ହୋଷ୍ଟନ (ଆମେରିକା), ୨୨।୬- ଓ୍ବାଲର୍ଡ ରେସଲିଂ ଏଣ୍ଟରଟେନମେଣ୍ଟ (ଡବ୍ଲ୍ୟୁଡବ୍ଲ୍ୟୁଇ)ର ସର୍ବକାଳୀନ ଶ୍ରେଷ୍ଠ ରେସ୍ଲର ତଥା ‘ଡେଡ୍ମ୍ୟାନ’ ଭାବେ ପରିଚିତ ଦି ଅଣ୍ଡରଟେକର ରିଙ୍ଗ୍ରେ ଆଉ ଲଢ଼େଇ କରୁଥିବାର ଦେଖିବାକୁ ମିଳିବେନି। ୫୫ ବର୍ଷୀୟ ଏହି କିମ୍ବଦନ୍ତୀ ଆମେରିକୀୟ ପ୍ରଫେଶନାଲ ରେସ୍ଲର ତାଙ୍କ ୩୦ ବର୍ଷର ଜ୍ୱାଜୁଲ୍ୟମୟ କ୍ୟାରିୟରରେ ପୂର୍ଣ୍ଣଛେଦ ପକାଇ ଡବ୍ଲ୍ୟୁଡବ୍ଲ୍ୟୁଇକୁ ଅଲ୍ବିଦା କହିଛନ୍ତି। ଫଳରେ ଡବ୍ଲ୍ୟୁଡବ୍ଲ୍ୟୁଇରେ ଏକ ଯୁଗର ଅବସାନ ଘଟିଛି କହିଲେ କିଛି ଅତ୍ୟୁକ୍ତି ହେବ ନାହିଁ। ୬ ଫୁଟ୍ ୧୦ ଇଞ୍ଚ ଉଚ୍ଚତା ବିଶିଷ୍ଟ ଏହି ରେସଲର୍ଙ୍କ ପ୍ରକୃତ ନାମ ହେଉଛି ମାର୍କ ଓ୍ବିଲିୟମ କାଲଓ୍ବେ। କିନ୍ତୁ ରିଙ୍ଗରେ ସେ ‘ଦି ଅଣ୍ଡରଟେକର୍’ ଭାବେ ବିଶ୍ୱରେ ବେଶ୍ ପରିଚିତ। ୧୯୮୭ରେ ଫ୍ରଫେଶନାଲ ରେସ୍ଲର ଭାବେ ଅଣ୍ଡରଟେକର କ୍ୟାରିୟର ଆରମ୍ଭ କରିଥିଲେ। କିନ୍ତୁ ୧୯୯୦ରେ ସେ ଡବ୍ଲ୍ୟୁଡବ୍ଲ୍ୟୁଇରେ ପଦାର୍ପଣ କରିଥଲେ। ଲଢ଼େଇ ପୂର୍ବରୁ ଅଣ୍ଡରଟେକର ଯେତେବେଳେ ରିଙ୍ଗ୍କୁ ପ୍ରବେଶ କରିଥାନ୍ତି ସେ ସମୟ ବେଶ୍ ରୋମାଞ୍ଚକ ଥାଏ। କଳା ରଙ୍ଗର ଲମ୍ବା ଜ୍ୟାକେଟ୍ ସାଙ୍ଗକୁ ଟୋପି ପରିଧାନ କରି ଅଣ୍ଡରଟେକର ଏରେନାକୁ ପ୍ରବେଶ କରିବାବେଳେ ପୁରା ପରିବେଶ ଅନ୍ଧକାର ଓ ଧୂଆଁମୟ ହୋଇଉଠେ। କେତେବେଳେ ଚାଲି ଚାଲି ତ ପୁଣି ବୁଲେଟ୍ ଚଢ଼ି ଅଣ୍ଡରଟେକର ରିଙ୍ଗକୁ ଆସିଥାନ୍ତି। ୩୦ ବର୍ଷର କ୍ୟାରିୟରେ ରିଙ୍ଗରେ ସେ ଅନେକ ଜଣାଶୁଣା ରେସ୍ଲରଙ୍କୁ ଧରାଶାୟୀ କରିଛନ୍ତି। ସେ ଡବ୍ଲ୍ୟୁଡବ୍ଲ୍ୟୁଇର ବହୁ ଟାଇଟଲ୍ର ଅଧିକାରୀ ମଧ୍ୟ ହୋଇଛନ୍ତି। ରେସଲମାନିଆରେ ସେ କ୍ରମାଗତ ୨୧ ଲଢ଼େଇ ଜିତିଥିଲେ। କିନ୍ତୁ ବ୍ରୋକ ଲେନସର୍ ଏହି ରେକର୍ଡକୁ ଭାଙ୍ଗିଥିଲେ। ବୟସ ୫୦ ଅତିକ୍ରମ କରିଥିଲେ ମଧ୍ୟ ସେ କେବେ ଥକି ପଡ଼ି ନ ଥିଲେ। ଶେଷଥର ପାଇଁ ଅଣ୍ଡରଟେକରଙ୍କୁ ଗତ ଏପ୍ରିଲରେ ରେସଲମାନିଆ-୩୬ରେ ଏ.ଜେ. ଷ୍ଟାଇଲଙ୍କ ବିପକ୍ଷରେ ଲଢ଼େଇ କରୁଥିବାର ଦେଖିବାକୁ ମିଳିଥିଲା। ଏହି ଲଢ଼େଇରେ ସେ ବିଜୟୀ ହୋଇଥିଲେ। ଅଣ୍ଡରଟେକର ରିଙ୍ଗ୍କୁ ଅଲ୍ବିଦା କରିଥିଲେ ମଧ୍ୟ ରେସ୍ଲିଂ ସହ ପରିଚିତ ଥିବା ଲୋକେ ତାଙ୍କୁ ସର୍ବଦା ମନେରଖିବେ।
