ଦାରିଙ୍ଗବାଡ଼ି,୧।୧(ଡି.ଏନ.ଏ) -ଦାରିଙ୍ଗବାଡ଼ି ବ୍ଲକ ଡବେରୀଠାରେ ଥିବା ଅଙ୍ଗନାୱାଡ଼ି କେନ୍ଦ୍ରରେ ବହୁ ଅବ୍ୟବସ୍ଥା ଦେଖାଦେଇଛି। ମଙ୍ଗଳବାର ଶିଶୁମାନେ ସକାଳ ୯ଟାରୁ ଆସି କେନ୍ଦ୍ର ସମ୍ମୁଖରେ ବହୁ ସମୟ ଧରି ଅପେକ୍ଷା କରିଥିଲେ ମଧ୍ୟ ଚାବି ନ ଥିବାରୁ କେନ୍ଦ୍ର ଖୋଲି ନ ଥିଲା। ପରେ ସହାୟିକା ବବିତା ପ୍ରଧାନ ଅଙ୍ଗନାୱାଡ଼ି କେନ୍ଦ୍ରର କର୍ମୀ ସୁନତା ପ୍ରଧାନଙ୍କ ଠାରୁ ଚାବିଆଣି ପ୍ରାୟ ୧୧ଟାବେଳେ କେନ୍ଦ୍ର ଖୋଲିଥିଲେ। ରୋଷେଇ କରି ସାଢ଼େ ୧୨ଟାରେ ଖାଇବାକୁ ଦେଇ ଶିଶୁମାନଙ୍କୁ ଘରକୁ ପଠାଇଥିବା ଅଭିଭାବକ ସ୍ନେହାଶିଷ ସାହୁ କହିଛନ୍ତି। ଘଟଣାକୁ ନେଇ ଅଭିଭାବକ ମହଲରେ ତୀବ୍ର ଅସନ୍ତୋଷ ଦେଖାଦେଇଥିଲା।
ପ୍ରକାଶ ଯେ, ଡବେରୀ କେନ୍ଦ୍ରଟି ୫୯ ନଂ. ଜାତୀୟ ରାଜପଥ କଡ଼ରେ ରହିଛି। କେନ୍ଦ୍ରର କର୍ମୀ ସୁନତା ଉକ୍ତ କେନ୍ଦ୍ର ନିକଟରେ ରହୁଛନ୍ତି। ହେଲେ ବହୁ ସମୟରେ ସେ ଘରକୁ ପଳାଉଥିବା ସିଡିପିଓ ମୀନା ପାତ୍ରଙ୍କ ନିକଟରେ ବାରମ୍ବାର ଅଭିଯୋଗ ହୋଇଥିଲା। ସିଡିପିଓ କର୍ମୀଙ୍କୁ ଜବାବ ତଲବ ସହ ଦରମା ବନ୍ଦ କରିଥିଲେ। ତଥାପି କୌଣସି ସୁଧାର ଆସୁ ନ ଥିବା ସିଡିପିଓ ସ୍ବୀକାର କରିଛନ୍ତି। କେନ୍ଦ୍ରରେ ମୋଟ ୧୬ଜଣ ଶିଶୁ ପଢୁଛନ୍ତି। ଅବ୍ୟବସ୍ଥା ଯୋଗୁ ଅନେକ ଅଭିଭାବକ ସେମାନଙ୍କ ଶିଶୁଙ୍କୁ ଛାଡୁ ନାହାନ୍ତି। ମଙ୍ଗଳବାର ୧୧ଟା ସୁଦ୍ଧା ମାତ୍ର ୭ଜଣ ଶିଶୁ ଆସିଥିବା କେନ୍ଦ୍ର ସହାୟିକା ବବିତା କହିଛନ୍ତି। ସେ କହିଛନ୍ତି ଯେ, କୌଣସି ଅଫିସରେ ବୈଠକ ରହିଥିବାରୁ କେନ୍ଦ୍ରର କର୍ମୀ ସେଠାକୁ ଯାଇଛନ୍ତି। ଏନେଇ କେନ୍ଦ୍ରର କର୍ମଚାରୀ ସୁନତାଙ୍କୁ ପଚାରିବାରୁ ସହାୟିକା ଶିଶୁମାନଙ୍କୁ ଘରଘର ବୁଲି ଡାକି ଯିବାରୁ ବିଳମ୍ବ ହୋଇଛି ବୋଲି କହିଥିଲେ। ଠିକ୍ ସମୟରେ କେନ୍ଦ୍ର ଖୋଲିବାକୁ ଅଭିଭାବକମାନେ ଦାବି କରିଛନ୍ତି। ଏନେଇ ସିଡିପିଓ ପାତ୍ର ଘଟଣାର ତଦନ୍ତ କରି କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତି।
