ଝରିଗାଁ,୨ା୬(ସ୍ବ.ପ୍ର.): ନବରଙ୍ଗପୁର ଜିଲା ଝରିଗାଁ ଥାନା ଅନ୍ତର୍ଗତ ଚିତାବେଡ଼ା ଗ୍ରାମରେ ରବିବାର ସକାଳେ ଟ୍ରାକ୍ଟର – ଟ୍ରଲି ଚାପି ହୋଇ ଘଟଣାସ୍ଥଳରେ ଜଣେ ଯୁବକଙ୍କ ମୃତ୍ୟୁ ଘଟିଛି। ପ୍ରାପ୍ତ ଖବରରୁ ଜଣାପଡ଼ିଛି, ବେଲଗାଁ ପଞ୍ଚାୟତ କରମରୀ ଗ୍ରାମର ଟ୍ରାକ୍ଟରଟି ଡଙ୍ଗରୀଗୁଡ଼ା ପଞ୍ଚାୟତ ରାବଣାଗୁଡ଼ା ଗ୍ରାମରୁ ଚିପସ୍ ବୋଝେଇ କରି କରମରୀ ଅଭିମୁଖେ ଯାଉଥିଲା। ଚିତାବେଡ଼ା ଗ୍ରାମ ପାଣିଟାଙ୍କି ନିକଟରେ ଚିପସ୍ ବୋଝେଇ ଟ୍ରଲିଟି ଓଲଟି ପଡ଼ିଥିଲା। ଫଳରେ ସେଥିରେ ବସିଥିବା ଯୁବକ ଜଣକ ଚାପି ହୋଇ ଘଟଣାସ୍ଥଳରେ ମୃତ୍ୟୁ ହୋଇଥିଲା। ମୃତକ ଯୁବକ କରମରୀ ଗ୍ରାମର ଗଙ୍ଗା ଭତ୍ରାଙ୍କ ପୁଅ କ୍ଷମା ଭତ୍ରା(୨୩)। ଘଟଣାସ୍ଥଳରେ ଥାନା ଏସ୍ଆଇ ରାମଚନ୍ଦ୍ର ଅଗସ୍ତି, ଏସ୍ଆଇ ସନ୍ତୋଷ କୁମାର ମାଝୀ ପ୍ରମୁଖ ପହଞ୍ଚି ମୃତ ଯୁବକଙ୍କୁ ଉଦ୍ଧାର କରି ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରିଛନ୍ତି।
