କଟକ ଅଫିସ,୫|୯: ଧଳ ସାମନ୍ତ ଭ୍ରାତାଙ୍କ ପୋଖରୀପୁଟ୍ସ୍ଥିତ ଆନନ୍ଦବିହାର ବାସଭବନ ଓ ମର୍କତନଗର ଘରୁ ଜବତ ଜାଲ୍ ନୋଟ୍ ସମ୍ପର୍କିତ ମାମଲାକୁ ନେଇ ବୁଧବାର ଚାଉଳିଆଗଞ୍ଜ ଥାନାର ତତ୍କାଳିନ ଏଏସ୍ଆଇ ମନୋରଞ୍ଜନ ମହାପାତ୍ରଙ୍କୁ ଜେରା କରାଯାଇଛି। ୨୦୧୬ ଜାନୁୟାରୀ ୧୮ରେ ପୋଲିସ ଏହିସବୁ ସ୍ଥାନରେ ଚଢାଉ କରି ୨ କୋଟି ୬୭ ଲକ୍ଷ ୬୪ ହଜାର ୭ ଶହ ୪୦ ଟଙ୍କା ଜବତ କରିଥିଲା। ଜବତ ଟଙ୍କା ମଧ୍ୟରେ ୧୦ ହଜାର ଟଙ୍କାର ନକଲି ନୋଟ୍ ଥିବା ସେତେବେଳେ ପୋଲିସ କହିଥିଲା। ବୁଧବାର କଟକର ପ୍ରଥମ ଅତିରିକ୍ତ ଜିଲା ଓ ଦୌରାଜଜ୍ ଏହି ମାମଲାର ଶୁଣାଣି କରିଥିଲେ। ସୁଶିଲ ଓ ସୁଶାନ୍ତ ଧଳସାମନ୍ତ ଭ୍ରାତାଙ୍କ ଉପସ୍ଥିତିରେ ବରିଷ୍ଠ ଆଇନଜୀବୀ ସୌରଚନ୍ଦ୍ର ମହାପାତ୍ର ଚାଉଳିଆଗଞ୍ଜ ଥାନାର ତତ୍କାଳିନ ଏଏସ୍ଆଇ ମନୋରଞ୍ଜନ ମହାପାତ୍ରଙ୍କୁ ଜେରା କରିଥିଲେ। ଧଳସାମନ୍ତ ଭ୍ରାତାଙ୍କଠାରୁ କେତେଖଣ୍ଡ ଜାଲ୍ ନୋଟ୍ ଜବତ ହୋଇଥିଲା, କେଉଁ ପରିସ୍ଥିତିରେ ଏବଂ କିଭଳି ଭାବେ ପୋଲିସ ଏହାକୁ ଜବତ କରିଥିଲା ସେ ସମ୍ପର୍କରେ ଆଇନଜୀବୀ ମହାପାତ୍ର ପ୍ରଶ୍ନ କରିଥିଲେ। ଆସନ୍ତା ୨୧ରେ ମାମଲାର ପରବର୍ତ୍ତୀ ଶୁଣାଣି ହେବ। ପୂର୍ବରୁ ଧଳସାମନ୍ତ ଭ୍ରାତାଙ୍କ ଉପସ୍ଥିତିରେ ଅଶୋକ ସେନ୍, ପ୍ରକାଶ ନାୟକ, ଅକ୍ଷୟ ସାହୁଙ୍କ ସାକ୍ଷ୍ୟ ଗ୍ରହଣ କରାଯାଇଥିଲା। ସେହିପରି ନକଲି ଟଙ୍କା ଜବତ ମାମଲାରେ ଚାଉଳିଆଗଞ୍ଜ ଥାନାର ତତ୍କାଳିନ ଥାନାଧିକାରୀ ଅଜୟ ଦାସ ଓ ପ୍ରଦୀପ କୁମାର ମହାପାତ୍ରଙ୍କ ସାକ୍ଷ୍ୟ ଗ୍ରହଣ ହୋଇଛି।
