ପୁରୁଣା ଭୁବନେଶ୍ୱର,୧୦।୪(ଡି.ଏନ୍.ଏ.): ଅଶୋକାଷ୍ଟମୀ ଅବସରରେ ଶନିବାର ପ୍ରଭୁ ଶ୍ରୀଲିଙ୍ଗରାଜଙ୍କ ରୁକୁଣା ରଥଯାତ୍ରା ଅନୁଷ୍ଠିତ ହୋଇଯାଇଛି। ବିଭିନ୍ନ ନୀତିକାନ୍ତି ପରେ ଶ୍ରୀଲିଙ୍ଗରାଜ, ଭଉଣୀ ରୁକୁଣା ଦେବୀ, ପ୍ରଭୁ ଦୋଳଗୋବିନ୍ଦ ଦକ୍ଷିଣ ଘରୁ ବିଜେ ହୋଇ ଆଡ଼କାଠ ନିକଟରେ ପହଞ୍ଚିଥିଲେ। ସେବାୟତମାନେ ଶ୍ରୀଜୀଉଙ୍କୁ ଆଜ୍ଞାପ୍ରସାଦ ଦେବାପରେ ଅପରାହ୍ନ ୧ଟାରେ ଶ୍ରୀଜୀଉଙ୍କ ଚଳନ୍ତି ପ୍ରତିମାଙ୍କୁ ପହଣ୍ଡିରେ ଆଣିଥିଲେ। ଅପରାହ୍ନ ୧ଟା ୫୦ରେ ଶ୍ରୀଜୀଉମାନେ ରଥାରୂଢ଼ ହୋଇଥିଲେ। ପୂଜାପଣ୍ଡା ସେବାୟତ ଛେରାପହଁରା କରିଥିଲେ। ଅପରାହ୍ନ ୩ଟା ୨୨ରେ ରଥ ଉପରକୁ ଘୋଡ଼ା ଉଠିବା ପରେ ରଥ କାଳିସୀ ନରସିଂହ ଖୁଣ୍ଟିଆ ଓ ତାଙ୍କ ପୁଅ ଭବାନୀ ରଥକୁ ଚଢ଼ିଥିଲେ। ଅପରାହ୍ନ ୪ଟା ୫୫ରେ ରଥଟଣା ହୋଇଥିଲା। ତେବେ ମନ୍ଦିର ପ୍ରଶାସନ ପକ୍ଷରୁ ନୀତିନିର୍ଘଣ୍ଟ ଅନୁସାରେ ଅପରାହ୍ନ ୩ଟା ୩୦ରେ ରଥ ଟଣା ହେବାକୁ ଥିଲା। ହେଲେ ୧ଘଣ୍ଟା ୨୫ମିନିଟ ବିଳମ୍ବରେ ରଥ ଟଣା ଯାଇଥିଲା। ରଥଖଳାରୁ ୫୦୦ମିଟର ରଥ ଗଡ଼ିଲା ପରେ ସନ୍ଧ୍ୟା ହୋଇଯିବାରୁ ଟଣା ବନ୍ଦ ରହିଛି। ରଥ ତିନିମୁଣ୍ଡିଆ ଛକ ନିକଟରେ ଅଟକି ରହିଛି।
ପ୍ରବଳ ଖରା ସତ୍ତ୍ୱେ ହଜାର ହଜାର ଶ୍ରଦ୍ଧାଳୁ ଭକ୍ତିମୟ ପରିବେଶ ମଧ୍ୟରେ ରଥ ଟାଣିବାକୁ ଅପେକ୍ଷା କରି ରହିଥିଲେ। ଅଳ୍ପ ସମୟ ରଥ ଟଣା ଯୋଗୁ ଶ୍ରଦ୍ଧାଳୁମାନେ ନିରାଶ ହୋଇ ଫେରିଥିଲେ। ଗୋଟିଏ ଦିନରେ ରଥ ଟଣାଯାଇ ରାମେଶ୍ୱର ମନ୍ଦିରରେ ଲାଗିବାର ନିୟମ ଥିବା ବେଳେ ଏହା ହୋଇପାରି ନ ଥିଲା। ଶୁକ୍ରବାର ରଥ ପ୍ରତିଷ୍ଠା ଅର୍ଥାତ୍ ଠାକୁରଙ୍କ ବଡ଼ସିଂହାର ନୀତିରେ ପ୍ରାୟ ଦେଢ଼ ଘଣ୍ଟା ବିଳମ୍ବ ଯୋଗୁ ଶନିବାର ମଙ୍ଗଳ ଆଳତି ନୀତି ୬ଟା ୩୦ରେ ହୋଇଥିଲା। ଫଳରେ ରଥ ଟଣା ୧ଘଣ୍ଟା ୨୫ମିନିଟ ବିଳମ୍ବରେ ହୋଇଥିଲା। ରବିବାର ନୀତିକାନ୍ତି ପରେ ଅପରାହ୍ନ ୩ଟାରେ ପୁଣି ରଥ ଟଣାଯିବ।
