ଖୋର୍ଦ୍ଧା ଅଫିସ,୧୭ା୬ : ଚିଲିକା ଡଙ୍ଗାବୁଡି ଘଟଣାକୁ ଇତିମଧ୍ୟରେ ବର୍ଷେ ବିତିଯାଇଛି। ହେଲେ ବିପଜ୍ଜନକ ନୌଯାତ୍ରାରେ ଲାଗି ପାରିଲାନି ଲଗାମ। ସ୍ଥିତିରେ କିଛିଟା ସୁଧାର ଆସିଥିଲେ ହେଁ ଏବେବି ସବୁ ଅବ୍ୟବସ୍ଥାରେ ଚାଲିଛି। ଡଙ୍ଗାରେ ଲାଇଫ୍ ଜ୍ୟାକେଟ ଗଚ୍ଛିତ ରଖାଯାଉଥିଲେ ହେଁ ଅଧିକାଂଶ ପର୍ଯ୍ୟଟକ ପିନ୍ଧୁନାହାନ୍ତି। ବିପଜ୍ଜନକ ନୌଯାତ୍ରା ଅନୁଧ୍ୟାନର ବ୍ୟବସ୍ଥା ନ ଥିବାରୁ ଅବ୍ୟବସ୍ଥାକୁ ରୋକିବା ସମ୍ଭବ ହେଉନି।
ଚିଲିକା ଡଙ୍ଗାବୁଡିରେ ୬ ଜଣଙ୍କର ମୃତ୍ୟୁ ପରେ ଆଶା କରାଯାଉଥିଲା, ବିପଜ୍ଜନକ ନୌଯାତ୍ରାରେ ଲଗାମ ଲାଗିବ। ହେଲେ ଲଗାମ ଲାଗିବାକୁ ତତ୍କାଳୀନ ଖୋର୍ଦ୍ଧା ଜିଲା ପ୍ରଶାସନ, ବାଣିଜ୍ୟ ଓ ପରିବହନ ମନ୍ତ୍ରୀ ଯେଉଁ କଟକଣା ଜାରି କରିଥିଲେ, ତାହା ମଧ୍ୟ ଉଲ୍ଲଂଘନ ହୋଇ ଚାଲିଛି। ଚିଲିକା ଭିତରକୁ ବୁଲିଯିବାକୁ ହେଲେ ଲାଇଫ୍ ଜ୍ୟାକେଟ୍ ପିନ୍ଧିବାକୁ ବାଧ୍ୟତାମୂଳକ କରାଯାଇଥିଲା। ଲାଇଫ୍ ଜ୍ୟାକେଟ ପିନ୍ଧି ନ ଥିଲେ ଡଙ୍ଗାରେ ଚଢ଼ିବାକୁ ମନା ବୋଲି ନିର୍ଦ୍ଦେଶ ରହିଛି। ଏପରି ନିର୍ଦ୍ଦେଶ ସରକାରଙ୍କ ପକ୍ଷରୁ ଡଙ୍ଗାବୁଡି ପରେ ବାଣିଜ୍ୟ ଓ ପରିବହନ ମନ୍ତ୍ରୀ ଦେଇଥିଲେ। ହେଲେ ଚିଲିକାରେ ନୌଯାତ୍ରା ସମୟରେ କିଛି ପର୍ଯ୍ୟଟକ ଲାଇଫ୍ ଜ୍ୟାକେଟ୍ ପିନ୍ଧୁଥିବା ବେଳେ ଅଧିକାଂଶ ପିନ୍ଧୁନାହାନ୍ତି। କ୍ୟାମେରା ପଡିଲେ ତରବରିଆ ଭାବେ ସମସ୍ତେ ଲାଇଫ୍ ଜ୍ୟାକେଟ୍ ପିନ୍ଧୁଛନ୍ତି। ସେହିଭଳି ପ୍ରତି ଡଙ୍ଗାରେ ଅଗ୍ନି ନିର୍ବାପକ ଯନ୍ତ୍ର ଓ ଲାଇଫ ବୟ, ଲାଇସେନ୍ସପ୍ରାପ୍ତ ଚାଳକ କେବଳ ଡଙ୍ଗା ଚଳାଇ ପାରିବେ। ପ୍ରତ୍ୟେକ ଡଙ୍ଗାରେ ଡଷ୍ଟବିନ୍, ପାଣି ଓ ଛାଇର ବ୍ୟବସ୍ଥା ରଖିବାକୁ ପଡିବ। ଡଙ୍ଗାଗୁଡିକ ସରକାରୀ ନୀତି ନିୟମ ମାପରେ ହୋଇଛି କି ନାହିଁ ତା’ର ଅନୁଧ୍ୟାନ ହେବା ପରି ଅନୁରୂପ ନିର୍ଦ୍ଦେଶନାମା ରହିଛି। ତେବେ ଏହା କାର୍ଯ୍ୟକାରୀ ହେଉନାହିଁ। ଅଧିକାଂଶ ଡଙ୍ଗା ମାଲିକ ସରକାରଙ୍କର ଏ ଆଇନକୁ ଡଷ୍ଟବିନ୍କୁ ଫୋପାଡି ଦେଇଥିବା ଅଭିଯୋଗ ରହିଛି। ଉଲେଖଥାଉକି, ୨୦୧୮ ଜୁନ ୧୬ ଶେଷ ରଜରେ ଚିଲିକାରେ ଡଙ୍ଗାବୁଡି ହୋଇ ୬ଟି ଜୀବନ ଚାଲି ଯାଇଥିଲା। ସେଦିନର ଘଟଣାକୁ ମନେ ପକାଇଲେ ଲୋମ ଟାଙ୍କୁରି ଉଠେ।
କାଳିଜାଈ ପୀଠରେ ସ୍ବାସ୍ଥ୍ୟସେବା ବ୍ୟବସ୍ଥା ନ ଥିବାରୁ ଅସନ୍ତୋଷ
ବିଶ୍ୱ ପର୍ଯ୍ୟଟନ ମାନଚିତ୍ରରେ ଚିଲିକାର ସ୍ଥାନ ସ୍ବତନ୍ତ୍ର। ଚିଲିକାର ପ୍ରାକୃତିକ ପରିବେଶ ଓ ମା’ କାଳିଜାଈଙ୍କ ପୀଠ ପର୍ଯ୍ୟଟକଙ୍କୁ ଚିଲିକାକୁ ଟାଣି ଆଣୁଛି। ସରକାର ପର୍ଯ୍ୟଟନସ୍ଥଳର ବିକାଶ ଓ ପର୍ଯ୍ୟଟକଙ୍କୁ ଆକୃଷ୍ଟ କରିବାକୁ ଲକ୍ଷାଧିକ ଟଙ୍କା ଖର୍ଚ୍ଚ କରୁଛନ୍ତି। ହେଲେ ପର୍ଯ୍ୟଟକଙ୍କ ସ୍ବାର୍ଥକୁ ଗୁରୁତ୍ୱ ଦିଆଯାଉନି ବୋଲି ଅଭିଯୋଗ ରହିଛି। ଦେଶ ବିଦେଶର ପର୍ଯ୍ୟଟକଙ୍କ ଭିଡ଼ କାଳିଜାଈ ପୀଠରେ ହେଉଛି। କିଛି ଘଟଣା ଘଟିଲେ କାଳିଜାଈ ପୀଠରେ ସ୍ବାସ୍ଥ୍ୟସେବା ମିଳୁନି। ଏଣୁ କାଳିଜାଈରେ ସ୍ବାସ୍ଥ୍ୟସେବା ବ୍ୟବସ୍ଥା ରଖିବାକୁ ଦାବି ହେଉଛି। ଏ ସମ୍ପର୍କରେ ଫୁଲବାଣୀର ପର୍ଯ୍ୟଟକ ପ୍ରସନ୍ନ ସାହୁ, ଢ଼େଙ୍କାନାଳର ପ୍ରୀତମ ପ୍ରଧାନ ଓ କଳାହାଣ୍ଡିର ଉମା ଦେବୀ କୁହନ୍ତି, ବାଲୁଗଁାଠାରୁ ଓ ବରକୂଳ ପାନ୍ଥନିବାସଠାରୁ ପ୍ରତ୍ୟହ ଶତାଧିକ ପର୍ଯ୍ୟଟକ ଚିଲିକା ଓ କାଳିଜାଈ ଦର୍ଶନ କରୁଛନ୍ତି। ବାଲୁଗଁାଠାରେ ସ୍ବାସ୍ଥ୍ୟକେନ୍ଦ୍ର ରହିଛି। ତେବେ କାଳିଜାଈଠାରେ ସ୍ବାସ୍ଥ୍ୟସେବା କିଛିନାହିଁ। ପର୍ଯ୍ୟଟକଙ୍କ ସୁବିଧାକୁ ଦେଖି କାଳିଜାଈଠାରେ ଅସ୍ଥାୟୀ ଅଥବା ଭାସମାନ ସ୍ବାସ୍ଥ୍ୟସେବା ଯୋଗାଇ ଦେବା ଉଚିତ। ଡଙ୍ଗାବୁଡି ଘଟଣାରେ ୬ ଜଣଙ୍କ ମୃତ୍ୟୁ ପରେ ବି ସରକାର ଏ ଦିଗରେ କିଛି ନ କରିବା ଦୁର୍ଭଗ୍ୟଜନକ ବୋଲି ସେମାନେ କହିଥିଲେ।
