ତିର୍ତ୍ତୋଲ,୪ା୧୨(ଡି.ଏନ.ଏ.): ତିର୍ତ୍ତୋଲ ନିକଟସ୍ଥ ମହାନଦୀପଠା ଗୋପିଆକୁଦଠାରେ ପାଳିତ ହୋଇଥିବା ଚେଳିତୋଳ ବାଲିଯାତ୍ରାକୁ ଆଉ କିଛିଦିନ ପରେ ମାସେ ପୁରିବ। ବାଲିଯାତ୍ରା ପରେ ପଡ଼ିଆ ସଫା କରାଯିବା କଥା। ମାତ୍ର ଏହି ପଡିଆରେ ଏ ପର୍ଯ୍ୟନ୍ତ ପଲିଥିନ ସମେତ ବିଭିନ୍ନ ବର୍ଜ୍ୟ ସାମଗ୍ରୀ ପଡିରହିଛି। ପଡିଆ ସଫେଇ ପ୍ରତି କେହି ଦୃଷ୍ଟି ଦେଇନାହାନ୍ତି। ବାଲିଯାତ୍ରାରେ ବିଭିନ୍ନ ବିପଣି ଖୋଲିଥିବା ଦୋକାନୀମାନେ ବହୁଳ ଭାବରେ ପଲିଥିନ, ଥର୍ମକୁଲ ପାତ୍ର, ଖଲିପତ୍ର, ଆଇସକ୍ରିମଜରି ସମେତ ଅନ୍ୟାନ୍ୟ ଅଳିଆ ଇତ୍ୟାଦି ଏହି ପଡିଆରେ ବିକ୍ଷିପ୍ତ ଭାବରେ ପକାଇଥିଲେ। ଫଳରେ ଏହି ଜରି ଏବଂ ଅନ୍ୟାନ୍ୟ ଅଳିଆ ପବନରେ ଉଡି ପରିବେଶ ଖରାପ କରିବା ସହ ନିକଟରେ ଥିବା ଗୋପିଆକୁଦ ଅଧିବାସୀଙ୍କ ବାଡିଘରେ ପଡୁଛି। ଏହାକୁ ନେଇ ସ୍ଥାନୀୟ ଲୋକ ଅସନ୍ତୋଷ ପ୍ରକାଶ କରିବା ସହ ପଡିଆ ସଫା ଦିଗରେ ବାଲିଯାତ୍ରା କମିଟି ଉଦ୍ୟମ କରିବାକୁ ଦାବି କରିଛନ୍ତି। ବିଗତ ବର୍ଷରେ ବାଲିଯାତ୍ରା ସରିବା ପରେ ଏହିପରି ଭାବରେ ପଲିଥିନ ଓ ଅଳିଆ ପଡିଆରେ ଗଦାହୋଇ ରହିଥାଏ। କିଛିବର୍ଷ ବାବା ବଳିଆଙ୍କ ନିର୍ଦ୍ଦେଶରେ ଶିଶୁ ଅନନ୍ତ ଆଶ୍ରମ ତରଫରୁ ଏହି ପଡିଆରୁ ଅଳିଆ ସଫା କରାଯାଇଥିଲା। ଏଥିସହ ଝଙ୍କଡ ସାହିତ୍ୟ ସଂସଦ ସଦସ୍ୟ ମଧ୍ୟ ଥରେଦୁଇଥର ପୂର୍ବ ବର୍ଷ ମାନଙ୍କରେ ଏହି ପଡିଆ ସଫା କରିଥିଲେ। ଚଳିତବର୍ଷ ବାଲିଯାତ୍ରା କମିଟି କିମ୍ବା ଅନ୍ୟ କୌଣସି ଅନୁଷ୍ଠାନ ଏହି ପଡିଆ ସଫାଦିଗରେ ପଦକ୍ଷେପ ନେଇନାହାନ୍ତି। ତେଣୁ ଏଥିପ୍ରତି ପ୍ରଶାସନ ଦୃଷ୍ଟିଦେବାକୁ ଦାବି ହୋଇଛି।
