ନୂଆଦିଲ୍ଲୀ,୧୭।୧୨: ଦିଲ୍ଲୀର ଜାମିଆ ପରେ ଏବେ ସିଲମପୁରକୁ ବ୍ୟାପିଛି ନାଗରିକତା ସଂଶୋଧନ ଆଇନ (ସିଏଏ) ହିଂସା। ମଙ୍ଗଳବାର ଜଫରାବାଦରେ ସିଏଏ ବିରୋଧରେ ବିକ୍ଷୋଭ ପ୍ରଦର୍ଶନ କରାଯାଇଛି। ଏହାରି ଭିତରେ ପୋଲିସ ଓ ପ୍ରଦର୍ଶନକାରୀ ମୁହାଁମୁହିଁ ହୋଇଛନ୍ତି। ବିକ୍ଷୋଭ ପ୍ରଦର୍ଶନ ସମୟରେ ପ୍ରଦର୍ଶନକାରୀମାନେ ପୋଲିସଙ୍କ ଉପରକୁ ପଥରମାଡ଼ କରିଛନ୍ତି। ଏଥିରେ କିଛି ଗାଡିର କାଚ ଭାଙ୍ଗିଯାଇଥିବା ବେଳେ କେତେକ ପୋଲିସକର୍ମୀ ଓ ପ୍ରଦର୍ଶନକାରୀ ଆହତ ହୋଇଛନ୍ତି। ଭିଡ଼କୁ ନିୟନ୍ତ୍ରଣ କରିବାକୁ ଯାଇ ପୋଲିସ ଲୁହ ବୁହା ଗ୍ୟାସ ପ୍ରୟୋଗ କରିଛି। ପ୍ରଦର୍ଶନ ପରେ ପୋଲିସ ସିଲମପୁରରୁ ଜଫରାବାଦକୁ ଯାଉଥିବା ୬୬ଫୁଟ ରାସ୍ତାକୁ ୨ପକ୍ଷରୁ ବନ୍ଦ କରିଦେଇଛି। ଏଥିସହ ସିଲମପୁର, ଜଫରାବାଦ ଓ ଓ୍ବେଲକମ୍ ସମେତ ୩ଟି ମେଟ୍ରୋ ଷ୍ଟେଶନକୁ ମଧ୍ୟ ବନ୍ଦ କରିଦିଆଯାଇଛି। ଏହି ମେଟ୍ରୋ ଷ୍ଟେଶନରେ ମେଟ୍ରୋ ଟ୍ରେନ ରହିପାରିବ ନାହିଁ।
