇଲା ସଙ୍କଟ ଯୋଗୁ ବିଦ୍ୟୁତ୍‌ ଉତ୍ପାଦନ ହ୍ରାସ ପାଇଛି। ୧୨ଶହ ମେଗାୱାଟ ବିଶିଷ୍ଟ ନାଲ୍‌କୋ ସିପିପିରେ ୧୦ଟି ୟୁନିଟ ରହିଥିବାବେଳେ ସୋମବାର ସୁଦ୍ଧା ୨ଟି ୟୁନିଟ୍‌ ବନ୍ଦ କରିଦିଆଯାଇଛି। ଖଣି ବନ୍ଦ ଆନ୍ଦୋଳନ ଯୋଗୁ ନାଲକୋକୁ ଆବଶ୍ୟକ ପରିମାଣର କୋଇଲା ଯୋଗାଣ ହୋଇପାରୁନାହିଁ। ପ୍ରତ୍ୟେକ ଦିନ ଏମ୍‌ସିଏଲ୍‌ରୁ ନାଲକୋକୁ ପ୍ରାୟ ୧୬ରୁ ୧୭ ହଜାର ମେଟ୍ରିକ ଟନ୍‌ କୋଇଲା ଯୋଗାଣ ହୋଇଥାଏ। ପ୍ଲାଣ୍ଟ ଚାଲିବା ପାଇଁ ଅତି କମ୍‌ରେ ୧୪ରୁ ୧୫ ହଜାର ମେଟ୍ରିକ ଟନ୍‌ କୋଇଲା ଆବଶ୍ୟକ। ଅନ୍ୟପକ୍ଷରେ ନାଲକୋ କୋଇଲା ଷ୍ଟକ୍‌ୟାର୍ଡ଼ରେ ଅତି କମ୍‌ରେ ବର୍ଷା ଦିନେ ୬ ଲକ୍ଷ ମେଟ୍ରିକ୍‌ ଟନ୍‌ କୋଇଲା ରହିବା କଥା। କୋଇଲା ସଙ୍କଟ ଯୋଗୁ ଷ୍ଟକ୍‌ୟାର୍ଡ କୋଇଲା ବିଦ୍ୟୁତ୍‌ ଉତ୍ପାଦନରେ ବ୍ୟବହାର ହେଉଛି। ଫଳରେ ଗଚ୍ଛିତ କୋଇଲା ୪ ଲକ୍ଷ ମେଟ୍ରିକ ଟନ୍‌କୁ ଖସି ଆସିଲାଣି। ବତ୍ତର୍ମାନ ୮ଟି ୟୁନିଟ୍‌ରୁ ୯୬୦ ମେଗାୱାଟ୍‌ ବଦଳରେ ୮୬୦ ମେଗାୱାଟ ବିଦ୍ୟୁତ ଶକ୍ତି ଉତ୍ପାଦନ ହେଉଥିବା ଜଣାପଡ଼ିଛି। ନାଲ୍‌କୋକୁ ଆଉ କିଛି ଦିନ କୋଇଲା ଯୋଗାଣ ବନ୍ଦ ହୋଇଗଲେ ଏହାର କୁପ୍ରଭାବ ସ୍ମେଲଟର ପ୍ଲାଣ୍ଟ ଉପରେ ପଡ଼ିବ। ସ୍ମେଲଟର ପ୍ଲାଣ୍ଟରେ ପଟ୍‌ଗୁଡ଼ିକ କାର୍ଯ୍ୟକାରୀ ହେବା ପାଇଁ ପ୍ରାୟ ୧୮୫ କିଲୋ ଆମ୍ପିୟର ବିଦ୍ୟୁତ ଶକ୍ତିର ଆବଶ୍ୟକତା ରହିଛି। ସିପିପିରେ ବିଦ୍ୟୁତ ଉତ୍ପାଦନ ହ୍ରାସ ପାଇଲେ ସ୍ମେଲଟର ପ୍ଲାଣ୍ଟ ପ୍ରଭାବିତ ହେବା ସହ ଆଲୁମିନିୟମ୍‌ ଉତ୍ପାଦନ ମଧ୍ୟ କମିବ। ଅବସ୍ଥାରେ ସୁଧାର ନ ଆସିଲେ ଆଗକୁ ବଡ ଧରଣର ସମସ୍ୟା ଉପୁଜିବ ବୋଲି ଆଶଙ୍କା କରାଯାଉଛି।
ଏ ସମ୍ପର୍କରେ ନାଲ୍‌କୋ ସିପିପି ଶ୍ରମିକ କଂଗ୍ରେସ ୟୁନିୟନର କାର୍ଯ୍ୟକାରୀ ସଭାପତି ବିଭବ ଜେନା, ଏନ୍‌ଏନ୍‌ଇୟୁର ସାଧାରଣ ସମ୍ପାଦକ ନିର୍ମଳ ଶତପଥୀ କୁହନ୍ତି, ତାଳଚେର ଏମ୍‌ସିଏଲ୍‌ରେ ଆନ୍ଦୋଳନ ଯୋଗୁ ନାଲକୋକୁ କୋଇଲା ଆସୁନାହିଁ। ଗଚ୍ଛିତ କୋଇଲା ନିୟମିତ ଭାବେ ଖର୍ଚ୍ଚ କରାଯାଉଛି। ଏଭଳି ସମସ୍ୟା ଲାଗି ରହିଲେ ପ୍ଲାଣ୍ଟର ଭବିଷ୍ୟତ ଅନ୍ଧାରକୁ ଠେଲି ହୋଇଯିବ।