ଲୋକସଭା ନିର୍ବାଚନର ଫଳାଫଳ ଗୁରୁବାର ଜଣାପଡ଼ିବ। ଏନେଇ ରାଜନୈତିକ ବାତାବରଣ ବେଶ୍ ସରଗରମ ହୋଇଉଠିଛି। ଏ କ୍ଷେତ୍ରରେ ଫିଲ୍ମ ଇଣ୍ଡଷ୍ଟ୍ରିର କିଛି ଅଭିନେତ୍ରୀଙ୍କର ମଧ୍ୟ ଭାଗ୍ୟ ପରୀକ୍ଷା ହେବ। ଏମାନଙ୍କ ମଧ୍ୟରୁ ଜଣେ ଅଭିନେତ୍ରୀ ହେଉଛନ୍ତି ନୁସ୍ରତ ଜହାନ। ସେ ବେଙ୍ଗଲୀ ଫିଲ୍ମ ପାଇଁ ବେଶ୍ ପରିଚିତ। ଯିଏ କି ଚଳିତବର୍ଷ ଲୋକସଭା ନିର୍ବାଚନ ଲଢ଼ିଛନ୍ତି।
ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ନୁର୍ଙ୍କୁ ବସିରହାଟ ଲୋକସଭା ନିର୍ବାଚନମଣ୍ଡଳୀ ପାଇଁ ପ୍ରାର୍ଥୀ କରାଇଛନ୍ତି। ତୃଣମୂଳ କଂଗ୍ରେସରୁ ଟିକେଟ ପାଇ ନୁସ୍ରତ ନିର୍ବାଚନ ଲଢ଼ିଛନ୍ତି। ଟିକେଟ ମିଳିବା ପରଠାରୁ ଏହି ଅଭିନେତ୍ରୀ ଜଣକ ଟ୍ରୋଲ ହେବାରେ ଲାଗିଛନ୍ତି। ନୁସ୍ରତ ୨୦୧୦ରେ ଏକ ବ୍ୟୁଟି କଣ୍ଟେଷ୍ଟ ଜିତିବା ପରେ ମଡେଲିଂ କ୍ୟାରିୟର ଆରମ୍ଭ କରିଥିଲେ। ସେ ବେଙ୍ଗଲୀ ଫିଲ୍ମ ‘ଶତ୍ରୁ’ରେ କ୍ୟାରିୟର ଆରମ୍ଭ କରିଥିଲେ। ୨୯ ବର୍ଷୀୟା ନୁସରତ ଏବେ ‘ଖୋଖା ୪୨୦’, ‘ଖିଲାଡ଼ି’, ‘ସୋଧେ ନମାର ଆଗେ’ ପରି ଫିଲ୍ମରେ କାମ କରି ସାରିଛନ୍ତି। ଯାହା ବି ହେଉ ଏବେ ତାଙ୍କ ନିର୍ବାଚନ ଫଳାଫଳକୁ ନେଇ ଆଶାବାଦୀ ଅଛନ୍ତି ଦର୍ଶକ।
