ନୂଆଦିଲ୍ଲୀ,୨।୬- ଓଡ଼ିଶା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପୁଣି ଥରେ ଦେଶର ସବୁଠାରୁ ଲୋକପ୍ରିୟ ମୁଖ୍ୟମନ୍ତ୍ରୀ ଭାବେ ନିଜକୁ ପ୍ରତିପାଦିତ କରିପାରିଛନ୍ତି। ଆଇଏଏନ୍ଏସ୍ -ସି ଭୋଟର ଷ୍ଟେଟ ଅଫ୍ ଦି ନେଶନ-୨୦୨୦ ସର୍ଭେରୁ ଏହା ଜଣାପଡ଼ିଛି। ନିକଟରେ ଓଡ଼ିଶାରେ ନବୀନ ବିଜେଡି ସରକାରର ପଞ୍ଚମ ପାଳିର ପ୍ରଥମ ବର୍ଷ ପୁରଣ କରିଛନ୍ତି। ନିରବିଚ୍ଛିନ୍ନ ଭାବେ ଦୀର୍ଘ ୨୦ବର୍ଷ ଧରି ଓଡ଼ିଶାକୁ ଶାସନ କରିଆସୁଥିବା ନବୀନଙ୍କୁ ଏବେ ଲୋକ୍ରପିୟତାରେ ୮୨.୯୬ପ୍ରତିଶତ ରେଟିଂ ମିଳିଛି।
ଲୋକପ୍ରିୟତା ତାଲିକାରେ ନବୀନଙ୍କ ପରେ ଛତିଶଗଡ଼ ମୁଖ୍ୟମନ୍ତ୍ରୀ ଭୁପେଶ ବାଘେଲା ରହିଛନ୍ତି। ତାଙ୍କୁ ୮୧.୦୬ ରେଟିଂ ମିଳିଛି। ୨୦୧୮ ଛିତଶଗଡ଼ରେ ବିଧାନସଭା ନିର୍ବାଚନରେ କଂଗ୍ରେସ ସରକାର ଗଠନ କରାଇବାରେ ତାଙ୍କର ପ୍ରମୁଖ ଭୁମିକା ରହିଛି। ସେହିପରି ବାମଦଳ ନେତା ଭାବେ ପରିଚିତ କେରଳର ମୁଖ୍ୟମନ୍ତ୍ରୀ ପିନାରାୟୀ ବିଜୟନ୍ ଲୋକପ୍ରିୟ ମୁଖ୍ୟମନ୍ତ୍ରୀ ତାଲିକାର ତୃତୀୟ ସ୍ଥାନରେ ରହିବା ସହ ୮୦.୨୮ ରେଟିଂ ପାଇଛନ୍ତି। ରାଜ୍ୟରେ ସେ ଯେଉଁ ଢଙ୍ଗରେ କୋଭିଡ୍-୧୯ର ମୁକାବିଲା କଲେ ତାହା ଅନ୍ୟ ରାଜ୍ୟ ତଥା ଦେଶ ପାଇଁ ଉଦାହରଣ ସାଜିଛି। ଯେଉଁଥିପାଇଁ ତାଙ୍କର ଲୋକପ୍ରିୟତା ବୃଦ୍ଧି ପାଇଛି।
ଲୋକପ୍ରିୟତା ତାଲିକାର ଚତୁର୍ଥ ନମ୍ବରରେ ରହିଛନ୍ତି ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ତଥା ଓ୍ବାଇଏସ୍ଆର୍ କଂଗ୍ରେସ ନେତା ଜଗନ୍ ମୋହନ ରେଡ୍ଡୀ। ତାଙ୍କୁ ୭୮.୫୨ରେଟିଂ ମିଳିଥିବାବେଳେ ପଞ୍ଚମ ସ୍ଥାନରେ ଥିବା ମହାରାଷ୍ଟ୍ର ମୁଖ୍ୟମନ୍ତ୍ରୀ ଉଦ୍ଧବ ଠାକ୍ରେଙ୍କୁ ୭୬.୫୨ ରେଟିଂ ମିଳିଛି। ଗୋଆରେ ଭାଜପାର ଲୋକପ୍ରିୟତା ହ୍ରାସ ପାଉଥିବା ସର୍ଭେରୁ ଜଣାପଡ଼ୁଛି। ଗୋଆ ମୁଖ୍ୟମନ୍ତ୍ରୀ ପ୍ରମୋଦ ସାଓ୍ବନ୍ତଙ୍କୁ ମାତ୍ର ୪୨.୭୯ ରେଟିଂ ମିଳିଛି। ସାଓ୍ବନ୍ତଙ୍କ କାର୍ଯ୍ୟଧାରା ଲୋକଙ୍କୁ ବେଶ୍ ଆକୃଷ୍ଟ କରିପାରୁ ନାହିଁ। ସେଠାରେ ଭାଜପାକୁ କ୍ଷମତା ବଜାୟ ରଖିବାକୁ ହେଲେ ବ୍ୟାପକ କସରତ କରିବାକୁ ପଡ଼ିବ। ସେହିପରି ଜେଡିୟୁ ନେତା ତଥା ବିହାର ମୁଖ୍ୟମନ୍ତ୍ରୀ ନୀତିଶ କୁମାରଙ୍କୁ ମାତ୍ର ୩୦.୮୪ ରେଟିଂ ମିଳିଛି। ବିହାରରେ ଆସନ୍ତା ସେପ୍ଟେମ୍ବର ଓ ଅକ୍ଟୋବରରେ ବିଧାନସଭା ନିର୍ବାଚନ ହେବାକୁ ଥିବାବେଳେ ନୀତିଶଙ୍କ ଲୋକପ୍ରିୟତା ରେଟଂ ହ୍ରାସ ପାଇବା ଚିନ୍ତାଜନକ ରହିଛି। ବିଶେଷକରି ଶାସନ କ୍ଷମତା ପାଇଁ ଏନ୍ଡିଏ ସହିତ ମୂଲଚାଲ ନୀତି ତାଙ୍କ ଲୋକପ୍ରିୟତାକୁ ହ୍ରାସ କରିଛି ବୋଲି ସର୍ଭେରୁ ଜଣାପଡ଼ିଛି। ପଞ୍ଜାବ ମୁଖ୍ୟମନ୍ତ୍ରୀ ଅମରିନ୍ଦର ସିଂଙ୍କ ରାଜନୈତିକ ଦକ୍ଷତା ବ୍ୟାପକ ଭାବେ ହ୍ରାସ ପାଇଥିବା ସର୍ଭେରୁ ଜଣାପଡ଼ିଛି। ତାଙ୍କର ବର୍ତ୍ତମାନର ଲୋକପ୍ରିୟତା ଅନୁସାରେ ମାତ୍ର ୨୭.୫୧ ରେଟିଂ ମିଳିଛି।
