ହିସାର,୨୨।୫: ଆଧୁନିକ ଯୁଗରେ ଝିଅମାନେ ସବୁକ୍ଷେତ୍ରରେ ନିଜର ପାରିଦର୍ଶିତା ଦେଖାଇଛନ୍ତି। ଏହି କ୍ରମରେ ଯେଉଁଠାରେ ନିଃଶ୍ୱାସ ନେବା କଷ୍ଟକର ହୋଇପଡ଼ିଥାଏ, ସେହି ସ୍ଥାନ ଅର୍ଥାତ୍ ବିଶ୍ୱର ସବୁଠାରୁ ଉଚ୍ଚତମ ଗିରିଶୃଙ୍ଗରେ ପହଞ୍ଚିବାରେ ସଫଳ ହୋଇଛନ୍ତି ଦେଶର ଏହି ସାହସୀ ଝିଅ। ଆମେ କହୁଛୁ ଭାରତର ପର୍ବତାରୋହୀ ଅନୀତା କୁଣ୍ଡୁଙ୍କ କଥା। ଯିଏ ତୃତୀୟ ଥର ପାଇଁ ମାଉଣ୍ଟ ଏଭରେଷ୍ଟ ଚଢ଼ିବାରେ ସଫଳ ହୋଇଛନ୍ତି। ଅନୀତା ହରିଆଣାର ପ୍ରଥମ ଝିଅ ଯିଏ ଉଚ୍ଚତମ ପର୍ବତ ଚଢ଼ିବାରେ ସଫଳ ହୋଇଛନ୍ତି। ଏଥିସହ ନେପାଳ ଓ ଚାଇନା ରାସ୍ତାରୁ ମାଉଣ୍ଟ ଏଭରେଷ୍ଟକୁ ଯାଇଥିବା ପ୍ରଥମ ଭାରତୀୟ ପର୍ବତାରୋହୀ ମଧ୍ୟ।
୩୬ ଦିନର ଲମ୍ବା ସଂଘର୍ଷ ପରେ ଅନୀତା ମେ ୨୧ ସକାଳ ୭ଟାରେ ପବର୍ତ ଶିଖରରେ ତ୍ରିରଙ୍ଗା ଉଡ଼ାଇଥିଲେ। ଦୁର୍ଗମ ଓ ବରଫାବୃତ୍ତ ରାସ୍ତା ଦେଇ ଗତି କରିବା ସହ ବିନା ଅମ୍ଳଜାନରେ ସେ ଶିଖରରେ ସୋମବାର ପହଞ୍ଚିଥିଲେ। ଚଳିତ ଥର ସେ ଏକ ଟିମ୍ ଲିଡର ଭାବେ ଶିଖରକୁ ଚଢ଼ିଥିଲେ। ତାଙ୍କର ଏହି ଟିମ୍ରେ ବିଭିନ୍ନ ଦେଶରୁ ୧୪ଜଣ ପର୍ବତାରୋହୀ ଭାଗ ନେଇଥିଲେ। ଅନୀତାଙ୍କ ସହ ମାତ୍ର ୪ଜଣ ଶିଖରକୁ ପହଞ୍ଚିଥିବା ବେଳେ ୫ଜଣ ରାସ୍ତାରୁ ଫେରିଯାଇଥିଲେ। ଆଉ ଅନ୍ୟ ସଦସ୍ୟ ଏବେ ବି ରାସ୍ତାରେ ଥିବା ସୂଚନା ମିଳିଛି। ସୂଚନାଯୋଗ୍ୟ, ଅନୀତା ହରିଆଣାର ହିସାର ଜିଲାର ଫରିଦପୁର ଗଁ।ର ବାସିନ୍ଦା। ସେ ହରିଆଣାର ପୋଲିସ ଇନ୍ସପେକ୍ଟର ଭାବେ କାର୍ଯ୍ୟରତ ଅଛନ୍ତି। ଅନୀତା ଚତୁର୍ଥଥର ପର୍ବତ ଚଢ଼ିବାକୁ ଚେଷ୍ଟା କରିଥିବା ବେଳେ ୨୦୧୫ରେ ନେପାଳ ରାସ୍ତାରୁ, ୨୦୧୭ରେ ଚାଇନ ଓ ଚଳିତ ବର୍ଷ ୨୦୧୯ରେ ମାଉଣ୍ଟ ଏଭରେଷ୍ଟ ଚଢ଼ିବାରେ ସଫଳ ହୋଇଛନ୍ତି। ସେହିପରି ୨୦୧୫ରେ ୨୨ହଜାର ଫୁଟ ଚଢ଼ିବା ପରେ ଝଡ଼ ହେବାରୁ ତାଙ୍କୁ ସେଠାରୁ ହିଁ ଫେରିବାକୁ ପଡ଼ିଥିଲା। ଜୀବନର କୌଣସି ଝଡ଼ଝଞ୍ଝାକୁ ସାମ୍ନା କରିବାକୁ ସେ ସମସ୍ତ ଯୁବପିଢ଼ିଙ୍କୁ ଆହ୍ବାନ କରିଛନ୍ତି। ନିଜର ଜୀବନର ସଂଘର୍ଷକୁ ନିଜର ସାଥୀ କରିନେବା ପାଇଁ ସେ ଯୁବପିଢ଼ିଙ୍କୁ ପରାମର୍ଶ ଦେଇଛନ୍ତି। ଅନୀତାଙ୍କ ଏହି କାର୍ଯ୍ୟ ପାଇଁ ସବୁ ମାହୋଲରେ ପ୍ରଶଂସା କରାଯାଇଥିବା ବେଳେ ସେ ସମସ୍ତଙ୍କ ପାଇଁ ପ୍ରେରଣାଦାୟୀ ସାଜିଛନ୍ତି। ଏଥିସହ ବିଶ୍ୱର ସବୁଠାରୁ ବଡ଼ ସିକ୍ୟୁରିଟି କମ୍ପାନୀ ଏସ୍ଆଇଏସ୍ର ସେ ବ୍ରାଣ୍ଡ ଆମ୍ବାସାଡାର ଥିବା ଜଣାପଡ଼ିଛି।
